Wankoko ni Waigongolo baali ba mukwano. Aye baali nga buli kiseera baba balikusinganwa.

Lulala baasalagho okuzaanha omupiira okubona eyali asinga kuba muzaanhi mulungi. Baagya mu kisaaghe baatandiika omuzaanho gwaibwe.

Wankoko yali mwangu, aye Waigongolo yali amusingaku obwangu.

Wankoko yasamba omupiira gwaja ghala, aye Waigongolo yagusamba ghala okusingagho. Wankoko yaatoolera okusungughala.

Baasalagho okukuba peneti. Waigongolo n'eyasooka mu goolo.

Wankoko yateeba goolo ndala yonka. Agho oluwalo lwa Wankoko okuba mu goolo lwatuuka.

Waigongolo yasamba omupiira era yaateba. Waigongolo yasala omupiira yaagwiza eno n'ere, era yaateeba.

Waigongolo yakuba omupira nga akozesa mutwe, era yaateeba. Waigongolo yateeba goolo itaanu!

Wankoko yasungughala inho olw'okusingibwa. Yali muntu awulira obubi einho bwasingibwa.

Waigongolo yatandiika okuseka kubanga mukwano gwe yali alikutwala ekintu ekitono, ng'oti kikulu inho.

Olw'okusungughala einho Wankoko yayasama inho yaamira Waigongolo.

Wankoko bweyali atambula okuja eka, yaayagaanana ni Maama Waigongolo. Maama Waigongolo yaabuza ati, "Obwoineku omwana wange?"

Wankoko tiyakoba kintu kyonakyona. Maama Waigongolo yeeraliikirira.

Agho Maama Waigoongolo yaawulira akaloboozi akatono nga kakoba kati, "Maama, nhamba!"

Maama Waigongolo yalingalinga era yaawulirisa bulungi. Eiroboozi lyali lirikuva munda mu nkoko.

Maama Waigongolo yaayasiikana ati, "Kozesa amaani go ag'endhawulo mwana wange!"

Amagongolo gasobola okukola omuuka oguwunha obubi ate gaakaagha. Wankoko yatandiika okwewulira obubi.

Wankoko yabaadhagala. Yaamira yaamala yaafuudha.

Yaayasimula, yaakolola. Yairamu yaakolola. Waigongolo yamukaayira bubi.

Wankoko yakolola okutuusa bwe yakolola Waigongolo.

Maama Waigongolo n'omwanawe beeghalula baaniina omuti beekweka.

Okuva kw'olwo, enkoko n'amagongolo byakyaghagana.