Document

Mesi wùn a Ancèkùné

Merga Debelo

Jacob Kono

Yi-iì dzə̀ fó yàŋgùʼ, a mesi wùn ancèkùné dzə̀ ŋkar si. Áwune lo á wàa lìm lim yév e kintatì, e kfə̀n a səərí e kintatì. Shisi shi lo shí wày ncèkùn é lav ji wiíy. Ncèkùn lo wù wày shisi é lav ji wiíy, aáwune dzə́ feyì kijuŋ.

Ghán sí wìy dùnèn, ancèkùné nèn yèn a kinyo ki sí kooyì, e nèn a ghay jii, "Afə́r vér ámóʼó làykìr ne. Á fèn dzə̀ feé?" Ncèkùn wùmòʼ ghay jii, "M yoʼ yèn fər tàr wor woo lumèn fo ntàm da." Ncèkùn wo wù batin suúy jii, "M yoʼ dzəə yèn fər tàr wor woo wiíy."

Ncèkùn wùmòʼ wo yi-iì siìn taàtá nèn lò e shèŋ kitú, e sə̀nrí sənrín, e sùúy jii, "Ŋkàr sem, m kér sáʼka won. Mesi mè sí kfə́r vèsən. A vèsən dzə̀ la fó a yen, bo áwune lo, e kfər vèsən aá may lèn lèn."

Kindzə́m ki nèn gwàr ancèkùn adzə̀m. Vee vikìyí nèn yòŋ e wón véví jii, "Lá vèn yòʼ a fəə fo ndzə. Vèn á yèn fo mesi me wáa koorí ven."

Ancèkùné nèn kèʼ a fiír. Áwune nèn kù a rəsí a dzə̀ aáwune bii sí, a bó wìr fo áwune yoʼ dzəə biìmé e tiír kiwuú fó ndzə.

Kinyo kìn ki jívír sá mesí. Áwune wáa ghay jii, "Ancèkùné fèn du fèé? Jìŋ sí yár vèsən. Vèsən yòʼ kfə̀n kér kifá ke yi. Áwune sí lir fo vèsən." Shisi shee ŋgàywìr shi dzə́r jii, "Vèsən lo e ghan e le bóo koo áwune?"

Shisi shímóʼ shí yóŋ jii, "M kér kinyo kée shù. Vèsən du e ghàn ancèkùn e sìysì vijín. Vèsən du ji á taʼa wán wov woo wiíy, e fo e wàn wòsən woo lumèn. Ŋkàʼ wo vijiné yíi lòo dzə, aáwune báʼtí kirə́ʼ kimòʼón, é vèsən nèn koò áwune adzə̀m kàŋ mòʼón. Vèsən yíi mon viyíkìr bèn kijuŋ." Mesi me bínsí.

Mesi me nèn tsə̀nsí ŋgay sé wìr sév ji sí wàá du e yèn a ancèkùn. Á dù bèy, e yoŋ jii, "Vèr lón wán won woo wiíy. Vèr taʼ ji wù wáa dzə a wiiy wan wor."

Kindzə́m kí nen gwàr ancèkùn, áwune yóŋ jii, "Ghán yéné beéme ka ben? Vèn sí taʼ e koo ver e kfər." Mesi me sháʼnén jii, "Àáyà, vèr suuy a dzə̀ suuyrú. Vèr koŋ ji vèsən wáa dzə a viŋkar. Dzə̀ rú jii, yi-iì dzə̀ fó ŋgùʼ ver ámóʼó-oò lo, á wàa koo afər vén. Vèsən laysin kee shooy lèn. Yòʼ dzə̀ vèr kfə̀n mum."

Ancèkùné leey mesi, a mè dzə́, a wúné kù boŋ áwune bóŋen. Á nèn yòŋ jii, "Bo kinyo ki yòʼ dzə̀, vèr biìmé ne. Vèr yíi fo wán wor ji wiiy wan won."

Á bèy, mesi mè nèn a kfən e bàm, a yu vijùŋ. Áwune nèn a yoŋ jii, "Kishiíy ké vijin kí wíy a dzə kishiíy ke ŋkaʼ wo tavíné," aá yoŋ bèy, lá kiliímé.

Kishiíy ke vijin ki wìy ghèén, aàncèkùné kù dzəə́ kér kindzə́m. Áwune nèn yòŋ e wón véví jii, "Vèn kú a dzə a dzə̀ e věn shuù se biì. Vèn leéy mesi mè sí wiyì. Aáwune lò a wìy e dzəə ye juŋ, é vèsən səə́sí áwune kijuŋ. Aáwune mùm ji á koó wír fo vèsən, bo vèsən dzə̀ kibáʼtín."

Mesi me nèn kù a səy e dzəə, a yòv lúŋ vijin.

Ncèkùn woo ŋgàwìr dzə́r e wo terí jii, "Vèn kù yòʼ yú ke luŋe suuyì a?" Ncèkùn wo terí biímé jii, "Eènó, áwune yov a jii, 'vèn koó áwune e kfə̀r, vèn koó áwune e kfə̀r'."

Ncèkùn woo ŋgàywìr suúy jii, "Vèsən maʼ sa wosən woo luŋ, a yòv." Wù nèn kèʼ a yov jii, "ncèkùn, vèn léʼ leʼén, ncèkùn vèn léʼ leʼén." Ancèkùn adzə̀me nèn lìy e tòkír áwune bii sí.

Mesi me wíy e mèé, e nèn a ghay jii, "Wiíy wo vèsən kì tàʼ ji á fó e wan wosən bèé lèn?" Ncèkùn woo ŋgàywìr sóŋ kitú fó bií, e yòŋ jii, "Vèr yòʼ dzə̀ə́ viyúŋ. A wìr ban wò, bóʼti ji wun dzə̀ á ŋkar yè, à kiíy, à lèʼ, léʼén."

You are free to download, copy, translate or adapt this story and use the illustrations as long as you attribute in the following way:

Mesi wùn a Ancèkùné

Author - Merga Debelo, Elizabeth Laird
Translation - Beatrice Tafon Takeh, Mbinkar Emmanuel Keelen
Illustration - Jacob Kono
Language - Lámnsoʼ
Level - First paragraphs

© African Storybook Initiative 2016
Creative Commons: Attribution 4.0
Source www.africanstorybook.org
Original source www.ethiopianfolktales.com