Nĩkalaa ndũanĩ ya Kakuma, vandũ vavyũ, ve mĩw'a mbiingĩ na mbũĩ mbiingĩ kwĩ andũ.

Ona ndũnyũ ĩthĩwaa ĩngilu na tũtuka nĩ tũnini.

Andũ maingĩ matũmĩa kĩsululu kũthi kũndũ kũndũ.

Mũthenya ũmwe mwaitũ nĩwambĩtie na asya, "Mĩtambo, ũmũnthĩ nũkũvikya mĩaka thanzatũ. Twĩna mũthĩnzĩo waku." Nĩnakũlilye, "Nĩ mũthĩnzĩo mwaũ? Nĩ mũthĩnzĩo mwaũ?"

"Ũnĩ nĩtũkathi ndũnyũ Endoleti na tũkathi naku," mwaitũ nĩwasũngĩie. Mũthenya wakwa wa mbee wakũthi taũni! Nena ũtanu mwiingĩ ndyakoma ũtukũ ũsu.

Mũthenya ũla watĩĩe nĩnongamie katĩkatĩ wa mwaitũ na mwĩĩtuinya nĩkĩte sulualĩ wa nginisi wa mbuluu na tii sati ndune.

Nĩnew'ie nĩ kamũndũ kanini nũngamĩte katĩkatĩ wa mwaitũ mũtheke mũasa na mwĩĩtuinya mũnene mũno na mũnou.

Mbasi embũsũu kwou nĩnekalĩle mwaitũ.

Nũndũ wa ũvyũvu mwiingĩ na mũyo mũvĩtũku nĩnakwatiwe nĩ mĩnoo na nakoma nzĩanĩ ĩsu yonthe.

Ndyaona kĩndũ.

Twavikie Endoleti sua ĩkuma. Mwangonĩ kwaĩna kĩveti kyatesaa masungwa.

Ngalĩ ĩmwe kwaĩ aũme elĩ malanasya makwasĩ moo nthĩ.

Ngalĩ ĩngĩ kwaĩ kĩveti kĩkuvĩ kyakwete ndeke yakengaa. "Mwaitũ, mwaitũ, ona ndeke ĩla!"

Katĩ wa ndũnyũ kwaĩna kĩvanda kĩnene kyatesaa mĩthemba mbiingĩ ya matunda angĩ nde naona.
"Matunda aa metawa ata?" nĩnakũlilye mwaitu.

Nĩwolotile amwe na asya, "Aa nĩ masungwa na aa nĩ mavela. Nĩnalyũkile na nasya, "Namo aa?"

Katĩka matunda onthe nendie avoo kũsinda angĩ. Nendie mũmbĩle na langi wa mo. Nĩnolanĩlw'aa nũndũ matonya kwĩthĩwa mesama.

Nĩnalyũkĩĩle mwaitũ na namũkũlya, "Nũtonya kũnzoea avoo ĩmwe?"

Amina kũnzoea avoo nĩnalekilye kwoko kwake na nakwata ĩtunda na moko monthe na nayũma.

Ndyaĩĩ naya ĩtunda na mũyo wana ou ĩngĩ. Kĩndũ kĩla naĩna vata nakyo saa isu nĩ avoo yakwa.

Namina kũya avoo yakwa nĩnendie kũnene na mwaitũ ĩndĩ ndyamwona. Nĩnasisisye ngalĩ ĩla twaumĩte ĩndĩ ndyaona mwaitũ na mwĩĩtuinya.

Nĩnasisisye ngalĩ ya kwoko kwa aũme, na nasisya ngalĩ ya kwoko kwa aka ĩndĩ ndyamona.

"Nĩmwambonea mwaitũ?" Nĩnakũlilye iveti ila syaĩ vau vakuvĩ syĩkũta maluu ĩndĩ syĩangwatĩĩa.

Nĩnanzĩe kũĩa.

Ĩvinda ĩnini yathela kĩveti kĩmwe nĩkyangwatie kwoko na kyandwaa vandũ vaĩ na syana ingĩ.

Mũndũũme mũnene waĩna kĩng'ee kĩthungu nĩwangũlilye, "Wĩtawa ata kavĩsĩ?"

"Mĩtambo," nĩnasũngĩie nendee kwĩtĩkya methoi.

Nĩnolanĩlwe kana syana nasyo nitesawa soko. Nĩnekie kũĩa na nathyũka nĩsisye kana ve mũndũ ũkũthooa syana vau lumunĩ.

Kavinda kanini mũndũ mũka ũmwe nĩwokie na osa kana kamwe athi nako. "Yu ninyie natĩe kwoswa na ĩndĩ ndikesa kwĩnũka ĩngĩ," nĩna sũanĩĩe na nanzĩa kũĩa ĩngĩ.

Ĩla new'ie wasya wa ũla mũndũũme mũnene waĩna kĩng'ee kĩthungu akwasya, "Mĩtambo eva?" nĩnaendee kũĩa ĩnene.

"Nyie ndikwenda kũthi naku," nĩnaisye ngũĩa na nasemba kuma vala ve mũndũ ũsu.

Ĩla mwaitũ na mwĩĩtuinya mew'ie ĩsyĩtwa yakwa nĩmasembie lumunĩ ĩsu.

"Mĩtambo! Mĩtambo!" wasya nĩsĩ nĩwetanie nanethĩie kana nĩ mwaitũ.

Nĩnekumbatĩle mwaitũ Na mwĩĩtuinya asya, "Mĩtambo twĩkũmanzaa tũkũnenge mũthĩnzĩo wa ĩsyawa yaku."

Nĩwaumisye ndeke ya mbuluu ĩkũkengakenga mũvukonĩ. "Ĩĩ nĩ yaku," nĩwaisye.