Tene tene vyũ kwaĩ mũndũ ũmwe ngya na mũka wake. Maĩna kana kamwe ka kelĩtu ketawa Nokũngũ.

Nokũngũ aĩ mwanake na mũthingu. Asyai make nĩmamwendete mũno.

Mũthenya ũmwe asyai make nĩmavangie kũmũtwaa kwa naũme wake mũthui wetawa Mũtonyama.

Inya nĩwamũseũvĩsye kĩsikati kĩseo kĩna malaa na ivungo na wanyũa. Nĩwamũseũvĩsye ĩsoa ya wanyũa na ĩndĩ amũtũma ndũanĩ ya naũme.

Aendete Nokũngũ nĩwethĩie kalũsĩ na akakĩla akinyangĩte mavia.

Mũingo Nokũngũ nĩwakomanie na kelĩtu kanini kekĩte ilai.

Kelĩtu nĩkamũkũlilye, "Wendete kũ?"

"Nendete kũkethya mama Mũtonyama," Nokũngũ nĩwasũngĩie.

"Onakwa Mũtonyama nĩ mama na nendete kũmũkethya," kelĩtu nĩkaisye.

Kwou nĩmatembeie vamwe.

Mendanga vanini kelĩtu nĩkaisye, "Kĩsikati kyaku nĩkĩseo mũno na ĩsoa yaku nĩyanake, vatonyeka nenge nele."

Nokũngũ nĩwaumisye kĩsikati na ĩsoa yake na anenge kala kelĩtu.

Ĩla kelĩtu kau kaumisye ilai syako nakekĩa ngũa sya Nokũngũ.

Nokũngũ nĩwonie kelĩtu kena mwĩthe! Nokũngũ nĩwew'ie w'ĩa nũndũ nĩwamanyie kelĩtu kau nĩyalyũka.

Nĩmatembeangie vamwe na Nokũngũ asya, "Ndũngĩe kĩsikati kyakwa na ĩsoa yakwa."

Ĩndĩ yalyũka nĩyaisye, "Eka nĩkĩange nginya tũvike mũtĩnĩ ũya."

Nĩyaolotile mũtĩ wĩ kĩĩmanĩ.

Ĩla mavikĩĩe mũtĩ ũsu, Nokũngũ nĩwaisye, "Ndũngĩe kĩsikati kyakwa na ĩsoa yakwa."

"Mbekee tu nĩkĩange nginya tũvike kalũsĩnĩ kala katĩe," yalyũka nĩyaisye.

Nokũngũ nĩwetĩkĩlile nũndũ nĩwakĩaa.

Nĩmavikie kala kalũsĩnĩ na Nokũngũ eea yalyũka, "Vatonyeka ndũngĩe kĩsikati kyakwa na ĩsoa yakwa."

"Mbekee tu nĩkĩange nginya tũvike kanyũmbanĩ kaala vala iveti isu syile nthĩ," yalyũka nĩyaisye.

Kwou nĩmaendie na mbee.

Ĩla mavikie kanyũmbanĩ yalyuka nĩyalutile Nokũngũ ĩtina na yeya iveti ila syaile vau, "Syisyai kelĩtu kaa kekĩte ilai. Kambatĩe mũthenya mũima na nenda kasyoke."

Nokũngũ nĩwakwatiwe ni nzoni na asemba evitha kyũũnĩ.

Yalyũka nĩyendie nyũmbanĩ ya Mũtonyama na yamwĩa, "Ninyie mwĩvau Nokũngũ. Asyai makwa mambĩie nũke kwĩkala naku."

Mũtonyama nĩwathokisye mwĩĩtu ũsu na andũ make mekala nesa na ũthingu na ĩla yalyuka.

Ĩndĩ Nokũngũ ekalaa kyũũnĩ na kũya lĩu wa ngitĩ.

Kwi mũthenya Nokũngũ endaa mũũndanĩ akwĩvitha mbembanĩ na akw'ina:

Thĩna atĩ thĩna nyie.
Natũmiwe nĩ tata na inya nũke kwĩkala na mama Mũtonyama.
Nzĩanĩ nakomanie na yalyũka na yoosa kĩsikati kyakwa na ĩsoa yakwa.
Thĩna atĩ thĩna nyie.

Mũthenya ũmwe mwanainyaa Mũtonyama ũmwe akĩtembea mĩundanĩ nĩwew'ie wathi ũsu mũseo na wa tei. Ndamanya vala wathi ũsu waumaa ĩndĩ avika mũsyĩ nĩwatavisye Mũtonyama ndeto sya wathi ũsu.

Mũtonyama ew'a ũu nĩwendie mũũndanĩ na mĩtũkĩ. Nĩwew'ie ũla wathi na amanza Nokũngũ mũvaka amwona.

Nokũngũ nĩwamũtavisye ũndũ kwekĩkie, ũndũ yalyũka yamũvenie ngũa syake nzeo na yatumwa ekĩa ilai.

Mũtonyama nĩwamwosie na athi nake kwake nake na amũvitha nyũmba nzĩnĩ. Mũtonyama nĩwesĩ ũndũ ũkũkwatya yalyũka.

Mũtonyama nĩwew'ĩte kana mwĩthe wa yalyũka nĩwendete ĩia na ndwamba kũtia ĩia ũtanywĩte ĩmwe.

Kwou nĩwatavisye aũme make masimbe ĩima ĩnene na makwĩyusũsya na ĩia ĩwaatu. Nĩwetie eĩtu onthe ma ndũa moke masindane kũtwĩla.

Mwĩĩtu ũla wekĩĩte ngũa sya Nokũngũ nĩwakwatiwe nĩ kĩthikii. Ndendaa kũtwĩla ĩũlũ wa ĩla ĩima nũndũ nĩwesĩ mwĩthe wake ũkew'a waũni wa ĩia.

Kwou nĩwalikile nyũmba na oveanĩsya mwĩthe na mwĩĩ wake alũmya ũndũ vatonyeka. Na ĩndĩ nĩwendie kũlikana na eĩtu ala angĩ.

Eĩtu nĩmanzie kũtwĩla ĩũlũ wa ĩima ũmwe ĩtina wa ũngĩ.

Ĩla ĩvinda ya yalyũka yavikie nĩyatatie kũtwĩla ĩla ĩima ĩndĩ mwĩthe wayo nĩwathalĩkile waĩkusya, waĩkusya, waĩkusya, mũvaka ĩla ĩianĩ ĩwatu.

Yalyũka yendee na kwilita ĩianĩ ĩsu ĩwatu aũme nĩmosũisye ĩima na kĩthangathĩ na mathika yalyũka.

Na ũsu nĩw'o waĩ mũthya wa yalyũka. Ĩndĩ Nokũngũ nĩwekalile nesa na naũme kwa kĩlungu kĩasa.

Ngewa yathelela vau.