Olwolire ng'ebaayo hu hyalo hy'e Bubali omusaaja n'omuhasi wuwe ko n'omwana wawe mulala ni bamulanga baati Namudira. Namudira ni gaali ko n'aŋesa emyaha ehumi, semwana galwala gafa. Olufanyuma lw'emyaha ebiiri, nyina yeesi gafa. Abaatu bangi balowosa baati butahi wa wamwe nj'obwamwita.

Kale nga Namudira asigala hu hyalo yeŋene. Omuhasi omusahulu oyu balanganga baati Rosa atenga mwafu ehihena ng'amuŋambirwa ehisa amuŋira aje amuhuume.

Namudira gateranga ohutiina hu magombe ga semwana ni nyina abalirire obutahi.

Lulala ni gatiina hu magombe gafunayo ehirabo. Ehirabo ehyo hyali hita ehyene ehiŋoono ehyahuhuduha ohuŋwa ŋagati w'amagombe.

Nga Namudira aŋulira olwembo oluhenaho obutahi ni luŋwera mu hita. Ejanjaasi ly'owemba lyali hy'erya nyina. Olwembo lwali lwemba luuti.

"Namudira ee, Namudira! Sooli weŋene nabuhoda omulala! Mwana wange omuhoda omulala! Ŋamba ehita hino omuhoda omulala! Gendanga ni nahyo hiisi eyi oja, omuhoda omulala! Hihutusengaho obutahi omuhoda omulala!"

Namudira gabugula ehita ng'atiina ni nahyo. Era ohuŋwa hulwo nga Namudira atiinanga n'ehita ehyo hiisi eyi gajanga ni himuhenaho obutahi.

Naye lulala ehigosi hyola hu hita hihye. Ni gaali n'ajiiye amaaji ehita hyamweŋunula nga higwa hwibale hyadiha.

Ng'aŋo Namudira ahotama asolosa ebijo by'ehita abiŋimba ŋalala atagiha ohwemba ati.

"Bbaabba ni maama, mubone ehita himbwagihiremo. Ehita ehimwapaye. Kolehi, maama ni bbaabba? Mube b'ehisa mundage ehiraga ti muhiri ni nange."

Ng'aŋo Namudira aŋulira ejanjaasi lya nyina ni riroma liiti, "Mwana wefe. Yangala obutundu obwo obusigayeŋo oje odaŋiremo amaaji osaabe amagulu ohene olimbirire." Nga Namudira ahola ng'olu bamuloma. Gali alimbula obujo bw'ehita bwebbotiremo ehita ehindi.

Nga Namudira geyongera ohutiinanga n'ehita ehyo hiisi eyi gajanga. Hiisi aŋagabiitanga, abaatu beŋunyanga era ni bebuusa amahulu g'ehita ehyo. Ehita ehyo ehyamaliholiho hyafunisanga Namudira hiisi ehi gendanga.

Ehita ehyo hyaŋanga Namudiira emirembe era olu gabanga ni nahyo gamanyanga ati abasaaye babe bali ni naye bamuhuumire.