Kusesigodzini saboJojo lapho kwakuhamba ibhasi yinye vo. Yayiyinkhulu futsi iluhlata sasibhakabhaka
Yayinemsindvo lomkhulu.

Kwatsi ngalelinye lilanga, make waJojo watsi, "Kusasa sitawuhamba siye edolobheni siyewutsenga injinifomu yesikolo."

Jojo wajabula kakhulu. Bebatawutsatsa luhambo ngebhasi lenkhulu leluhlata sasibhakabhaka. Abuzange behle butfongo ngalobo busuku.

Jojo abegcoke kahle ngalesikhatsi make wakhe efika atsi ufuna kumvusa.

BoJojo namake wakhe baphuma baya esitobhini sebhasi. Bamela ibhasi lenkhulu leluhlata sasibhakabhaka. Kodvwa ibhasi ayifikanga.

Befika nalabanye bantfu esitobhini sebhasi. Bebakhonona ngobe ibhasi yefika sesendlulile sikhatsi sayo. "Ngabe seyisishiyile yini lebhasi?" Bayabutana.

Jojo abekhatsatekile. "Angeke sikwati kuya edolobheni. Angeke ngikwati nekutfola injinifomu yami," uyacabanga.

Labanye babona kutsi kuncono babuyele emakhaya.
Jojo wakhala ngobe angafuni kuhamba. Make wakhe wamdvudvuta. "Kulungile sitawulindza sikhashana," kusho make wakhe.

Masinyane, beva umsindvo. Babona lutfuli emoyeni. Nayiya ibhasi ichamuka!

Kodvwa lebhasi lechamukako ayisiluhlata sasibhakabhaka. Futsi ayisiyinkhulu. Lebhasi yayibovu futsi iyincane. Bantfu labalindzile babebuke lebhasi.
Abamange bangene kuyo.

"Ngenani! Ngenani!" Kumemeta umshayeli. "Sikhatsi sesihambile kakhulu namuhla," kusho umshayeli.

BoJojo namake wakhe bangena kucala ebhasini lebovu. Masinyane nje nalabanye bantfu bangena ebhasini.

Jojo wabuka ngephandle kwelifasitelo. Wabona bantfu labanyenti esitobhini sebhasi.

Kwafika nalabanye bantfu batsi bafuna kugibela ibhasi. Kodvwa bafika ngemuva kwesikhatsi, ibhasi seyigcwele. Yasuka ibhasi lebovu seyiya edolobheni.

"Ngabe iyephi ibhasi lenkhulu leluhlata sasibhakabhaka? Kubuta make waJojo. "Iphukile," kuphendvula umshayeli. "Sisayilungisa. Itawubuya kusasa, kwengeta umshayeli.

Jojo abengenandzaba nembala webhasi. Futsi abengenandzaba nesayizi yebhasi. Yena abejabulele kutsi uya edolobheni.