Leo ni siku kubwa! Baada ya kusubiri kwa miezi 9, mamake Taby anaenda hospitalini kujifungua mtoto. Atarudi baada ya siku tatu.

Unaweza kusoma tarehe na siku hiyo kwenye kalenda? Itakuwa tarehe gani mamake Taby atakaporudi nyumbani?

"Kwaheri mpendwa!" Mamake Taby anasema. "Tafadhali, msaidie babako. Nitarudi nyumbani hivi karibuni nikiwa na zawadi itakayotushangaza sote!"

Mtoto aliye tumboni kwa mama amekua mkubwa sana. Taby hawezi kumkumbatia mamake kama ilivyokuwa hapo mbeleni.

Dereva wa teksi anapiga honi. Wakati umefika wa mama kuondoka. Taby anaanza kulia. Babake anambeba mabegani kwake. Taby hupenda kuwa juu kama alivyo sasa. Sasa yeye ni mrefu kumliko babake.

Ikiwa urefu wa babake Taby ni sentimita 160, je, sasa Taby yuko umbali gani kutoka chini?

Muda mfupi baadaye, Taby anaanza kulia tena. Hii itakuwa mara ya kwanza kabisa kwa Taby na mamake kutengana.

Babake Taby anamweka kwenye kiti kilicho mbele yake. Anamfuta machozi kisha anamzungumzia polepole kumfariji.

Anapokuwa amesimama kwenye kiti, Taby anafurahi tena. "Nina umri wa miaka 6! Mimi sasa ni msichana mkubwa!" Taby anasema. Anaposimama kitini kama alivyo sasa, Taby anakuwa mrefu kama babake alivyo.

Je, unakumbuka urefu wa babake? Je, Taby ni mrefu kiasi gani anaposimama sakafuni?

Taby atasubiri tu siku tatu kuanzia Jumatano hadi Jamamosi, lakini kwake ni kama miaka. Anajaribu kuhesabu saa ambazo atalazimika kusubiri.

Anajua kuwa kuna saa 24 kwa siku, kwa hivyo anajiambia, "24 ­+ 24 + 24 ni­­­______."

Unajua jawabu?

Taby anasema, "Baba, nilidhani kwamba mimi ni mtoto wako! Hivyo ndivyo unavyoniita. Itakuwaje sasa? Je, nitakoma kuwa mtoto wako?"

Babake anamwambia, "Wewe ni mtoto wetu wa kwanza wa pekee. Na hivyo ndivyo utakuwa wakati wote."

Baba anajibu maswali mengi kuhusu mtoto mpya. Kisha anapata wazao. "Mbona usimwandikie mama barua? Unaweza kumwelezea vile unavyomkosa na kumwuliza maswali kuhusu mtoto atakayezaliwa."

"Ningependa sana kufanya hivyo, baba. Utanisaidia kuandika?" Taby anamwambia babake.

Baada ya chakula cha mchana, baba anamsaidia Taby kumwandikia mamake barua. Isome barua aliyoiandika Taby:

Kwa Mama, Ninakupenda na ninakukosa sana! Baba anasema kuwa utarudi nyumbani Jumamosi. Nina hamu ya kukuona wewe na mtoto. Nina maswali mengi sana. Mtoto wetu mpya ni mvulana au msichana? Atanifanana? Je, ataanza lini kutembea au kuzungumza?

Upendo kutoka kwa Taby, binti yako mkubwa.

Anapomaliza kuandika barua yake, Taby anaanza kuota.

Kisha anafikiri, "Labda watakuwa watoto wawili. Labda, watakuwa mapacha kama baadhi ya marafiki zangu." Taby anafikiria juu ya Zubeda na Brenda, dada mapacha wanaofanana kabisa.

"Mapacha wetu wanaweza kuwa wa aina gani?" anaendelea kuwaza.

Siku iliyosubiriwa kwa hamu, inafika na Taby anasisimkwa sana. Alikuwa amesubiri kwa siku tatu, au saa 72, lakini ilikuwa kama miezi mingi tangu mamake alipoenda hospitalini.

Wamesubiri miezi 9 kwa mtoto kua tumboni mwa mamake. Taby anahesabu miezi kurudi nyuma, "Aprili mpaka Machi, ni mwezi 1, hadi Februari ni miezi…"

Hesabu kurudi nyuma ili upate mwezi hasa mtoto alipoanza kua tomboni mwa mama.

Taby anawasikia wazazi wake wakiwa mlangoni. Anakimya akitaka kuwashangaza.

Lakini, yeye ndiye anayeshangazwa. Mamake alikuwa amekuja nyumbani na mapacha! Taby sasa amepata dada na ndugu!