Lwali lulala, Wakayima bwe yali atambulira ku mwalo ogwo mwiga.

Wanvubu yeena
yaliyo, nga ali kutambulatambula
eno bwalya ku isubi lya kilagala eilungi.

Wanvubu tiyabona ati Wakayima yali agho era mu butali bugenderere yaaniina ku kigere kya Wakayima. Wakayima yaatandiika okuvuma Wanvubu, "Iwe Wanvubu! toli kubona nga oli kunniina ku kigere?"

Wanvubu yeetondera Wakayima, "Nkweghembye binsobeire. Tikuboine. Bambi nsonhigha!" Aye Wakayima nga tawuliriza era yaakaabukira Wanvubu, "Okikoze mu bugenderere! Lulala, oidha kukibona! Oidha kusasula!"

Wakayima yaaja bwa kunoonia Muliro era yakoba, "Ja, yokya Wanvubu bwanavaayo mu maadhi okulya eisubi. Anniinieku!" Muliro yairamu, "Ghazira buzibu, Wakayima, mukagwa. Ndidha kukola nga bwokobye."

Luvainhuma, Wanvubu yali ali kulya isubi ghalaku okuva ku mwiga meeni, "Whooshi!" Muliro yaatumbuga ennimi. Ennimi dhaatandiika okwokya enviiri dha Wanvubu.

Wanvubu yaatandiika okulira era yaalumuka okuja mu maadhi. Enviiri dhe dhonadhoona dhaaya omuliro. Wanvubu yaasigala nga ali kulira, "Enviiri dhange dhiyiire mu muliro! Enviiri dhange dhonadhoona dhigiire! Enviiri dhange ennungi!"

Wakayima yaaba musanhufu kuba enviiri dha Wanvubu dhiyiire. Era na buti, okutya omuliro, kwaleetesa Wanvubu obutagya ghala okuva ku maadhi.