Khale yaliwo omsatsa mulala nomukhasiwe. Bali nende omwana mulala yenyene, omukhana owelira mbu Nonkungu. Nonkungu yali eshiombo shio mwoyo omulayi. Abebusi be bali nibamuyaanza okhushira muno.

Inyanga ndala abebusi bamuruma atsie amenye nende khotsanyene owali omuinda welira mbu Mtonyama. Nyina Nonkungu yanaba eshibungui shietswani indayi nende omukoye, nefiuma nende fifungo. Khandi nomuimira eshima eshilayi. Mama namuruma okhutsia wa khotsanyene.

Khunjira Nonkungu yoola khu mwalo. Nakukhalasia khulwokhusena khu machine kasenungwakho. Injerekha womwalo yanyoola omukhana wundi omuraka nafwalire amalasi.

"Otsiaye?" Omukhana oyo namureeba. "Enzia okhucheniha khotsa wanje Mtonyama," Nonkungu nakalusia. "Obulayi, Mtonyama ni khotsa siesi, khandi siesi endi khuluchendo lwo khutsia okhumuchendera," omukhaana oyo naboola. Kho nibalondokhana nibatsia.

Olwa bali nibashiri okhutsia khale, omukhana oyo nabola ari, "Eshibunguyi shishio neshilayi muno, ne khandi eshiuma shishio shimwekha. Nichama rera nicherekho." Kho Nonkungu nafwalula eshibunguyi shishie nende eshiuma naheresia omukhaana oyo.

Ne omukhaana oyo yafwalula amatasi ke niefwala tsingubo tsia Nonkungu. Nonkungu nalola omushira kwo mukhaana oyo. Nonkungu naba nende oburi obunji namanya mbu omukhana oyo khane ni Imbulu.

Nabachenda halala khu fise. "Chama ungalusirie eshibunguyi shianje nende shiuma," Nonkungu naboola. Imbulu nayo niyiboola iri, "Lekha efwalekho okhuula womusaala kulia kuli." Niyechesia omusaala kwali khwitulo.

Olwaboola womusala okwo kwali, Nonkungu nabolera Imbulu, "Chama ungalusirie eshibunguyi shianje nende Eshiuma." "Ndeshera efwalekho busa okhula khu mwalo kulondakho," Imbulu niboola. Nonkungu yali omuri muno, kho nafuchirira.

Olunyuma niboola khumwalo. Khandi, Nonkungu nareeba Imbulu, "Chama ungalusirie eshibunguyi nende Eshiuma."  "Ndeshera efwalekho busa okhula khatsu khalia wabakhanasi balia bekhale," Imbulu niyiboola. Kho nibatsilira no luchendo wabakhasi baali nimeekhale.

Nolwaboola khukhatsu akho niibolera abakhasi abo iri, "Lolakho omukhana wufwalire amatasi uno, yanonderekho busa eshitere eshilamba. Ndikomba abweho." Nonkungu yalola tsisoni tsinyinzi niyerukha niyekhupa munzu niyefisa.

Imbulu niyitsia munzu wa khotsa Mtonyama niyiboola iri, "Nisie omwiwa wo, Nonkungu. Abebusi banje bandumire mbu nditse emenye ninawe."   Mtonyama namwinjisia omukhaana oyo. Ye nende abeinzuye bamusangalira Imbulu. Ne Nonkungu owali bubi nakona mushitwoli ne nakabana nende tsimwa efiakhula.

Mushiteere Nonkungu yatsitsanga mundalo okhwifisa mumatumwa, neeyemba:   Oo! Eshibebeera, eshibeera. Ndarumwa nende papa nende mama okhumenya nende khotsa Mtonyama. Khunjira nembukaana nende Imbulu niyibukula eshibunguyi nende eshiuma. Oo! Eshibebeera, eshibeera.

Inyama ndala mulala khu basiani abu Mtonyama yali nachendanga mundalo nahulira olwimbo olucheni olulayi. Shiyamanya wolwimolo lwaruliranga tawe. Olwayaoola ingo naboolera Mtonyama amkhuwa ako. Bwangu obo Mtonyama naruliramo natsia mundalo omo. Naulira olwimbo olwo nakhaaba okhuula namunyola Nonkungu.

Nonkungu nambolere eshiekholekha shinga Imbulu yabukula tsingubo tsie tsindayi ne niimufwala amatasi ke. Mtonyama namubukula namuyira ingowe namufisa munzu. Mtonyama yananga eshisie yali natsia okhukhola okhutira Imbulu.

Mtonyama yali niaulirambu omushira kwe Imbulu shikunya okhubura khu mabere nikulakhombereko tawe. Kho naboolera abandu be okhuyaba litikho lirambi nende okhutsukhamo amabere amalulu. Kho nalanga abakhaana boosi abolukongo olo khubuyingani bwo khuruma.

Omukhana wali nafwalire eshibunguyi nende esiuma fia Nonkungu yali nende oburi. Shiyeenya okhuruma elitikho elio tawe. Yamanya mbu omushira kwe kulaba nende obulokho bwa mabere. Kho natsia munzu ne nabola omushira khubilikwe obutinyu. Mana natsia mubwikhalobwe wabandi bali.

Buli mulala khubakhaana abo yaruma elitikho elio. Inyuma wabo efise fie Imbulu fiola. Yatema okhuruka hekulu welitikho ne omushira kwe kwabololokha nikumukhwesa nakalukha hasi, hasi, hasi mu mabere amalulu.

Shinga Imbulu yapalapala mumabere amalulu nibabukha litukho elo nomuyeshe nibaiyabilamo. Ne okho nikhwo khwal okhumalilikha khwe Imbulu. Ne Nonkungu yamenya nende khotsanyene nobusangali efise efinji muno muno. Alio niho okhumalilikha khwolukana luno.