Kgalekgale mo polasaneng kgauswi le motsana wa…

go be go dula letswianyana le le bitšwago Letšobana.

"Ge ke gotše, ke nyaka go fofela godimodimo marung," go bolela Letšobana.

Eupša dikgogo tše dingwe ka moka di ile tša mo sega.

"O a makatša," tša realo. "Re ka se sa bapala le wena gape."

"Letšobana, ka moka re kgona go phaphamiša maphego a rena eupša go boima kudu go rena dikgogo gore re fofele godimo," Mmagwe a mmotša.

Letšobana o be a sa nyake go phalwa.

Letšatši le lengwe le le lengwe o be a ithuta ka noši, a phaphamiša maphego a gagwe.

Pha, pha, pha, o ile a phaphamiša maphego a gagwe eupša o be a šitwa go kuka maoto gore a tloge fase.

Ge a ithuta, o be a ipona a fofela godimo marung abile a lebeletše dikgogo tše di lego fase.

O be a ipona a fofa go phala dihlanhlagane abile a di šiya ka lebelo.

"Mmalo!" dinonyana di tla re. "Kgogo ye e kgonago go fofa!"

Bjalo… Pha, pha, pha, letšatši le lengwe le le lengwe Letšobana o be a phaphamiša maphego a gagwe.

O be a tla fofela godimo eupša a wele fase gape.

"Nka se tsoge ke kgonne go fofa!" Letšobana a botša mmagwe a bile a lla. "Ba bangwe ba nepile."

"Letšobana, ga o swane le dikgogo tše dingwe. Tšona ga di nyake go fofa, fela wena o a nyaka! O ka kgona," Mmagwe a realo.

Letšatši le le latelago Letšobana o ile a namela godimo ga ntlo ya dikgogo gomme pha, pha, pha, a phaphamiša maphego a gagwe.

O ile a fofela godimo moyeng antše a phaphamiša maphego a gagwe …gomme a phaphamiša maphego a gagwe … a tšwelapele go phaphamiša maphego a gagwe … le …

PHARA fase!

Dikgogo tše dingwe di ile tša segela godimo. "Ha ha ha! Re go boditše! Dikgogo ga di kgone go fofa!"

Eupša letšatši le le latelago Letšobana o ile a namela godimodimo, ntlhoreng ya rantabola.

Pha, pha, pha, Letšobana o ile a phaphamiša maphego a gagwe.

O ile a fofela moyeng a phaphamiša maphego a gagwe … a a phaphamiša gape le gape.

O tšwetše pele go fofa!

Moya ka fase ga maphego a gagwe. O ile wa oketšega ka bontši gomme wa mo kukela godimodimo!

Dihlanhlagane le dipeulwane di ile tša re, "Go a makatša! Kgogo ya go fofa!"

Gomme dikgogo tše dingwe di ile tša nyaka go no swana le yena.

Di ile tša re, "Mmalo Letšobana, o a makatša!"