Hala hale ŋaliŋo omusinde omwafu n'omuhasi wuwe. Abaatu bano baali n'omwana mulala muhana ni bamulanga baati Nakungu. Nakungu gaali muŋoono ate n'ali wahyere bugali. Abasaaye ba Nakungu bamwendanga bugali weene.

Lulala abasaaye ba Nakungu basalaŋo aje amenye ni hojaye mutonganyama owaali omuŋinda. Ko Nakungu atiine nyina gamutungira ehirinda ehiraŋi ehyaliho amajolobera, amapeesa ko n'embira. Gahena gamutungira n'embira jomu mamiro nga ko bamusebula atiina ewa  hojaye.

Nakungu gaali n'ohwambuha olwabi ko goole ewahojaye. Gambuha olwabi luno n'agendera hu mabaale agaali mu maaji. Ni goola engereha w'olwabi, gageeneyo ahahaana ahaali ni hambaaye ebireewo.

Ahahaana aho nga habuusa Nakungu haati ''Oja ŋeena?" Nga Nakungu ahagobolamo ati, "Nja ewa hoja yange Mutonganyama." Ahahaana ahaali mu bireewo nga halomera Nakungu haati, "Keesi Mutonganyama aba hoja yange era keesi peyi ndi hutiina." Nga wangewe abahaana bano bombi bagendera ŋalala olugendo lwawe."

Bali bahiri mu lugendo, ng'ahahaana ahaali mu bireewo haloma Nakungu haati, "Ehirinda hihyo n'embira nga biraŋi! Peho nambaleho." Nakungu yeesi sigaali mubi aga gefihulamo ehirinda n'embira ahaŋa.

Ahahaana hano ni hatusamo ebireewo ko hambale engoye ja Nakungu, nga Nakungu abona ni haliho omuhira! Nakungu ni gabona omuhira hu hahaana ng'obuti bumuŋamba ko n'afanisye ati dala ahahaana hano yali mbulu.

Ng'aŋo abahaana bano beyongera ohugendera ŋalala ni batiina. Ni bateraho nga Nakungu asunga owahye ati, "Wange pe ehirinda hyange n`embira. '' Ng'embulu yimugobolamo yiiti, "Ndehe nambaleho ohwola hu musaala gula.'' Ng'ehena esosya hu musaala ogwali hu mugingi ogu baali ni balengereeye.

Ni boola hu musaala nga Nakungu nindi asunga owahye ehirinda n'embira. Embulu nga nindi yimugobolamo yiiti, "Ndehe nambaleho ohwola hwirungu eriri mu moni.'' Olw'ohutya nga Nakungu nindi afugiirira."

Sibaluye nga boola hwirungu. Nga Nakungu nindi aloma embulu ati "Wange pe ehirinda hyange n'embira.'' Nga nindi Embulu yiroma Nakungu yiiti, "Olu omala gandeha nambaleho ohwola hu hayumba aŋaali abahasi abehaaye bala?'' Ng'aŋo beyongera ohugenda.

Nakungu n'embulu ni boola hu hayumba ng'embulu yimuŋiidiha egongo, yihena yiroma abahasi abaali ni behaaye ŋa hayumba yiiti, "Mubona omuhaana oyo owambaaye agaleewo? Oweeda ganonderesa. Munjede gapweho atiine eyi aja!'' Nakungu ni gaŋulira ebyo ng'esoni n'obuti bimuŋamba ng'anyaguha embiro nywa-a-a aja gehweha mu hidooli."

Ng'aŋo embulu yitiina ewa Mutonganyama yimweyanjulira yiiti, "Ese ndise Nakungu omwiŋwa wuwo. Maama ni bbaabba basindihire eno menye ni neewe." Nga Mutonganyama asangalira ahahaana aho era ye omwene nabomu mago gage bahabisya bulaŋi aye maayi wanamwene Nakungu n'aŋenyuha mu hidooli era n'alyanga hu meere eyi mbwa jalyangaho.

Mu muusi Nakungu gajanga gehweha mu ndimiro ya duuma nga ko gembanga ati, "O ese omutahi o-o-o ese omutahi, Bbaabba ni maama basindiha ohuja ohumenya ewa hooja Mutonganyama. Ni n'ali mu ngira nga nagaana embulu eyaŋira ehirinda hyange n'embira jange o-oese omutahi."

Lulala mulala hu baganda ba Mutonganyama gaali agenda genda mu ndimiro ng'aŋulira ahembo ahanyaha atenga halaŋi. Ni gahejaheja sigafania aŋa ahembo hatuliiye coka ni gagamayo engo ng'aŋayiraho Mutonganyama. Mutonganyama olwaŋulira nga genyoheramo atiina mu ndimiriro. Ni goola mu ndimiro yeesi ng'aŋulira olwembo. Ehi gahola hwendula ohwola olu gabona mwiŋwawe Nakungu.

Nga Nakungu alomera hoojaye ng'olu embulu yaali ni yimuhongerehise yamutusaho engoye jije endaŋi yamuŋa ebireewo. Mutonganyama ehigahola huŋira Nakungu ewuwe ng'amuhweha mu ndala hu buyumba owaali ŋango. Mutonganyama gaali amanyire ehi aŋanga ohuhola ohuŋamba embulu.

Mutonganyama gaali aŋuliyeho ati omuhira gw'embulu gwendana bugali n'amabeere g'eŋombe era nga siguŋanga hugabitaho ni gutagahombireho. Olw'ehyo Mutonganyama ehigahola galoma abatambi babe bayaba eroŋo eryene ereeŋi nga ko bajuhamo amabere bbongo bejusa nga ko alanga abahaana bomu hitehere ehyo boosi baaje mu mbaha j'ohutuuma eroŋo eririmo bbongo.

Oludaalo olw'embaha j'ohutuuma ni lwola ng'omuhaana owaali ni gambaye engoye ja Nakungu geralihira bugali weene, natenda hutuuma eroŋo eryalimo amabeere gabbongo. Hino hyali hityo olwohuba gaali amanyire ati omuhira gugwe gwali guja huba n'enduŋo ya mabere. Embulu ehiyahola yatiina mu ndala hu nyumba nga yehadiraho omuhira ebyene ebyembaha nga ko yiija yeyanja ŋalala n'abahaana bo hu hitehere.

Abahaana hya mulala mulala batiina ni batuuma eroŋo, ohwosa olu lubu lwola hu mbulu. Embulu ni yaaja ohutuuma yejumuuye ŋamugulu ko ebite hwiroŋo. Hino sihyasoboha olwohuba omuhira gwayo gweŋunuye emigoye gwayihwesa ohwola olu mbulu yagwa mwiroŋo eryalimo amabere ga bbongo.

Embulu yesolaho ni yenda eŋwe mwiroŋo eryalimo bbongo, aye abatambi ba Mutonganyama basiiha eroŋo eryo mangu mangu, eby'embulu nga byagama aŋo. Aye Nakungu ng'amenya ewa hoojaye mu mirembe ohuhena eteŋama eryene ereeŋi. Ahagano hange hageme aŋo.