O ke Ndalo. O na le dingwaga tse 10 mme o dira Mophato wa 5 kwa sekolong sa motse. Ndalo o botlhale thata. "Sephiri sa gagwe ke eng?" baithuti ba bangwe ba a ipotsa.

"O itse go buisa le go kwala thata. O dira jang se?" ba makala. Ndalo o ba bolelela gore ke ka gonne o buisa dibuka tse dintsi. Fa ba senya nako ba sa dire sepe, ene o dirisa nako ya gagwe ka go buisa.

Ka dinako tse dingwe Ndalo o dira R80 ka beke. O dirisa madi a go reka dibuka kwa lebenkeleng la dibuka tse di dirisitsweng mo motseng wa gaabo.

Ndalo o amogela jang madi a a lekaneng go reka dibuka tse? Buisetsa pele go itse.

O ke Pendo, kgomo ya lelapa ya maši. O dira dilitara di le 20 tsa maši ka letsatsi. Rragwe Ndalo o rekisa maši a.

Kgomo e tlhoka dijo le metsi, le nako ya go fula kwa nageng. Ka jalo letsatsi le letsatsi morago ga sekolo Ndalo o thusa ka tiro e. Rragwe o mo fa madi gore a bo a thusa ka se. Mme Ndalo o boloka madi a go reka dibuka beke nngwe le nngwe.

Sa ntlha, Ndalo o fa Pendo ngata ya digwete. O mo fa digwete tse robedi ka letsatsi. Letsatsi le letsatsi o kgetla digwete kwa tshimong ya ga rragwe, tse di lekaneng letsatsi leo.

O ka ipatlela karabo. O tla bona gore Pendo o ja digwete tse di fa tlase ga 60 ka beke. A o ka supa gore o ja tse kae tota?

Morago ga moo, Ndalo o isa Pendo go ya go fula kwa mabaleng. Rragwe o mo kgalemile gore a lebelele nako mme a se fe Pendo go feta dikotara tse tharo tsa ura.

Pendo o simolola go fula ka kotara morago ga ura ya bobedi, gore Ndalo a kgone go mo isa kwa lefelong la go gamela ka ura ya boraro. Ka nako ya mariga fa go fifala ka bonako, Ndalo a ka simolola go fula pele ga nako, ka halofo morago ga ura ya bongwe.

Morago ga moo Ndalo o fa Pendo metsi. Kwa ntle ga metsi Pendo a ka se kgone go ntsha maši, le fa Ndalo a ka mo fa dijo tse dintsi jang. Ndalo o ga metsi ka diemere kwa pompong ya motse gonne ga go e e gaufi.

Sejana sa ga Pendo sa metsi se tshwara dilitara tse 30 tsa metsi. Emere ya ga Ndalo e tshwara fela dilitara tse 5. Ka jalo go tlatsa sejana sa ga Pendo go tlhoka gore Ndalo a ipoeletse gantsi ntsi. A o ka itirela karabo gore o ipoeletsa ga kae?

Jaanong, Ndalo o isa Pendo kwa go rragwe gore a fiwe dikilogerama tse 12 tsa mabele. Ndalo o bala gore e batlile e nna dikilogerama di le 90 ka beke.

Kgetsi nngwe le nngwe e ja R39. Ndalo o bala gore tlhwatlhwa ya mabele ke bokae ka beke. Kwa tshimologong o bala tlhwatlhwa ya dikgetse tse 7 ka R40, se se dira R280. Jaanong o ntsha R7 go fitlhelela R273. "Ke go feta R1 000 ka kgwedi!" Ndalo a phopholetsa. A o nepile?

Rragwe Ndalo o gama Pendo gabedi ka letsatsi. O dira dilitara tse 24 ka letsatsi, ka jalo ke dilitara di le 12 kgamo nngwe le nngwe.

Ka dinako dingwe Ndalo o thusa go gama mme ga go bonolo jaaka go lebega. "Ka letsatsi lengwe," a akanya, "Ke tla nna le dikgomo tsa me mme ke tla tshwanela go ikgamela."

Rragwe o tshela maši go tswa kwa emereng e kgolo mo metemeng ya dilitara tse pedi kgotsa mo mabotlolong a litara e le nngwe.

Gangwe ka beke rragwe Ndalo o neelana ka dilitara tse 25 tsa maši kwa sekolong go fepa bana. Ngwana mongwe le mongwe o fiwa kotara ya litara ya maši a. Se se raya gore bana ba le 100 ba fiwa maši ka letsatsi le.

Rragwe Ndalo o mo fa disente di le 50 mo litareng nngwe le nngwe e a e rekisitseng. Se ga se utlwale e le madi a mantsi, fela rragwe o rekisa dilitara di le 24 ka letsatsi. A o ka bua gore ke bokae?

Ndalo o boloka madi a gagwe go fitlhelela Lamatlhatso fa a ya kwa lebenkeleng la dibuka. Buka nngwe le nngwe e kwa tlase ga R10, ka jalo mo bekeng e e siameng, o kgona go reka tse dintsi.

Gape Ndalo o rata go nwa maši a ga Pendo. Rragwe a re maši a thusa go aga marapo a a tiileng le meno mme a dira gore motho a itekanele.

Ka jalo ka go nwa maši le go ja merogo go tswa mo tshimong ya ga rragwe, Ndalo o maatla e bile o itekanetse. Ga a lwale bonolo mme ga a ke a tshwarwa ke tlala.

Ndalo ga a ke a lebala go leboga Pendo kwa bokhutlong jwa letsatsi. O mo leboga ka digwete tse dingwe le matlhare a morogo a a a bonang a rapaletse mo tshimong.

"Ke a leboga Pendo, o tsala ya me e kgolo! Ke ka ntlha ya gago gore ke maatla, ke itekanetse e bile ke botlhale. Fa e ne e se ka wena ke ne nka se kgone go reka dibuka tse tsotlhe tse di nthusang gore ke fete botlhe mo phaposiborutelong."