Nétií apá, nétií olpáyian ó enkitók enyé. Náa káisinák imeáta tóki. Néata apá nínche enkéráí nabô najî Nonkungu. Náa enkéráí súpat olêng Nonkungu. Náa éíkirotét nínye te oó intóiwúó ényená.

Óre nabô olóng néírriwáa intóiwúó ényená Nonkungu meshómo abaikí olénkapú lenyé kársîs ojî Mtonyama. Óre étôn éítû élô, nékus ng'otonyé. Néripakí enkilâ sídáí oó isaên, néata inkisunkuní ó enkitatí. Néripakí siî isaên lé emúrt. Néírriwáa meshómo enkáng ólénkapú lenyé.

Óre élóítô néínepu oreyíét orúko. Nékedóo isoitó aláng. Nénang'aré te enkoitóí entíto naishopíto isiapírd.

Néíkilíkuan ínâ títo Nonkungu ajokí, "Káji ílóíto?" Néwalikí Nonkungu ajokí, "Kálóíto abaikí olénkapú láí ojî Mtonyama." Néíng'asia inâ titó, néjokí Nonkungu, "Olénkapú láí siî nánú Mtonyama, náa ninyé siî nanú álóíto aparán." Néíriamári pókíra aré.

Óre éítû épúo enéádó, néjokí inâ kíti titó Nonkungu, "Káke sídáí enâ kílâ íno, náa sidaîn siî nínche kuló sáen línonó. Káómón peê kínchó matetemakínoyú." Néítayu Nonkungu enkilâ enyé sídáí ó isaên lenyéna, néísho ínâ kití títo.

Néítayu inâ titó isiapírd lenyéná aibelekény aishóp inkiláni naáíshoó Nonkungu. Nédol Nonkungu entóki naing'ásiayie. Kéáta iná titó olkidong'ói. Néureishóyu Nonkungu. Néyiolóu Nonkungu ajó óre ínâ títo náa Imbulu.

Óre egirá áairiamari áapuo, néjokí Nonkungu Imbulu, "Inchoóki inkiláni áainéí." Káke etawalíkia Imbulu ajokí, "Tápala maishópo omátabaikí lídô shaní." Néut olchaní olákuo otíi enchúmátá ó oloshô.

Óre peê ebaikí oladúóó shaní, néjokí Nonkungu Imbulu, "áaomon túshukokóki enkilâ áí ó isaên láainéí." Néítoki Nonkungu ajokí, "inchoóki matábaiki lídô reyíét peê ááíshó." Óre amû eturéíshie Nonkungu, nényorráa.

Nébaya oreyíét. Néígil Nonkungu ajokí Imbulu, "áaomon túshukokóki enkilâ áí ó isaên láainéí." Néítoki Nonkungu ajokí, "inchoóki matábaiki ídía ají natíi inkítuaak náatoní peê ááíshó." Nényorráa Nonkungu.

Óre peê ebaikí enadúóó ají, néíponyáa Imbulu Nonkungu. Néjokí inkitúaak naátoní te embatá é enkají, "eng'urá enâ títo oó isiapírd náatusujúá endáma pookí. Éntiaakí peê áaló aing'uá." Nékurru Nonkungu. Néírut olêng. Néísik aisudorí te olpaashíé.

Nébaya Imbulu enkáng e Mtonyama. Néjokí, "kárá nanú enkúyiaâ inó najî Nonkungu. Áairriwutúa intóiwúó áainéí peê alotú aparán intáí." Néítoómon Mtonyama ínâ kití títo te olmaréí lénye, nébik te enchípai. Káke einosíta Nonkungu osína te ong'atá. Enkají oó ildíein éírrag, nénya endáa oó ildíein.

Óre dáma, nélo Nonkungu aisudorí te átua entîm, nérany ajó: Óooi, entolût najî nánú. Áairriwúá pápá o yieyío peê alotú aparán olénkapú láí Mtonyama. Óre te enkoitóí, nánáng'are Imbulu. Néya enkilâ áí ó isaên láainéí. Ói, entolût najî nánú, Ói, entolût najî nánú.

Óre nabô olóng egirá olálashe lé Mtonyama amanaá te ong'atá, néning osínkólio lé enking'asíá sídáí. Néítu eyiolóu eneing'úa. Óre peê ebayá áng, nélikí Mtonyama énéjô ilô sinkólio. Nédumúnye Mtonyama aló óng'átá ainining'ú ílô sínkólio. Néíng'oru eneing'úa omenóto.

Nétum Nonkungu érányítâ. Néínosáki Nonkungu enataáse. Eneikunáyie Imbulu enkilâ enyé ó isaên lenyéna ó enaikuná peê etung'ueikíá isiapírd. Nérik Mtonyama Nonkungu áng. Néísudóo te enkáji mijooní. Néíng'oru enaikó tenéíbung Imbulu.

Néning Mtonyama ajó kényor iló kídong'ói lé Imbulu kulé olêng. Némégíróo kulé éítû éôk inkutî. Néjokí Mtonyama iltúng'áná peê étûr engúmótó nagút. Néíput ínâ gúmótó kulé naáotô. Néípot intóyie pookí é enkanasâ peê eponú enkésha. Némira te enkiidatá é ínâ gúmótó.

Nényamalú Imbulu naléng. Méyíéú nínye néid ínâ gúmótó amû kéyíólo ajó kétir ílô kidong'ói lenyé enkúre é kulé naáotô. Néjing enkají, néen ílô kidong'ói lenyé akurrakí osésen peê méítóki aisiong'á. Néípang taá aló enetíi inkúlie.

Néíloikíno intóyíe áaid engúmótó. Nébau enkatá é Imbulu. Nényok naléng ajó áid engúmótó. Káke etalée olkídong'ói lénye. Néyietáa metádoi abóri. Néyietáa ometábaikí atúa engúmótó enetíi kúle náaotô.

Óre egirá Imbulu aekenyá te átua engúmótó, te átua kulé naáotô, nénuk iléwâ engúmótó te osinyáí. Néturorí Imbulu. Néboita Nonkungu ó olénkapú lenyé inkólongi kúmok. Néíting enkátiní.