Kayanga yabanga ni bazaire be, nga musanhufu okutuusa bwebaafa nga wa myaka ikumi.

Kayanga yatwalibwa okuba ni Looza eyali amulinaku oluganda. Looza yabisa Kayanga bukalamu aye yali mukaire, nga azira maanhi era nga mughafu.

Kayanga yateranga okuja ku magombe ga bazairebe okubakoberaku ku nnakuye.

Lunaku lulala bweyaja, yaafuna ekirabo. Lyali ibuga nga lyandhawulo. Lyava mu magombe ga bazaire be.

Eibuga lyayemba akemba akalungi era akaseenenkerevu. Kayanga yawulira nga eryo n'eiroboozi lya nguli maama we. Kaali kakoba kati.

Kayanga ee Kayanga! Omwana waife omugonzi! Toli wenka, omugonzi! Toola eibuga lino, omugonzi! Bitanganalyo buli wooja, omugonzi! Likugumyenga, omugonzi!

Kayanga yajanga n'eibuga lye eryo buli ghantu. Bweyabanga nalyo nga awulira mule ati bazaire be bali ghalala naye era bali kumukuuma.

Lulala waabaawo ekintu ekibi ekyatuuka ku ibuga lye. Lyamenheka nga li kusenha maadhi mu mwiga. Kayanga yawulira mule nga omwoyo gwe gwona gumenheike.

Kayanga yagema enjo edhaali dhimeneike ku ibugalye yaayemba:

Bbaabba ni Maama, mubone eibuga limenheike. Eibuga lyemwampa. Nkole ntya, Maama ni Bbaabba? Mumbeere mundage akamanhiso nga mukaali ninze.

Kayanga yawulira amamiro ga maama we nga gamukoba: "Mwana waife, toola enjo edhisigairewo. Dhisenese amaadhi onaabe ebigere. Bwomala okunaaba, zibirira." Kayanga yakola nga bweyawulira era amangu ago eibuga eryali limenheike lyairamu lyaba iramba.

Kayanga yeeyongera okutambulanga neibuga lye buli yeyajanga. Buli gheyabitanga nga abantu beekuba obwama bati, "Eryo ibuga lya kika ki?" Nga ali n'eibuga lye, Kayanga yafunanga buli kintu kyeyeetaaganga.

Nga ali n'eibuga lye, Kayanga yamanha nga bazaire be baali balikumulabirira. Waali wazira kibi kighanga kumutuukaku.