Kwakunebhesi eyodwa tere endaweni lapho kwakuhlala khona uVusi.

Beyiyikulu begodu ihlaza okwesibhakabhaka. Beyibanga itjhada elikhulu.

Ngelinye ilanga, unina lakaVusi wathi, "Kusasa sizokuya edorobheni siyokuthenga ijinifomu yakho yesikolo."

UVusi bekathabe khulu.

Bebazokukhamba ngebhesi ekulu ehlaza okwesibhakabhaka. Wabhalelwa kulala mhlokho.

UVusi besele embethe nezambatho zakhe lokha unina nakozamvusa.

UVusi nonina bakhamba batjhinga esitopeni sebhesi. Balinda ibhesi ehlaza okwesibhakabhaka.

Ibhesi ayizange ifike.

Nabanye abantu bafika esitopeni.

Banghonghoyila ngombana ibhesi beyiladelwe. "Ingabe ibhesi seyikhambile?" bayabuzana.

UVusi bekatshwenyekile.

"Angekhe sikwazi ukuya edorobheni. Angekhe ngikwazi ukuthola ijinifomu yami," utjho uyacabanga.

Abanye abantu babuyele emakhaya. Kodwana uVusi walila angafuni ukukhamba.

Unina wamthulisa. "Sizokulinda isikhatjhana," kutjho unina.

Ngesikhatjhana, bezwa itjhada. Babona ithuli emmoyeni.

Ibhesi beyiza!

Ibhesi le beyingasi hlaza okwesibhakabhaka, beyingasi yikulu. Ibhesi le beyibovu begodu iyincani.

Abantu ebebalindile baqala ibhesi le. Azange bayikhwele.

"Ngenani! Ngenani!" Kwarhuwelela umtjhayeli. "Siladelwe khulu namhlanjesi," kutjho umtjhayeli.

UVusi nonina baba ngebokuthoma ukungena.

Ngemva kwalapho boke bangena ngebhesini encani ebovu.

UVusi waqala ngaphandle kwefesidere.

Wabona abanye abantu abanengi estopeni sebhesi.

Nabanye abanengi bebagijimela ukuzokukhwela ibhesi.

Kodwana babethwa sikhathi. Ibhesi besele izele. Ibhesi ebovu yatjhinga edorobheni.

"Iphi ibhesi ekulu ehlaza okwesibhakabhaka?" kubuza unina lakaVusi.

"Iphukile," kuphendula umtjhayeli. "Sisayilungisa. Izokuza kusasa," kungezelela umtjhayeli.

UVusi akazange atshwenyeke ngombala webhesi. Akazange atshwenyeke ngobukhulu bebhesi.

Bekathabile ngombana ibhesi le beyiya edorobheni.