Nétií apá te emúrúa é Nárok, olpáyian ó enkitók enyé ó entíto enyé najî Kayánga. Óre áâ enoó larín tómôn Kayang'a, némuoyu menyé, néye. Óre peê elusóo ilarín áare néye siî nínye ng'otonyé. Náa kéjo iltung'aná kumók ké enkeéya ó olmóruo lenyé náawá.

Néíng'uarí Kayánga áâ okishí intóiwúó. Néítubúlu entásât mórúo nájî Rosa. Káke éímóruo nínye naléng, néata elíyio ó osiná sápuk.

Óre nabô olóng, nélo Káyanga abaikí inkuráren oô intóiwúó enyéna ainosakí osiná oáta. Óre peê ebayá ínê, néírragie olbéné onapíta aishír éjô: Pápá, kóreê iyíé? Yíéyio, kóreê iyíé? Kítúng'úáitie matáa okishí? Kóreê intáí?

Néíshir Káyanga te erishatá náado te osína kítok. Óre peê egirá, némanikí emókór sídáí olêng te erishatá óo inkuráren e ménye ó enê ng'ótónyé.

Néíng'asia Káyanga. Néning oltóíló oing'úaa emókór. Náa oltóíló lé enkíléjíléj. Néjo ilô toiló:.

Kayánga, eé, Kayánga! Enkéráí âng, enanyorrí âng! Íme iyíé aké opény, enanyorrí âng! Inkó enâ mókór, enanyorrí âng! Tánapa pookí wúéjî níló, enanyorrí âng! Ínchoo kíléjilej, enanyorrí âng!

Nédumu Káyanga ínâ mókór. Óre nabô kátá, néning enkíléjíléj sápuk. Néíteru aníng énaa kébóítare intóiwúó enyéna. Óre ebaikí ínâ kátá, néaku kénap Káyanga ínâ mókór pookí wúéjî nélô. Néramát, néaku kéel te ilatá. Óre peê éírúrâ néírragie te embatá énye. Óre peê élô olkejú, nénap peê éríshíe bátísho pookí.

Óre nabô olóng nélo olkejú aokú enkáré. Néjo áírrúgó, néídeketári, nébatata. Nényok ajó ásárú emókór enyé peê mésúlári. Káke étóóshó osoít ínâ mókór nébel kát uní. Négila Kayánga táu naléng.

Néísinánuo Káyanga olêng. Néírrúgo akíti adumú imbelát é ínâ mókór enyé. Néíbung te oo ínkáik, nérany ajó:.

Pápá o yieyío! Éng'urá ajó etebéle enapá mokór níkínchóo! Káa áás pápá o yieyío? Éntoduáki te oó ilmónek ajó étón aké kíbóítárere?

Óre peê eshumúnye Káyanga, néning oltóíló leíjo ólê ng'ótónyé éjô: Enkéráí âng! Túdumú imbelát naátung'uayiokí! Tádoikí enkáré inapíta! Tóokunyé enkáré, nísúje inkéjék inóno. Nínturúkuny! Néas Káyanga énaa enatiákakí. Néjo ábólú inkonyék, nédol ajó enyaáka emokór énye arubá, nélulung'áyu énaa apáke. Néíteléíki olgoó lenyé, néning enkíléjíléj kitók olêng. Néshipa naléng.

Nénap Káyanga ínâ mókór pookí wúéjî nélô. Óre peê eím enetíi iltung'aná, néíkilíkuana iltung'aná áajo, "káji doí étíú ená mokór naáíjo kéítu áíkátá kídôl áí nanyaányukie"? Óre peê engorikí Kayánga áí tókî, néítodôl iltúng'áná ínâ mókór. Néíshori pookí tókî nayíéú.

Óre te enkíshui é Kayánga, néponu imáyianat kumók éímû ínâ mókór.