Abwo kare Omosacha oyomo narengeoo amo na mokaye. Nigo babwate omwana oyomo bweka omoiseke nerieta riaye nigo arenge korokwa Nonkungu. Nonkungu nigo arenge omuya ekieni naende abwate enkoro engiya.

Rituko erimo, abaibori baye bakaamua komotoma gochia komenya na Ise moke orenge etachiri naende orenge korokwa Mtonyama. Ng'ina Nonkungu akamoroseria esikati yabwate emengori, ebibungo amo namaritati ande. Naende akamoroseria rindere ri'ebigoti. Korwaoo akamotoma agende oisemoke.

Nchera gakogenda akaumerana noroche. Agatamboka oroche roria kagotacha amagena arengeoo. Ase eng'umbu eria yende akaumerana nomoiseke oyomo obegete chiyanga amachanchabe.

"ing'ai ogochia" omoiseke oria akamoboria. "Nigo inkogenda komotarera tata moke Mtonyama," Nokungu akamoiraneria. Ero bono, Mtonyama gose nainche tata moke, nainche noo ngochia komokwania," omoiseke oria akamotebia. Igo bakagenda bonsi bagotara amo."

Bataragenda egeka egetambe, omoiseke oria akamotebia, "esikati yao nengiya namaritati aye n'amaya mono. Gaki ing'a inyeteme ndore gose komba ere buya." Igo Nokungu akarusia esikati eria n'erindere riria abegete igoti akaaa omoiseke oria.

Ekero omoiseke oria arusia chianga chiaye chiarege amachanchabe nakobeka chiria chingiya chia'Nokungu, Nokungu akarora buna nigo abwate ekemincha! Nokungu akaondoka sana. Akamanya buna omoiseke oria nigo arenge Eimbulu.

Bakagenderera norogendo rwabo. "Gaki ing'a chiayanga chiane n'erindere riane," Nokungu agateba Gotatiga rende Eimbulu eria egateba tiga mbeke baka ase omote ooria." Akaraga omote orenge egetunu igoro."

Ekero baigete ase omote oria, Nonkungu agatebia Eimbulu eria, "Gaki ing'a esikati yane amo n'erindere riane." "Tiga aye mbibeke baka toike ase oroche ronde rore bosio bwaito, Eimbulu eria ekamotebia. Nonkungu akaba nobwoba obonge, igo agancherana tu."

Omoerio bagaika ase oroche roria. Naende Nokungu akaboria Eimbulu eria, "Gaki ing'a chiayanga chiane n'erindered riane." "Tiga aye mbeke baka ase enyomba eeria ase abakungu baria baikaransete, Eimbulu eria ekamotebia. Igo bakagenderera norogendo."

Ekero baigete ase enyomba eria, Eimbulu eria ekamosuguma Nokungu ensemo na gwetang'ania bosio bwaye nagotebia abakungu baria baikaransete ase enyomba eria, "Rigereria omoiseke oyo obegete chiyanga amachanchabe. Ombwatirie rituko rigima. Inyore nogwancha kwane nigo arenge kogenda antigane." Nokungu agasoka na kooboa sana baka agatama agasoa orosana ime na kwebisa aroro.

Koruoo Eimbulu eria ekagenda nyomba mwa Isemoke Mtonyama nakomotebia, "Ninche moigwa oo, Nokungu. Abaobori bane nigo bantoma komenya naye." Mtonyama akaarigania omoiseke oria nyomba. Ere nenka yaye bakaba abororo ase eimbulu eria. Rakini Nokungu akarara rosana ime nakoria endagera y'esese.

Mambia yaye Nokungu akagenda mogondo, akebisa ase chibando ime nagotera: "Gaki nche nachandekire, nachandkire. Ingatomwa na tata na mama ominto Kogenda komenya na tata moke Mtonyama. Nchera ginkogenda nkaumera Eimbulu akaira esikati yane namaritati ane n'erindere riane. "Gaki nche nachandekire.

Rituko erimo, oyomo bw'abamura bamwabo Mtonyama ngoeta arenge getii ekero aigwete eriogi riria riogotera koria okuya. Tamanyete ase ogetora kwarenge korwa korwa, gotatiga ekero aigete nka agatebia Mtonyama amang'ana aria. Abwo abwo, Mtonyama akagenda mogondo. Akaigwa ogotera koria akarigia baka akamonyora Nokungu.

Nokungu akamotebia bionsi biria biakorekanete, buna eimbulu eria yairete eyanga yaye engiya, nakomotebia abeke amachanchabe. Mtonnyama akamoira ase enka yaye akamobisa ase enyomba yende eng'ao. Mtonyama akamanya buna arenge gochia gokora erinde atege eimbulu eria anyebwate.

Mtonyama konyora oigure buna ekemincha k'ieimbulu nigo gianchete amabere naende tikegoetania mabere getaranywa nonya namake igo. Igo agatebia abamura baye bareme engoro nakoyeichoria n'amabere amaruranu. Erinde akabarangeria abaiseke bonsi bekenyoro basindane gocharoka.

Omoiseke oria obegete eyanga eria ya Nokungu namaritati amo n'erindere riaye akaoboa sana. Tatagete gocharoka igoro yengoro eria yabwate amabere. Namanyete buna ekemincha kiaye korang'a kiarenge okoba y'amabere aria. Igo akagenda enyomba gete agasiba ekemincha keria ase omobere oye nengori bokong'u kabisa buna arenge konyara. Koruoo akagenda akaba nabande gosindana.

Omoiseke oyomo korwa ase oyonde bagachaka gocharoka igoro yengoro eria. Omoerio egeika engaki y'eimbulu eria gocharoka. Agatema gocharoka igoro kabisa yengoro eria, gotatiga ekemincha keria kiaye kegasiboka nakomongusa nse, nse kabisa baka ase amabere aria amaruranu.

Buna riria eimbuluu eria egendererete kwerania ase amabere aria, abamura baria bagakuneka engoro eria nakomokunekeria. Noyio noro orenge omoerio bw'eimbulu eria. Nokungu akamenya nomogoko na ise moke ase engaki etambe mono. Noyio noro omoerio bw'omogano one.