Hale hale ŋaliŋo omusinde omwafu n'omuhasi wuwe. Abaatu bano baali n'omwana mulala yenyene ni bamulanga baati "Nakungu." Nakungu gaali muyonjo ate naali wahyere bugali. Abasaye ba Nakungu bamwenda nga bugali weene.

Lulala abasaaye, ba Nakungu basalaŋo aje amenye ni hojaye Mutonganyama owali omuŋinda. Ko Nakungu atiine nyina gamutungiye esikati eyejabulo, eyaaliho ahagoye ahabalanga robboni, apeesa ko n'embira, Gongeraho n'ohumutungira embira jomu mamiro. Bamusebula atiine ewa hojaye.

Nakungu gaali n'ohwaambuha erungu ko goole ewahojaye. Nakungu gambuha erungu nagendera hu mabale agaali mu maaji. Ni goola engereha w'erungu, gageneyo ahahaana ahati ni hambaye agalewo.

Ahahaana aho nga habussa Nakungu haati ''oja ŋeena? Nakungu nga ahagobolamo ati ''Nja ewa hoja yange '' Mutonganyama. Ahahaana ahali mugalewo nga halomera Nakungu haati ''Keesi Mutonganyama aba hoja yange era keesi peyindi hutina." Wange ewe nga abahaana bano bagendera ŋalala olugendo lwawe."

Baali bahiri hugendaho ŋano ni ŋala, nga ahahaana ahali mu galeewo haloma Nakungu haati, ''Esikaati yiyo n'embira nga biyonjo peho nambaleho." Yeesi sigaali mubi aga gefihulamo esikaati n'embira ahaŋa."

Ahahaana hano ni hatusamo agaleewo ko ni hambala engoye ja Nakungu, nga Nakungu abona omuhira gwa hahaana. Obuti nga baŋamba Nakungu. Nakungu nga afania ati dala ahahaana hano yali mbulu.

Abahaana bano beyongeeye ohugendera ŋalala. Nukungu nga asunga owahye ati, "Wange pe esikaati yange n`embira.'' Embulu ngayigobolamo n'esosya hu musala ogwali hu hiswa yiiti, ''Ndehe nambaleho ohwola hu musaala ogwo.''."

Ni boola hu musaala nga Nakungu nindi asunga owahye esikaati n'embira. Embulu nga nindi yimugobolamo yiiti, "Ndehe nambaleho ohwola hwirungu eriri mu momi.'' Olwo hutya nga Nakungu nindi gefugirira."

Sibaluye nga boola hwirungu. Nakungu nga nindi aloma Embulu ati "Wange pe eskaati yange n'embira.'' Embulu nga nindi yiroma Nakungu yiiti, "Olwomala gandeha nambaleho ohwola hu hayumba aŋaali abahasi abehaye bala.'' Ngaŋo beyongera ohugenda.

Nakungu n`embulu ni boola hu hayumba nga Embulu yiwuŋiidiha egongo, yihena yilomera abahasi abaali ni behaye ŋa hayumba yiiti, "Mubona! Omuhaana owa mbaye agaleewo ono ali hunonderesa oludaalo lwosi-Negomba gandehe attine mu jije!'' Nakungu ni gaŋuliye ebyo nga esoni n'obuti bimuŋamba nga aliguha embiro bbwa-a-a aja gehweha mu hidooli."

Embulu nga yitina ewa Mutonganyama yimweyanjulira yiiti, "Ese ndise mwiŋwawo Nakungu. Maama ni bbaabba basindihire eno menye ewuwo." Mutonganyama nga asangalira ahahaana hahe. Mutonganyama nabomumago nga babisya bulaŋi embulu era nga bayiholera ebyehisa ebyene ebingi, maayi wanamwene Nokungu n'aŋenyuha mu hidooli era nalyanga humeere eyi mbwa jalyangaho.

Mu musi Nakungu gajanga gehweha mu ndimiro ya duuma nga ko gembanga ati. O ese omutahi o-o-o ese omutahi, Bbaabba ni maama basindiha ohuja ohumenya ewa hoja Mutonganyama. Ni naali mu ngira nga nagaana embulu eyaŋira esikaati yange n'embira jange o-oese omutahi.

Lulala mulala hubaganda ba Mutonganyama gaali agenda genda mu nimiro nga aŋulira ahembo ahanyaha atenga halaŋi. Ni gaheja heja si gafania aŋahembo hatuliye cooka ni goola eno nga aŋayiraho Mutonganyama. Mutonganyama olwaŋuliye nga genyoheramo atiina mu ndimiro. Ni goola mu ndimiro yeesi nga aŋulira olwembo. Ehi gahola hwendulirisa ohwola alugawene mwiŋwawe Nakungu.

Nakungu ng'alomera hojaye ng'olu mbulu yaali ne muhongerehise yamutusaho engoye jije endaŋi ya muŋa galeewo. Mutonganyama ehigahola huŋira Nakungu ewuwe nga amuhweha mundala hu samba ejaali ŋango. Mutonganyama gaali amanyire ehi aŋanga ohuhola ohwebbinga ho embulu.

Mutonganyama gaali aŋuliyeho ati mbo omuhira gwe mbulu siguŋanga hubita aŋaali amabere ge ŋombe naasi gunyweho. Mutonganyama ehigahola galoma abatambi babe bayaba eroŋo elyene ereŋi nga ko bajuhamo amabere bbongo bejusa. Ngaŋo ko alanga abahaana bomu hitehere ehyo boosi baaje mu mbaha jo hutuuma eroŋo eririmo bbongo.

Oludaalo olwe'mbaha jo hutuuma ni lwolire ng'omuhaana owaali ni gambaye engoye ja Nakungu geralihira bugali weene, natenda hutuuma eroŋo elya limo amabere gabbongo. Hino hyali hityo olwohuba gaali amanyire ati omuhira gugwe gwali guja huba n'enduŋo ya mabere. Embulu ehiyahola yatiina mu ndala hu nyumba nga yehadiraho omuhira ebyene ebyembaha nga ko yiija yeyanja ŋalala n'abahaana bo hu hitehere.

Abahaana hya mulala mulala batiina ni batuma eroŋo, ohwosa olu lubu lwola hu mbulu Embulu ni yaaja ohutuma yejumuye ŋamugulu ko ebite hwiroŋo. Hino sihyasoboha olwohuba omuhira gwayo gweŋunuye mugoye gwa yihwesa ohwola olu mbulu yagwa mwiroŋo elyalimo amabere ga bbongo.

Embulu yesolaho ni yenda eŋwe mwiroŋo lyalimo bbongo, aye abatambi ba Mutonganyama basiiha eroŋo mangu mangu na galoba. Ebye mbulu nga byagamira aŋo. Aye Nakungu nga amenya ewa hojaye mu mirembe ohuhena eteŋama enyene endeŋi.