UNathi noBongile bahlala edrobheni noyise. Balindele amalanga wokuphumula. Kungasi ngombana iinkolo bezivaliwe, kodwana ngombana bayokuvakatjhela ugogo wabo.

Ugogo wabo uhlala emakhaya lapho kuthiywa khona iinhlambi eduze kwelitsha elikhulu.

UNathi noBongile bebathabile ngombana bekusikhathi sokuvakatjhela ugogo wabo. Izolo ebusuku, bapake iinkhwama zabo balungiselela ikhambo elide eliya emakhaya.

Abazange balale ubusuku boke bakhuluma ngamalanga wokuphumula.

Ekuseni ngelanga elilandelako basuka ngekoloyi kayise

Batjhinga emakhaya. Badlule iintaba, iinlwana zommango neentjalo zetiye. Bebabala iinkoloyi bavuma neengoma.

Ngemuva kwesikhatjhana, abantwana badinwa balala.

Nabafika emakhaya uyise wavusa uNathi noBongile.

Bathola ugogo wabo ahlezi aphumulile phezu komseme ngaphasi komuthi. Bekangumma osaqinileko begodu omuhle.

Ugogo wabangenisa ngendlini bewagida ngendlini avuma ngethabo. Abazukulu bakhe bebathabele ukumupha izipho zakhe abazithenge edorobheni.

"Thoma ngokuvula isipho sami," kutjho uNathi. "Awa, sami isipho maqangi!" kutjho uBongile.

Ngemuva kobana avule izipho, ugogo wabusisa abazukulu bakhe ngendlela yesintu.

UNathi noBongile baphumela ngaphandle. Bagijimisa amaviyaviyani neenyoni.

Bakhwelela imithi beqela ngemanzini welitsha.

Nasele kumnyama babuyela ngendlini bayokudla isidlo santambama.

Ngelanga elilandelako uyise wabuyela edorobheni wabatjhiya nogogo.

UNathi noBongile basiza ugogo wabo ngomsebenzi wekhaya.

Bakha amanzi batheza neenkuni. Babuthelela amaqanda bakha neentjalo esivandeni.

Ugogo wafundisa abazukulu bakhe ukwenza umratha othambileko abawudla nestju.

Wabatjengisa ukwenza ireyisi yekhukhunathi edliwa nefesi ekhanzingiweko.

Ngelinye ilanga ekuseni, uNathi wavulela iinkomo zakagogo wakhe ukuyokudla. Zagijimela eplasini lakamakhelwana. Umlimi wakwatela uNathi. Wamthusela ngokuthi uzokubamba ifuyo ngombana idle iintjalo zakhe.

Ngemuva kwalokho umsana wenza isiqinisekiso sokobana iinkomo zingasabi komunye umraro.

Ngelinye ilanga godu, abentwana bakhamba nogogo emakethe. Bekanendawo ethengisa imirorho, itjhukela nesibha.

UBongile uthanda ukutjela abathengi inani lezinto. UNathi upaka izinto ezithengwe bathengi.

Ekupheleni kwelanga basela itiye. Basiza ugogo wabo ngokubala imali ayitholileko.

Kodwana msinyazana nje amalanga wokuphumula besele aphelile nabentwana bafanele babuyele edorobheni.

Ugogo wapha uNathi ikepisi uBongile yena wathola amateki. Wabapakela umphako wendlela.

Lokha uyise nakafikako azobathatha bebangafuni ukukhamba. Abentwana babawa ugogo kobana akhambe nabo edorobheni.

Wamomotheka wathi, "Sengikhule khulu bona ngingayokuhlala edrobheni. Ngizonilinda nibuye godu nize emakhaya la."

UNathi noBongile bamsingatha begodu bathi usalekuhle.

Lokha uNathi noBongile babuyela esikolweni bacocela abangani babo ngepilo yemakhaya. Abanye abentwana babona ipilo yedorobheni iyihle.

Abanye bezwa kwangathi emakhaya kungcono. Kodwana kunakho koke, boke bavumelana ngokuthi uNathi noBongile banogogo olungileko!