Eira einho, ghaaligho epusi engezi n'embwa endagadu.

Epusi engezi yaviiranga mu maka amakombe einho. Embwa endagadu nga eba ku luguudo era nga endhala egiruma inho.

Wambwa nga yeenayeena aswakiire yabuuza Pusi ati, "Kisoboka kitya aboomumaka amakombe okukuganha n'oba mu ndhu yaibwe?"

Pusi omugezi yairamu ati, "Mba ghalala n'abantu kubanga ndi muyondho, era bwenja obubi mbuziika mwitaka. Bwenenda okulya nsaba emere nti, miyaawu."

Wambwa yabuuza ati, "Bwendikola zeena ntyo, balinganha okuba mu ndhu yaibwe?"

Pusi yairamu ati, "Yii, kola nga bwenkukobye baidha kukuganha. Era baidha kukughanga n'emere."

Wambwa omudagadu yaakoba ati, "Olwa leero tiidha kukukola kabi."

Agho Pusi yaatuumagho nga ali kukoba ati, "Ha, abuzeeku katono okungemya ku mukuzi guno. Tyenda twagaanane kabiri mukuzi gundi."

Nga ajiira ku magezi Pusi geyamugha, Wambwa omudagadu yaja ku lwigi olw'endhu ndala yaatoolera okuboigola n'amaani.

Beene ndhu baidha na luswanhu baamuswanhula.

Agho Wambwa omudagadu yaaleekaana ati, "Pusi nantendeire! Bwenaamugemyaku ndidha kumulya bulye."

Pusi bweyali azaanhira kuliya okw'endhuuye, Wambwa yaamuswankula.

Yaamukoba ati, "Ku mukuzi gule wantendera. Wankoba nje mboigokere ku lwigi lwendhu yoonayoona yembona. Beene yo bankuba. Buti ndi kuja kukulya."

Pusi omugezi yairamu ati, "Wambwa, mpulirisa. Oghanga okundya, aye leka nzaanheku katono kati meemale, nga zeena bwensooka ni ndeka empube okuzaanhaku nga nkaali kugirya."

Wambwa yaabuuza ati, "Empube ezaanha etya?"

Pusi yamwiramu ati, "Mba oti ngireka, naagikoba ebale ndala okutuuka ku isatu. Empube bweba eri kubala, ng'olwo ngiswankula."

Wambwa omudagadu yalekula Pusi era yaamukoba abale okuva ku ndala okutuuka ku isatu.

Pusi omugezi yeibagho yaaniina omuti.

Wambwa yaamukoba ati, "Ika okuva ku muti obale okutuuka ku isatu."

Pusi omugezi yairamu ati, "Wambwa wulirisa, toja kwirayo kunfuna. Tiri mudagadu.

Oghanga okubala okuva ku ndala okutuuka ku kikumi, ku lukumi, oba ku kakaire, aye toja kwiramu kunfuna."