Kolong angorot anadakar a Silaa alomito ekile ka aberu keng ka ikoku kech ning'oror, Khayanga. Na anang'ia Khayanga ng'ikaru ng'itomon, abu apakeng todekakin nabo totwan. Adaunet a ng'ikaru a ng'iarei, abu itiokeng totwan. Apotu lukaalak tonupa atamar aria apipiul a akitu a ekile keng aari ng'esi.

Aponi Khayanga kimiekinae bon anakwapit. Abu nayenet keng na anikalonon, Rosa tolema ng'esi na kaneni apotu kiboyoto eboyor lo a eboot ka akokianut.

Apei kwaar abu Khayanga tolot akilakin aliel a itiokeng ka apakeng sodi alimokin kesi kidiama eboyor keng lo akiyalolong. Abu tosipok kwap akikap na ewokit ng'esi kigoro, tama ng'esi: Apa, aluwae iyei iyong? Ito, aluwae iyei iyong? Kimiekinete esi ayong akokianit. Aluwae iyakasi esi?

Na arumoria Khayanga ekian, abu king'olik etwo loebusean lopening'olikina kache. Apuduni etwo alokiding aliel ka apakeng ka itiokeng.

Abu Khayanga kimiek akigoro. Abu kiira eos ebunit alotwo. Arai lokamayan. Aeo etwo kona.

Khayanga, ee, Khayanga! Ikoku kosi nikiminae! Niyei iyong bon lokiminae! Toting etwo lo lokiminae! Kiwok wadaang ni ilosi iyong lokiminae! Kimie ng'esi kisililing iyong lokiminae!

Akisiakin akolong'it ng'ina, ewokonori Khayanga etwo ng'olo wadaang ni alosi ng'esi. Ewanakini ni aperi ng'esi, anyounete ka ng'esi nabo ewasene ng'esi akimet. Nacha daang na alosio ng'esi nang'olol, ewokene ng'esi kotere akigagaar ng'esi anaronis a ng'akipi. Nachapewokia ng'esi etwo, eyalolong'ene ng'esi. Akolong'it cha daang na ewokenea ng'esi etwo, etamuni itiokeng ka apakeng nabo eiranari ng'esi niajokon.

Akwaar apei, abu tolot nang'olol aokun ng'akipi. Na akudokinor ng'esi, abu tochurutar. Abu Kikam etwo sodi nimasar, na kaneni abu tanang amoru nabo kielelar toliwor ng'ikabel. Abu etau keng tosuroi.

Abu loge tokudokin nabo kirap ng'ikabel. Abu toting kesi ang'akan keng nabo toeok:.

Apa ka ito, King'olikisi abwang'a etwo. Etwo lokolong kinakinete esi ayong. Nyo asubakini ayong, apa ka ito? Topatanaketa kidodikis ayong emachar, Atamar eroko esi irukito ka ayong.

Na anyouno Khayanga kidiama, abu kiira etoil lo ikoni lo a itiokeng ebala: Ikoku kosi; Kidepu ng'ikabel lu idong'ito. Toloma nakipi ka kesi. Towoku ng'akipi kotere kesi nabo kilota ng'akejen kon Na irumoria iyong akilota, togol ng'akonyen kon. Abu Khayanga tosubak loger lo alimokinitere. Na etenaror ng'esi, abu kiira ng'ikabel elose anakan keng nabo tochunakinos nabo tosubakis etwo eche.

Abu tolema etwo nabo toting anatorob keng nabo tolakar. Abu Khayanga torubak iwokit etwo wadaang ni alosi ng'esi. Wadaaang ni etorit ng'esi, apotu ng'itung'a totalaros nabo king'itas, "Erai mono etwo lo ekainyo?" Pe eng'olikinito kesi etwo lo ikoni neni nakanuan.

Na cha daang nang'opikinia Khayanga ibore, edodenakini ng'itung'a etwo keng anadakar nabo ainanakinete ng'esi ibore cha daang ni asaki ng'esi.