O'du alu, culu azi alioru ni ndra ovu ima oku be. Eyi ma mva ndra alu, zamva ni. Eri ma ru Nakuru 'i. Nakuru ndra zamva onyi be tu dika asi be alaru ni.

O'du azi si, eri ma ti'ba lee eri ma ti pe o'a eri ma adropi afa be ri vile akua. 'Ba eri omve Olema 'i. Nakuru ma adri so erini kiteteyi onyiru ni ngaliku be. Ose vini eri ni ngaliku ombeari indi. 'Da ma vutia, pe eri ma ti adropii Olema vile akua.

Erini muria geria, Nakuru eca yitia. Za yi dri oni 'bani o'baa alizuru ma dria si. Yi ma kala 'da ma dria, esu zamva azi bongo iriko suupi ni.

Zamva zi eri: "Mi mu ngole ya?" "Ma mu ma adropi Olema vile akua," Nakuru nag 'yo. "'Dinia? Olema ni vini ma adropi. Ma vini 'di mu eri ne," zamva aziri nga 'yo. Asi mu tualu.

Denga muuni ali ku, zamva aziri nga 'yo: "Mivile kiteteyi ngaliku be 'di ndri tu. Kirikiri, ife ma o'bi eyi." Nakuru tru bongo ini suuri ngaliki ombeari be, fe zamva nde dri.

Zamva 'da kamu bongo ivile iriko ri tru azini Nakuru vile ri suzu 'bo, Nakuru ne eri so'bi be! Ori nde eri tu. Nakuru ni ra zamva 'di adroo ni.

Muu tualu. "Kirikiri mife ma kiteteyi pi ngaliki be fo," Nakuru 'yo. Adroo omvi eri, "Ife mama su eyi kpere pati ambo 'da ma etia." Eda angu pati azi 'be dria ni vu.

Eyi mu ca pati 'davu 'bo, Nakuru 'yo adroo ni, "Kirikiri ife mama bongo ngaliki be fo." "Ite mama su eyi kpere yi azi drilea 'de ri vu," adroo 'yo. Nakuru 'ye ori si, a'i ra.

Asizu caa yitia. Nakuru zi vini adroo ni dika, "Kirikiri, ife mavile kiteteyi ngaliki be fo." "Ite mama su eyi kpere jo okuu ni rizu 'da ma alia," adroo 'yo. Muu drile.

Eyi mu ca jo 'da ma alia 'bo, adroo mi Nakuruvile, 'yo oku 'da yi, ni "Enee nga zamva bongo iriko suupi 'di. E'doo te ma vuti obii drio. Aleta mamu, ma ku ma." Drinza vini ori bi Nakuru ni ci. Apa izii ico alia.

Adroo mu Adro Olema vile akua. 'Yo kini: "Ma mi adramva Nakuru 'i. Ma ti'ba ipee mati mivile akua ni." Olema a'i zamva nderi ayiko si. 'ba erivile akua 'dii woro ma asi adroo ni muke. Te Nakuru asi o'duko ico ma alia, dika nyaka ocevu ri nya.

Etu si Nakuru mu amvua, zi'i kaka ma alia. E'do ongo ngo: "Oh candi mani, candi mani. Ma ati pi ma adri be epee mati o'a ma adropi Olema be. Mani emuria geria, afudri adroo be, 'du mavile kiteteyi pi ngaliki be ra. Oo candi mani candi mani."

O'du alu Olema ma adri ndra ali amvu alia si. Eri ongo osutaru onyiri ni. Ni ongo 'dari efu ngosiari ku. Eri mu ca akua 'bo, ece Olema ni e'yo drinia. Olema mu amvu alia coti. Eri ongo nde, nda pari ni kpere erini Nakuru ni esu.

Nakuru 'yo erini a'diafa 'ye'i ni, obi adroo ni ima kiteteyi 'duzu ngaliki be, erini fezu ini bongo iriko suzu. Olema 'du eri ivile akua, zi eri jo alu ma alia. Olema ni 'inga a'diafa 'ye adroo bizuri ra.

Olema eri ndra kini adroo ma so'bi le lesu tu, econi ali lesu ma agaia si 'bi ku 'dini ku. 'Yo aguu ini azini 'dii dri ma ga 'bu dika ma daa ania lesu kuza. Omve ezoanzi caaloa 'dii woro emu abala mvuzu 'bi drileari si ria.

Ori bi zamza Nakuru ma kiteteyi suupi ngaliki be ri tu. Leni mbu 'bile 'da ma driasi ku. Nira 'ima so'bi ni nga le lesu kuza mbe ra. Fi jo alia, ombe ima so'bi ima rua kiri kiri. 'Da ma vutia mu ezoanzi azi 'dii vu.

Ezoanzi e'do mbu 'bile ma dria si alu alu. Eza adroo ni mbuzu. O'bi mbu uru 'bile ma dria si, te eri ma so'bi ace'i, e'do eri se ele, ele, lesu ma alia.

Adroo ni o'bi efu lesu ma aliaria, agupi 'dii to 'bile 'da ma alia cinaki; esii eri 'bile 'da ma alia. 'Da ndra adroo ma asiza nyakudria ri. 'Da vutia, Nakuru o'a 'ima adropi be saa ezu ru. E'yo ma asiza 'dipi.