Khale yaliwo omusatsa mulala nomukhasiwe bali nende omwana mulala yenyene, omukhana, owelira mbu Nonkungu. Nonkungu yali eshiombo shio mwoyo omulayi. Abebusi be bali nibamuyaanza okhushira muno.

Inyanga ndala abebusi balola mbu bamurume atsie amenye nende khotsanyene owali omuinda welira mbu, Mtonyama. Nyina Nonkungu yanaba eshibungui shietswani indayi nende omukoye, nefiuma nende fifungo. Khandi namuimira eshima eshilayi. Mama namuruma okhutsia wa khotsanyene.

Khunjira, Nonkungu yoola khu mwalo. Nakukhalasia khulwokhusena khu machina kasenungwakho. Injerekha yomwalo, yanyoola omukhana wundi omuraka nafwalire amatasi.

''Otsiaye?'' omukhana oyo namureeba. ''Enzia okhucheniha khotsa wanje, Mtonyama'' Nonkungu nakalusia. ''Obulayi. Mtonyama ni khotsa siesi. Khandi siesi endi khuluchendo lwo khutsia okhumuchendera.'' Omukhana oyo naboola. Kho nibalondokhana nibatsia.

Olwa bali nibashiri okhutsia ehale, omukhana oyo naboola bali, 'Eshibunguyi shishio neshilayi muno, ne khandi eshiuma shishio shimwekha. Nochama rera ndicherekho." Kho Nonkungu nafwalula eshibunguyi shishie nende eshiuma naheresia omukhana oyo."

Ne omukhana oyo yafwalula amatasi ke niyefwala tsingubo tsia Nonkungu. Nonkungu nalola omushira kwo mukhana oyo. Nonkungu naba nende oburi obunji namanya mbu omukhana oyo khane ni Imbulu.

Nibachendera halala khu fise. "Chama ungalusirie eshibunguyi shianje nende eshiuma," Nonkungu naboola. Imbulu nayo niyiboola iri, ''Lekha efwalekho okhuula womusala kulia kuli." Niyechesia omusala kwali khwitulo."

Olwaboola womusala okwo kwali, Nonkungu nabolera Imbulu, "Chama ungalusirie eshibunguyi shianje nende eshiuma." 'Ndeshera efwalekho busa okhula khu mwalo kulondakho," Imbulu niiboola. Nonkungu yali omuri muno, kho nafuchirira."

Olunyuma nibola khumwalo. Khandi, Nonkungu nareeba Imbulu, '' 'Chama ungalusirie eshibunguyi nende eshiuma." 'Ndeshera efwalekho busa okhula akhatsu khalia, wabakhasi balia bekhale," Imbulu niyiboola. Kho nibatsiririra no luchendo okhula wabakhasi bali nibeekhale.

Nolwaboola khukhatsu akho, nabolera abakhasi abo ari, "'Lolakho omukhana wufwalire amatasi uno, yanonderekho busa eshitere eshilamba. Ndikomba abweho'." Nonkungu yalola tsisoni tsinyinji niyerukha niyekhupa munzu niyefisa.

Imbulu niyitsia munzu wa khotsa Mtonyama niyiboola iri, '' 'Nisie omwiwa wo, Nonkungu. Abebusi banje bandumire mbu nditse emenye ninawe'.''   Mtonyama namwinjisia omukhana oyo. Ye nende abeinzuye bamusangalira Imbulu. Ne Nonkungu, owali bubi nakona mushitwoli ne nakabana nende tsimbwa efiakhulia.

Mushiteere, Nonkungu yatsitsanga mundalo okhwifisa mumatumwa, niyemba endi, "Oh! Eshibeera, eshibeera. Ndarumwa nende papa nende mama okhumenya nende khotsa Mtonyama. Khunjira nembukana nende Imbulu, niyibukula eshibunguyi nende eshiuma. Oh! Eshibeera, eshibeera."

Inyanga ndala, mulala khu basiani aba Mtonyama yali nachendanga mundalo nahulira olwimbo olucheni olulayi. Shiyamanya wolwimbo lwaruliranga tawe, ne olwayoola ingo, nabolela Mtonyama amakhuwa ako. Bwangu obo, Mtonyama naruliramo natsia mundalo omo. Naulira olwimbo olwo, nakhaaba okhula namunyola Nonkungu.

Nonkungu namuboolera eshiekholekha. Shinga Imbulu yabukula tsingubo tsie tsindayi ne niimufwala amatasi ke. Mtonyama namubukula namuyira ingowe, namufisa munzu. Mtonyama yamanya eshiayali natsia okhukhola okhutira Imbulu.

Mtonyama yali niaulira mbu omushira kwe Imbulu shikunyala okhubura khu mabeere nikulakhomberekho tawe. Kho naboolera abandu be okhuyaba litikho lirambi nende okhutsukhamo amabeere amalulu. Kho nalanga abakhaana boosi abolukongo olo khubuyingani bwo khuruma.

Omukhana wali nafwalire eshibunguyi nende eshiuma fia Nonkungu yali nende oburi. Shiyenya okhuruuma litikho elio tawe. Yamanya mbu omushira kwe kulaba nende obulokho bwa mabeere. Kho natsia munzu, ne naboa omushira khumubirikwe obutinyu.   Mana natsia mubwikhalo bwe, wabandi bali.

Buli mulala khubakhana abo yaruma litikho elio. Inyuma wabo efise fie Imbulu fiola. Yatema okhuruka hekulu welitikho ne omushira kwe kwabololokha, nikumukhwesa nakalukha hasi, hasi, hasi mu mabeere amalulu.

Shinga Imbulu yapalapala mumabeere amalulu, abasatsa abo nibabuka litikho elo nomuyeshe, nibaiyabiramo. Ne okho nikhwo khwali okhumalilikha khwe Imbulu. Ne Nonkungu yamenya nende khotsanyene nobusangali, efise efinji muno muno.   Aho niho okhumalilikha khwolukano luno.