Cango, cango, cango, Gweno kodi Ongongolo oyido jo bedo mere. To oyido jo tera mito pyem wegi gi wegi. Ndelo acel jo yiko tuko mupira aka nyaka jo woneni jatuko maber.

Jo kadho ikisya to jo cako tuko pajo. Gweno oyido dwir to Ongongolo oyido dwir loyo. Gweno ogweyo mupira bor to Ongongolo ogweyo bor swa. Aka Gweno ocako winjo malith.

Jo yiko tuko ma kitewa gole aka onen ni ŋa m'oloy. Ongongolo ama otelo mako gole. Gweno otewa to rwako gole acel. Nyo to tundo weso pa Gweno ma kuro gole.

Ongongolo ogweyo mupira to tewa gole. Ongongolo okata mupira to tewa gole. Ongongolo ogoyo mupira giwiye to tewa gole. Ongongolo otewa gole abic!

Gweno omako nge ni go ki lim gole. Go oyido obedo ŋat ma winjo marac swa ka ki lim. Ongongolo ocako nyero rupiri mere pere oyido timo ginyero.

Gweno omako nge, oŋamo dhoke malac swa to mwonyo Ongongolo ni kwili.

Munyo Gweno oyido doki peco, oromo gi yoki Ongongolo. Munyo yoki Ongongolo oneno go openjo ni, "I neno raye nyathi parani?" Gweno to liŋ aliŋa. Yoki Ongongolo bedo gi rembo.

Rumacen yoki Ongongolo owinjo dwonde moro mathin. Dwonde no oywak ni, "Konyani Mama!" Yoki Ongongolo oŋiyo Gweno to winjo gi kikangasa swa. Dwonde no kere owok iyi Gweno.

Yoki Ongongolo okoko ni, "Nyathi paran, ori men perin ma were omiyin!" Gi kenyo Ongongolo owodho ŋwece ma wac ma kikurere. To Gweno cako kicirok pa two.

Gweno ocukere de to cukere. Owolo to ŋulo law. Owolo to giro. Owolo pa Ongongolo oyido wac aka oyido waŋo dwonde.

Gweno owolo de owolo nyuka oŋok Ogongolo. Yoki Ongongolo gi nyathi pere to jo rweta malo wi yath to jo pondo.

Wok ndir no, Gweno kodi Ongongolo jo bedo jukwor. Ka Gweno oneno Ogongolo codho acodha. Aka ka Ogongolo oneno Gweno bende rango aranga ka pondo.