Odongo ni Apiyo baaviranga mu kibuga ni bbaabba ghaibwe. Ekiwuumuli bwe kyatuuka baalinga emberi beetaaga okuja okuwuumula ti lwakubanga amasomero gaali gaigeiregho, aye baali benda kuja kukyaliraku dhaadha ghaibwe omukazi mu kyalo ekyali kirinaine oguyandha ogubba nga gulimu n'ebyenhandha.

Odongo ni Apyo baali basanhufu kuba guno gwali mulundi gundi ogw'okukyaliraku dhaadha ghaibwe. Baategeka ensagho dhaibwe okwetegekera olugendo olunaku olwairaku.Olunaku olwo ezira kw'abo eyalambaala kuba baasula nga baghaya ku kiwuumulo obwire bwonabwona.

Munco baatambuliragho okwolekera ekyalo mu motoka ya bbaabba ghaibwe. Baabita mu nsozi,mu nsolo edhendawulo ni mu nimiro edh'amajaani eno bwe babala motoka kw'oteire n'okwemba enhembo.

Oluvainhuma, abaana bano baakoowa baamala baalambaala.

Bbaabba yabasitula nga batuuse mu kyalo. Baayagaanayo Nyar-kanyada dhaadha ghaibwe omukaire eyali yeewuumuliire mu muti. Mu lulimi lwaibwe, eriina Nyar- kanyada litegeeza mughala w'abantu ba kanyada kuba yali mukazi ow'ekighago atenga mulungi inho.

Nyar-kanyada yabasangaaza mu nhumba. Yeetoloola enhumba nga akina eno bw'ayemba. Baidhukulube baali basanhufu inho baamugha ebirabo byebaali bamuleeteire okuva mu kibuga.''sooka osimulule ekyange," Odongo bweyakoba. Apiyo yeena yaamukoba ati "mbe sooka osimulule ekyange."

Oluvainhuma Nyar-kanyada yasimulula ebirabo yaagha baidhukulu omukisa okuva mu by'obughangwa bwaibwe.

Agho ni Odongo ni Apiyo baafuluma ku luya okubinga ebighoigholo n'ebinhoni.

Baaniina emiti baagwa mu maadhi ag'enhandha.

Obwire bwe bwaziba, baila waka okunhwaku ka caayi ak'olweigulo igulo. Bainhama okughongera nga n'okulya eky'eigulo bakaali.

Enkeera, bbaabba wa baana bano yavuga motokaye okwirayo mu kibuga yaabalekera Nyar-kanyada dhaadha ghaibwe.

Odongo ni Apiyo baayambanga dhaadha ghaibwe emirimo egy'awaka nga kuja maadhi, okugherera enku, okulonda amagi ag'enkoko n'okunoga eiva okuva mu nimiro.

Nyar-kanyada yasomesa baidhukulube okugoya bbando okuliisa n'eiva ery'emenba n'eisoga erifumbiibwa empola mu seepiki ensndikire. Yabooleka engeri ey'okukola omutyere okuva mu kooko okuliisa engege enkalirire.

Lulala kunco, Odongo yatwala ente dha dhaadha ghaibwe okulya. Ente dhino dhaalumukira kigo kya mulinaanwa. Omwayi yali muniivu n'Odongo. Omwayi ono yeegherera Odongo ati akumye ente kuba dhiriire ebirime. Olunaku welwaja, omulenzi pno yakolanga bwekisoboka okubona nga ente tidhireeta buzibu.

Olunaku olundi, abaana bano baaja mu katale ni dhaadha ghabwe Nyar-kanyada okumutundiraku eiva eisoga,sukaali ni sabbuuni. Apiyo yanhumirwanga inho okukoba ba kaasitoma emiwendo egy'esente nga bagula ebintu ate Odongo ye nga anhumirwa kubateeranga mu buveera.

Ku nkomerero y'olunaku, baanhwera caayi ghalala. Baayamba dhaadha ghaibwe okubala esente dheyafuna.

Ekiwuumulo kyawaaku era abaana bano baali bali n'okwirayo mi kibuga.Nyar-kanyada yagha Odongo enkofiira ate Apiyo yaamugha omudoozi era yaabategekera emere ey'okulya.

Bbaabba ghaibwe weyaira okubanona, baali tibenda kwirayo mu kibuga era beegayirira Nyar-kanyada baje naye. Nyar-kanyada yataaku akamwenumwenu yaakoba "Ndi mukaire inho okuba mu kibuga. Kale n'olw'ekyo nda kubalindiranga eno okwidha okunkyalira."

Odongo ni Apiyo baagha dhaadha ghaibwe akafumito baamunwegera era baamukubira ka bbaayi.

Odongo ni Apiyo we bairayo kwisomero bainhama okughayiraku mikwano gyaibwe ebyali mu kyalo kuba abaana abandi baali baidhi bati obulamu obulungi busimuka mu bibuga byonka abandi baaloghooza bati buba mu byalo.Aye abangi kw'abo baabona nga Odongo ni Apiyo ni dhaadha ghaibwe ow'ebyewuunhio.