Nalenale okwa li okakadona kedina Kalabushe.

Kalabushe okwa li okaana keendovo dihapu. Ina okwa kala noku mu kunghilila aha popyaane vali ndele kashi li dule.

Inakulu yaKalabushe okwa li ha di konima yokamufitu ke li oshinano okudja momukunda wavo.

Fikulimwe inakulu okwa ombokelwa. Ka pa li nee ou te mu file oshisho shaasho okwali meumbo oye aeke.

Ina yaKalabushe okwa pita noku uhala ta limi. Komatango eshi a dimbuka, okwa pa Kalabushe oikulya a twaalele inakulu.

Mondjila, Kalubushe okwa shakena naSinson. Sinson okwa li shimbungu a shituka omunhu.

Sinson okwa pula Kalabushe ta ti, "Oshike osho u kwete?" Kalabushe okwa nyamukula ta ti, "Ondi kwete ombelela, omayi nomashini."

Ina yaKalabushe okwe mukunghilila a ha popye eshi e kwete.

Kalabushe okwa wedako ta ti, "Ohandi twaalele meekulu oikulya shaashi ota ehema." Sinson okwa tameka nokuli te li lafa komulungu eshi ta dilaadila ombelela ei i kwetiwe kuKalabushe.

Sinson okwa lotoka divadiva a fike tete keumbo lainakulu yaKalabushe.

Yee ota pona po nokuli inakulu yaKalabushe osho, ndee te li tuvikile moikumbafa yaye.

Eshi Kalabushe a fika, meumbo omwa tya tuu filu. Ta i meni, yee ta ifana, "Meekulu, ouli peni?"

A li oku ufana inakulu ita nyamukula. Eshi a ya mondjuwo ya inakulu okwa hangamo omunhu e li tuvikila nekumbafa la kula.

"Meekulu, hano oshike omatwi oye makula ngaho?" Kalabushe ta pula.

"Opo ndi ku ude nawa mutekulu wange." Sinson ta nyamukula e li koshi yekumbafa.

"Meekulu, hano oshike omesho oye makula ngaho?" Kalabushe ta twikile nomapulo.

"Opo ndi ku mone nawa mutekulu wange." Sinson osho a nyamukula.

"Meekulu, hano oshike okanya koye kakula ngaho?" Kalabushe ta pula.

"Opo ndi ku lye po!" Sinson osho a nyamuluka, ndele ta nukile Kalabushe noku mu pona po.

Kalabushe okwa twilikila natango oku popya eshi e li medimo laSinson. Ta pula omapulo mahapu.

Sinson osho a ka loloka epopyaano laKalabushe ndele te va fiya mo voo nainakulu.

Kalabushe nainakulu ova kufwa po kovashiinda ve va findikile keumbo.

Nokudja opo Kalabushe i ha popi tuu vali novanhu e he va shii tuu nande.