"Diri oduko aria anyu ma angu ecepi bani omvele traatraa pini mva nyufi be tu bani omve Oguzu beri. O`du alu, Oguzu ni ovu ria doria asea `dale, eri aria traatraa ru ri ma o`duko. Oguzu ma tusu e`do ra egata anyu kalikali ri ma dria risi. Sopa ra, eri o`duko niri kilili, e`do eri nda kpere esu aria gakanyaa ru ri pati sia ima drilekoa oru. "Ciriciriciri-ciriciriciri-ciriciriciri" aria gakanyaru ri ri wu eri ni ngaria pati ndu 'diyi ma dria. Ciriciriciri ciriciriciri ciriciriciri mu drile aria ma o'duko o'bitaa be, sopa paale karakarau nezu kilili kini oguzu obi ima vuti ra."

After half an hour, they reached a huge wild fig tree. Ngede hopped about madly among the branches. He then settled on one branch and cocked his head at Gingile as if to say, "Here it is! Come now! What is taking you so long?" Gingile couldn't see any bees from under the tree, but he trusted Ngede.

Saa azini miniti kali na ru `dile ni ma vutia, ca ki elio pati azi ni amboru ni vu. Traa traa e`do di ombu badaka ru pati ma sia si. Mu di ari ku arakala azi aluni ma sia ra ela di ima dri Oguzu ni nezu kile te `ye `yozu eri ni"eri `do `I! Mi emu di! A`di ni mi saa eza ni yaa?" Afa azi Oguzu ni eco ne pari erini ovuzu ria ra ni yo, te ni aria anyu ma angu e`dapi ri ma okpo anyu jorovu oso be tretre ri esuzuri ra.

Oguzu ku i vile nyafe dori ni `diyi ku pati etia `daa. Tra di eja nyiri aci were ni eduzu. Aci ka mu di kilili `bo, oguzu su kali azini azini ezu ni aci `da ma agadria `daa. Eja `di ma azi ndra tutuni acika ofuzu eri ni veria. Ka mu ne kilili kini eri di ve `dini `bo, e`do di tu pati sia `dale, pati nde ma etile aci kokoru ri be ima tilea.

Sawa ezakoko ru e`do anyu angapi `diyini ma o'duko iri. Azi 'diyi fi gule pati atrakaa 'di ma alia, azi 'diyi efu ania ri si amve. Ka mu ca gule vu `bo, su kali ma si aci be ri gule alia `dale coti coti. Anyu efu dria enzu ruu amve`dole omba pie. Denga apa woro ku, azi 'diyi odu eri raka.

Yi ma pari ka mu efu amve `bo, Oguzu su ima dri gule ma alia `dale, enze anyu ma zunguruku dria tre tre, anyu oso be ciriciri. Ga anyu i odupi were were `dayi ma azo ekaka ko si. Osu anyu ma zunguruku `dayi e`yere jurua ini su i ma ombelea azini agatia `diyi ma alia. Gule ka di mu ace pirini `bo, Oguzu esi di e`yere pati ma etia ele `dole.

Traa traa ne e`yo yi `yepi `diyi dria asi `baza be. Rua ni ri ya kpakpa, sawa Oguzu ni cazu pati etia ele `dale anyu ma zunguruku kuzu pati etia `daa alu awa`difo ru ri tee. Traatraa le oku anyu ma o`bu osoru `diyi zunguruku niri be tu. E`do ombu arakala aluri ma sia risi azini ria `dini `dini kpere nyaku vu ele `doa. Asizu, Oguzu ca di nyaku dria vaa `dale ra. Traatraa saa ri oni azini ngala`baa ni ma dria nyakua `dale esele ivilealeru ri tezu.

Te Oguzu anyu aci ra, e`du i vile nyafe yi dri kozu mvizu akua, gbu aria gakanyaru ri ku kala si. Traatraa wu o`duko eri vile oku `bani ni lera ri si. Saa Oguzu ma drilia azini ri oni azi eri ma drilia ni ma dria. `Daa ne di agupi `da milia miliadika tre di vini o`duko oru si kini, `BA AGAPI niriii! BA AGAPI niriii. Oguzu so pa, ne aria gaa ru ri ni ra gu o`duko si. "I le drini ayipi vaa ri `i `dini ice, ma agyi? Ha ha! A`di nga te azi niri dria ni azini anyu odu te a`di `i? Ama anyu oso aluza `di awa mi be a`di e`yo si, afa efile koko `di? Ida mi ra imu afa azi ni nda nya ondre ta ru `i." Ka mu dri ji oli alia si eri dro zu `bo, Oguzu ko di dri mu i vile akua. Awoko nya traatraa ni tu! Agu `di eco e`yo oku `i `ye pi a`bia drio `dile ri idera azini ga awa`difo feko si ngoni ngoni! Te traatraa ma okpo ndra yo `dini ku. Eri nga mu e`yo ini le ri `ye ra!

O`du alu sabiti tre ma vutia, Oguzu eri vini omveta traatraa ni `ba omvezu anyu vu ri. Ka mu anyu ndra ini nzu asi zu ri ma aji alu za ri ma dria e`yo ega `bo, Oguzu e`do aria gakanyaa ru ri ma vuti bi dika. Erini angu jere ma kona ru ri aga zu `bo ri ma vutia, traa traa ku di geri oku ini `ba omve zu "ciriciriciri-ciriciriciri-ciriciriciri" ri ra emu di ri ava li pati azini daru oci be ni ma etia. "Ahaa" Oguzu ega. 'Le turu ma ovu di pati `di ma sia.' Mbeleru edu aci ra e`do di tu pati `da ma sia, kali aci be ri pie ima tia. Traatraa ri lu eri ne ne.

Oguzu ni turia, ri di osu `i eri andruni anyu ma nota oku rile ri ku a`disi ya ri. "Gule niri kani di pati ma talaa alia `dale ya ani," ega ima asia. Erini di tuni ava `bazu turia azini orobi anyu aluza ri vile ri drozu eri obisi ria, fu dri milia milia o`du azini be. O`du e`yokokoru `da ri de ini ima ava etu si ri li pati erini lele tu ri ma sia, ande erini enga zu za ndazu ini ra `bo ri ma vutia, esu lulu gaza azini okporu ni enga `i o`dua risi `bo. Okorisi o`du aya gbadridri ra `dama vutia awoko nya eri `bani eri engazu o`dua risi tu. Esi ima mile lurua, zi ima ti wala ima si `wara azini cipi aci aci `diyi e`dazu ra coti zo agu pi `da ma dria andreti ni `yazu onyofi si.

Oguzu ari ru esizu pati `da ma sia risi vaa `dole kile eri `ye e`de e`de le ngoni le. E`de di ku kucu vaa `da ra onyo ima falako karakara. Eri ma drileba ri di lu o`du ni andezu kayi ra eri ni ecozu nzuzu vuti ni si ku ri `i. Te `da ma talasi, Oguzu nzu ongu eri ma foloko onyopi ra `dayini eco nzu ri. E`dozu `dasi kpere andru nyi`biliko o`du ni ndra eri ma andreti ovi zu ri awi nga kiri eri ma andretia ci. Traatraa nga di oku arioti i vile ri ofe ra. Dika Oguzu asi di oku aria anyu ma angu e`dapi ri ma vuti obiza si o`du `dasi.

Te anzi oguzu vile `diyi eri ma anzi ma anzipi yi be eri o`duko traa traa ma dria ri ra ani fe ndra eri ni inzita tu. Sawa dria yini muzu anyu nzuzu ri ma alia, yi ne kilili kini yi ku anyu ma horongoto ambo ndeni azini oso be coro ri ku traatraa dri.