Aabawo khaalekho, umusaani umutaambi mutweela, n'umukyelama weewe. Baaba n'umwaana waabwe umukhaana mutweela yenyene, nga bamulaanga lisiina bari Nakhungu. Nakhungu aaba umumiliwu naabi luundi nga umwelama. Basaali beewe nga bamukana naabi.

Shifukhu shitweela basaali baamusiindikha bari atsye amenyekho ni khootsa weewe, uwaba umuyiindifu. Maayi wa Nakhungu waamunabila maliinda iya buraawa, ni kumukhandaala, kamapeesa, ni matoongo. Waamukholela ni khaanaala khaalayi, khe khukhwaabikha mu milo. Nio lwanyuma waamusiindikha khuutsya wa khootsawe.

Ne naaba nga ali khu ntsila atsya, woola khu kheetsi, waakhambukha nga asunila khu mabaale. Ne shanjelekha wakaanana umukhaana umufwiiti nga wakwaarire biitsina.

Umukhaana umufwiiti tsana yuno waamureeba ari, "Uli khuutsya waheena?"Nakhungu weelamwo ari, "Indi khuutsya khukyeniyilakho khootsa wase Marofu. Umukhaana umufwiiti tsana naye ari, "Ni nase Marofu, khootsa wase. Nase indi khuutsya khumukyeniyila." Baryo baaroonga."

Ne ni baaba nga bashiili khwoola aleeyi ta, umukhaana umufwiiti tsana waaloma Nakhungu ari, "Maliinda woowo nga waayakha, ni matoongo woowo nga umulayi. Nase imbekho imbikwaarekho." Aryo Nakhungu wefuula Maliinda weewe, ni matoongo, waabiwa umukhaana umufwiiti tsana uyo.

Nga umukhaana ni efuula bitsina byeewe, wakwaara tsingubo tsa Nakhungu, Nakhungu waabona umukhaana nga alikho kumukhiinga. Nakhungu waarya naabi. Aryo waamanyila abweene ni abweene ari, umukhaana umufwiiti uyo ali Imburu.

Ne bakyeendela atweela nga baroonga. Nakhungu waamuloma, "Musaale, ingobosele Maliinda wase, ni matoongo wase." Ne imburu yamwiilamo iri, "lekha imbikwaarekho khukhwoolesa nga khwoolile aambi ni kusaala ukwo." Wokeselela kusaala kukwaba khu lukiingi.

Uri boola khu kusaala, Nakhungu waalomela Imburu tsana ari, "Uwahe, ingobosele maliinda wase, ni matoongo wase." Imburu yeelamo iri "Indekhe imbikwaarekho khukhwoola khu kheetsi." Nakhungu waaba umuri naabi. Ne waamufukiilila.

Imbuka ikhaliinda ta, boola khu kheetsi. Nakhungu waalomela imburu luundi ari, "Uwahe, ingobosele maliinda wase, ni matoongo wase." Imburu yeelamo luundi iri, "Ifukiilile imbikwaarekho, khukhwoola nga khwoolile khu lisari isi bakhasi bekhaalewo." Baryo beloosela nga baroonga.

Nga ni boola khu lisari, Imburu yaaleba Nakhungu, weela imukoongo, yaboolela bakhasi babekhaalewo iri, "Bona umukhaana uwakwaarire bitsina yuno, niye waanoondeleele shifukhu shoosi. Naandikanile andurekho atsye." Nakhungu kaman'gaanyu kaamuwaamba, shaakila waarya naabi, ni shishamamwo, waatitukha waatsya weebisa mwitaala lye tsikhaafu.

Ne Imburu niyo yaatsya mwisari lya khootsawe Marofu, kila imuloma iri, "Ise umwiwaana woowo Nakhungu. Basaali baase baanumile khukhwiitsa imenye ni nawe." Marofu wenyayila naabi umwaana umukhaana yuno. Niye ni be muuntsu yeewe bookesanisa Imburu shiisa shiikali naabi. Ne Nakhungu na mutaambo kweewe, aakonatsaka mwitaala, waalyatsaka biilyo ni mbwa.

Kumuusi Nakhungu aatsyatsaka mu kyeewa, weebisa mu nashimya nga eemba ari, "Mutaambo kwanyoola! Mutaambo kwanyoola! Paapa wase ni maayi baandumana niitse imenye ni khootsa Marofu. Ne nga indi khu ntsila naakanana ni Mburu. Niyo yaambukula maliinda wase, ni matoongo! Mutaambo kwanyoola! Mutaambo kwanyoola!"

Shifukhu shitweela, mutweela khu baandaaye ba Marofu, aaba nga ali khukyeenda mu kyeewa, waawulila kumweenya kukukhali kwa busheele ta, ne nga kumulayi. Ne nga s'aamanya eena isi kwaba kwaamila ta, ne nga alikoboole ingo, waaboolela Marofu tsilomo tsino. Lubaluba, Marofu waatsya mu kyeewa. Ibweene iyo, waawulila kumweenya, waloonda nga aheentsa, khukhwoolesa nga n'aanyola Nakhuungu.

Nakhungu waamuboolela byoosi nga ni byaba, isaambo isi Imburu yayilamo tsingubo tseewe tsiifuura buulayi, yaamukhola niye khuukwaara bistiina byeewe. Marofu waamukobosayo ingo weewe, waamubisa mu lisari lyeewe. Marofu aaba waamanyile shiina she khuukhola, khufuumbula Imburu.

Marofu aaba waawulila ari, kumukhiinga kwe mburu kwafeela naabi khu mabeele, nga sikunyala kwaabira busa khu mabeele nga mbakhukanywakho ta. Aryo kila alakila baraambi beewe khuuyaba liilowo lileeyi, balitsusemo kamabeele kamabwoowu. Lwanyuma walaanga bakhaana be boosi khuutsya babe mu khaando tse khuusuna.

Umukhaana uwaba wakwaarire maliinda ni matoongo bya Nakhungu wehembelela naabi. Waalekha khukana khuusuna liilowo ta. Lwekhuuba aamanya ari kumukhiinga kweewe kane kufune imeeywa ye kamabeele. Kila atima waatsya wekhupa mu lisari, waabowela kumukhiinga kweewe khu mubili kweewe, wakutswiisila ilala nga n'anyala. Aryo waatsya wetubaasa mu bakhaana basheewe.

Baryo bakhaana baatsya baloondekhana nga basuna. Imbuka ye mburu nayo yoola. Iryo yaakhakakho khukhwiisuta mu ngaaki, isune liilowo. Ne kumukhiinga kwaakangulukha, kwaakihaanyiinya, kwaamwiikhisa aasi, aasi, aasi khukhwoola mu mabeele.

Nga Imburu ni yaba isaambakanila mu mabeele, khaangukho baraambi beelilisa liilowo ni kumuyekhe, baakisiikha. Iyo niyo iyaba intsakamo iye Mburu. Ne Nakhungu niye aarama mu mwikhoyo ni khootsawe imbuka indeeyi naabi. Lukano lwaakamila abweene awo.