Namhlanje lilanga elikhulu! Ngemva kweenyanga ezilithoba zokulinda, unina likaThabi uya esibhedlela ukuyokubeletha umntwana. Uzokubuya ngemva kwamalanga amathathu.

Ungakwazi ukufunda ilanga nelanga leveke ekhalendeni?

Kuzobe kumhlana zizingaki mhlana unina likaThabi abuyele ekhaya?

"Salakuhle sthandwa!" kutjho unina likaThabi.

"Ngibawa usize ubaba wakho, ngizokubuya ekhaya ngokurhabako, ngizokubuya nesimangaliso sethu soke!"

Umntwana besele akhule khulu ngakunina uThabi bekangasakwazi ukuhlanganisa izandla zakhe ngemva kwakanina njengekuthomeni.

Iteksi ibetha ibhele. Sekusikhathi sakanina sokukhamba. UThabi wathoma ukulila. Uyise uyamguga umbeka emahlombe wakhe.

Uyakuthanda ukugugelwa phezulu. Kwanjesi sele amude kunoyise udlula ihloko kayise.

Nange ubude baka yise lika Thabi bumamitha li-1,6 nofana amasentimitha ali-160 ubude, kwanjesi ngabe uThabi unobude obungangani ukusuka phasi?

UThabi wabuye godu wangasathabi wathoma ukulila. Lokhu bekulihlandla lokuthoma ukuthi yena banonina bacithe ilanga nofana ubusuku bangabonani.

Uyise umbeka esitulweni esingaphambili kwakhe. Umsula iinyembezi bewukhulumela phasi ulinga ukumduduza.

UThabi wathoma wazizwa anesibindi godu, wajama phezulu kwesitulo sakhe. "Ngineminyaka esi-6! Ngimntazana omkhulu!" utjela uyise.

Lokha nakajame esitulweni, ubude bakaThabi bulingana nebakayise. Usabukhumbula ubude bakayise lika Thabi?

Ucabanga bonyana uThabi unobude obungangani nakajame phasi ingasi esitulweni?

UThabi kuzokufanele alinde amalanga amathathu ukusuka ngoLesithathu ukuya ngoMgqibelo, kodwana kuye bekungathi ulinde iminyaka.

UThabi ulinga ukubala ama-iri okufanele awalinde.
Uyazi bonyana ilanga elilodwa linama- iri-24, okutjho ukuthi, "24 + 24 + 24 enza ."

Uyayazi ipendulo?

"Kodwana baba soke isikhathi bengicabanga kobana ngimi kwaphela isana lakho, yindlela obewungibiza ngayo soke isikhathi," kutjho uThabi.

"Kuzokwenzeka ini kwanjesi? Kuzokuphela ukuthi ngibe lisana lakho?"

"Uzokuhlala njalo ulizibulo lethu elikhethekileko Thabi!" kutjho uyise.

Ngemva kwesikhathi eside sokukhuluma nokuphendula imibuzo kaThabi, uyise waba nombono.

"Thabi kungebanga lani ungatloleli umma wakho incwadi? Umtjele bonyana umhlulukele kangangani bese umbuze neminye imibuzo emayelana nesana.
Ngiyethemba lokho kuzomthabisa khulu!"

"Ngingakuthabela lokho baba. Ungangisiza?"

Ngemva kwesidlo semini, uyise likaThabi umsiza ngokutlola incwadi.

Mma othandekako,

Ngiyakuthanda begodu ngikukhumbule khulu! Ubaba uthi wena uzokubuya ekhaya ngoMgqibelo. Ngirhabele ukunibona ninesana. Nginemibuzo eminengi engifuna ukuyibuza.

Ingabe isana lelo ngelimsana nofana mntazana? Ufana nami? Uzokuthoma nini ukukhamba nokukhuluma.

Ngiyakuthanda,
Thabi, umntazanyana wakho

Lokha uThabi nakaqeda ukutlola incwadi yakhe uyacabanga.

"Mhlawumbe umma unamasana amabili. Amawele njengabanye babangani bami." UThabi ucabanga ngoZodwa noBrenda, amaweli afana ncamatjhi.

"Kungaba ngiwaphi amawele wekhethu?" Umqondo wakhe uyazulazula.

Lafika ilanga elikhulu. UThabi uthabe khulu. Ulinde amalanga ama-3 nofana ama-iri ama-72 kuphela, kodwana uzizwa kwanga ulinde iinyanga ezibunane zoke.

Le yindlela ebebalinde ngayo isana ebelithwelwe ngunina. UThabi ubalela iinyanga emva ukuze akhumbule kobana bathoma nini ukulinda.

"Ukusuka ku-Aprili ukuya ku Matjhi yinyanga eyodwa, ukubuyela emva ku Februwari sekuziinyanga ezimbili…"

Ungaragela phambili ubalela emuva iinyanga ezibunane?

UThabi wezwa amazwi wababelethi bakhe emnyango wangaphambili. Wazithulela nje ngombana bekafuna ukubamangaza.

Kodwana uThabi uzokuthola ukumangala okukhulu. Unina ubuya namawele!