Kajeno ke letsatsi le leholo! Ka mora ho leta dikgwedi tse robong, mmae Thabi o ya sepetlele ho fumana lesea la hae. O tla kgutla ka mora matsatsi a mararo.
Na o ka bala letsatsi-kgwedi le letsatsi la beke khalendareng? E tla be e le letsatsi-kgwedi lefe ha mmahe Thabi a kgutlela hae?
"Sala hantle moratua!" Mmahe Thabi a realo. "O thuse ntatao, hle! Eseng kgale ke tla be ke le lapeng, le dimakatso tse kgolo ho rona kaofela!"
Ngwana o hodile haholo ka hara mpa ya mmae, hoo Thabi a sitwang ke ho potetsa matsoho a hae mmeleng wa mmae jwalo ka pele.
Thekisi e letsa hutara ka ntle. Ke nako ya hore mmae a tsamaye. Thabi o qala ho lla. Ntatae o mmeha hodimo mahetleng hae.
O rata ho nkelwa ho tloha fatshe ho ya hodimo jwalo ka mona. Jwale Thabi o bolelele bo fetang ba ntatae ka hlooho!
Haeba ntata Thabi a le bolelele ba dimitara tse 1,6 kapa disentimitara tse 160, jwale Thabi a ka ba bolelele bo bokae ho tloha fatshe?
Eseng kgale Thabi o boetse o swabile mme o qala ho lla hape. Ke kgetlo la pele bophelong ba hae, yena le mmae ba arohana e le bosiu.
Ntata Thabi a mmeha fatshe setulong pela hae. A mo phumola meokgo ya hae, mme a bua le yena ka lentswe le bonolo a mo kgothatsa.
Thabi o ikutlwa a le matla hape, ha a eme a le molelele hodima setulo sa hae. "Ke na le dilemo tse tsheletseng! Ke ngwanana e moholo!" a bolella ntatae.
Ha a eme a itse thwii, tjena, Thabi o batla a lekana le ntatae. Na o hopola hore ntanta Thabi o bolelele bo bokae?
Na o nahana hore Thabi o bolelele bo bokae ha a eme fatshe eseng hodima setulo?
Thabi o tshwanetse ho leta matsatsi a mararo fela ho tloha ka Laboraro ho fihla ka Moqebelo, empa ho yena e ne e ka re dilemo. Thabi o leka ho bala hore o tshwanetse ho leta dihora tse kae.
O a tseba hore letsatsi le na le dihora tse 24, kahoo o ipolella hore, "24+ 24 + 24 ke _____."
Na o a tseba hore karabo ke eng?
"Ntate," ke Thabi eo, "Ke ne ke nahana hore ke lesea la hao! Ke seo o mpitsang sona ka mehla. Ho tlilo etsahalang jwale? Ha ke sa tla ba lesea la hao?"
"O tla dula o le leitsibolo la rona le kgethehileng, Thabi!" Ntatae a mmolella jwalo.
Ntata Thabi o araba dipotso tse ngata ka lesea le letjha. Ntata Thabi a tlelwa ke kgopolo. "Thabi, hobaneng o sa ngolle Mama lengolo? O ka mo jwetsa hore o mo hopotse hakakang le ho mmotsa dipotso tse ding ka lesea.
"Ke tla rata ho etsa jwalo Ntate. Na o ka nthusa?"
Ka mora dijo tsa motsheare ntata Thabi o mo thusa ho ngola lengolo.
Bala lengolo la Thabi:
Mme ya ratehang,
Ke a o rata ebile ke o hlolohetse haholo! Ntate a re o tla be o le lapeng ka Moqebelo. Ke tatetse ho o bona le lesea le letjha. Ke na le dipotso tse ngata-ngata!
Na lesea la rona ke moshanyana kapa ngwanana? O tshwana le nna? Lesea la rona le tlilo qala neng ho tsamaya le ho bua?
Ka lerato ho tswa ho,
Thabi, lesea la hao le leholo!
Ha a qetile ho ngola lengolo la hae, Thabi a qala ho lora ditoro tsa motsheare.
"Mohlomong ho na le masea a mabedi," Thabi a nahana. "Mafahla a ho tshwana le metswalle e meng ya ka." Thabi o nahana ka Zodwa le Brenda, mafahla a banana a tshwanang hona hoo!
"A rona mafahla e ka ba ke mofuta o jwang?" menahano ya hae e ya kwana le kwana.
Letsatsi le leholo le fihlile. Thabi o thabile haholo. O letile matsatsi a 3 kaofela (kapa dihora tse 72), empa o utlwa e ka re o letile tse ngata esale mmae a ya sepetleleng.
Ba letile dikgwedi tse robong hore ngwana a hole ka hara mpa ya mmae. Thabi o bala a kgutlela morao ka dikgwedi: "Mmesa ho ya ho Hlakubele, ke kgwedi e le nngwe, ho ya ho Hlakola, ke kgwedi tse pedi..."
Balla morao ho fumana hore ngwana o qadile ka kgwedi efe ho hola ka mpeng ya Mme?
Thabi o utlwa batswadi ba hae monyakong o ka pele. Thabi a thola tu! O batla ho ba makatsa.
Empa Thabi ke yena ya tlileng ho makala haholo! Mmae o tlile lapeng le Mafahla! Thabi o na le kgaitsedi le ngwananeso!