Kéúno te enkúrma é kokoô indáíki kumók. Kétíi olóíkempé ó maanka. Káke óre esídáí aisúl náa ilmaisurîn. Nétií enkají e kokoô inóo inkakúyia kumók. Káke káyíólo nanú ajó kárá kirotét aláng pookí. Káaipotu oshî aké kókoô náainosáki ilomón kúmok. Káke etíi entókî néítu áíkátá áainosáki. Eitú áíkata áainosáki énépîk ilmaisurîn lenyéna meóto.

Óre nabô olóng nádol olkikápu sápuk otíi boó te embatá é enkají e kokoô. Nájó áíkílíkuan náajokí, "olkikápu lái loó intásimi."  Nádol ajó kéítoípo te oó imbenék ó olmaisurí. Nájó áíkílíkuan kokoô, náajokí, "imbénék oó intásimi."

Kányor oshî atotóna atabóítare kokoô. Nátón ajúr ajó káínyoo ená nátií elê kikápu, náítoipóro te oó imbenék.  Náisikông kókoô, náairriwáa mashómo enkají e yieyioô. Nákuet aló.

Óre peê ashukúnye náínépu kokoô étónítâ te bóo. Némétíi olkíkapu, némétíi ilmáísurîn. Náíkilíkuan kokoô ajokí, "kóreê olkikápu?" Náajokí, "etíi ewúéji áí é enáíbón." Náagîl inâ táú.

Óre peê elusóo inkólóng'i áre, náairriwáa kókoô mashómo ayakí entirmá enyé te olgilatá lénye óíruráre. Óre peê ajíng atúa ílô gílátá, náamurutóo olng'usíl lé oo ilmaisurîn oóotô. Nádol olkikápu le kokoô eimulumuláro te olkarashá. Nájó ábólú, nádol ilmaisurîn oóotô oórropîl te átua ílô kikápu.

Náaiture oltoiló lé kokoô ebuakú ajó, "káa íásíta? Íntasiekú entirmá áí!" Náítasíooki kokoô entirmá enyé. Náajokí, "káínyoo níkíntákúéni?" Étón dúóó aké agíra anyimó amû átódúaa ajó káínyoo nátií olkikápu le kokoô.

Óre peê ékényû nélo kókoô abaikí yieyioô. Nákuet aló enkají enyé, nájing olgílátá lenyé, náítádoiki enkáíná atúa olkikápu. Náítáyu ilmaisurîn. Nájapáa aipang'íé. Náítóki aitoíp ílô kikápu. Nálo boó atón anyá lélô maisurîn. Nádol ajó kémelók naléng.

Óre peê ékényû, etií kókoô enkurmá, násaári aló aból olkikápu. Náítáyu ilmaisurîn oóng'uan. Nájo ásáári ashukó, níkinang'á o kokoô te kutúk ají. Néítu aishó metóduaa ilmaisurîn. Nájap te enkílâ. Nágiróo aipáng.

Nékenyu, náa enkolóng ó osokóni. Náa kéyá oshî kókoô ilmaisurîn o manká amír. Néítu ayók aparán ninyé ínâ olóng. Káke ányááká aké aló.

Óre ínâ olóng téípa, náaipót intóiwúó áainéí eboitá o kokoô. Náyíólou ajó káínyoo peê áaipotokí. Óre ínâ kewaríé náírrag nádamú ajó máígil áíkata apurrishó. Imapurróo áí tóki te kókoô, némápúrróo te oó intóiwúó áainéí, némápúrróo te líkáí túng'ání.