Kanye ngelilanga ibhasi lenkhulu leluhlata kwesibhakabhaka ima esigodzini saboBubu itsatse bantfu labaya edolobheni. Bubu akakaze ayibone ibhasi lenkhulu kangaka! Ubala emafasitelo ebagibeli layimfica kanye nelifasitelo lemshayeli. "Kumele kube nemarowu la-9 ebagibeli labahleti nalokungenani tihlalo le-6 kurowu ngayinye," Bubu uyaticabangela.

Nangabe Bubu ucinisile, bangaki bagibeli labangatfwalwa yibhasi lenkhulu leluhlata kwesibhakabhaka?

Kusasa, boBubu namake wakhe batawugibela ibhasi lenkhulu leluhlata kwesibhakabhaka baye edolobheni kuyewutsenga injinifomu yaBubu. Make waBubu ufuye tinkhukhu. Utsengisa emacandza nge-R15 idazini. Emavikini lamanyenti wenta imali le-R450. Mangaki emadazini emacandza ladzinga kuwatsengisa kute ente R450?

Emavikini lengcile lamane, ulondvolote ihhafu yemali yakhe kute abhadale injinifomu yaBubu lensha. Ungabala kutsi ulondvolote malini make waBubu emavikini lamane?

Cishe setinyanga letintsatfu kusukela Bubu aba neluhambo lwekugcina ngebhasi. Akasakwati nekulindza!

Kusasa lilanga lelikhulu! Ngensimbi yesikhombisa, sewusembhedeni, kodvwa butfongo abufiki. Ingcondvo yakhe iyabalisa! Akakuyekeli kucabanga ngeluhambo lwekuya edolobheni. Seyigabence insimbi yemfica, kodvwa Bubu solo akakalali!

Njalo ekuseni, make waBubu uyamvusa ngensimbi yesikhombisa. Kodvwa lamuhla, nobe bekalele ngensimbi yelishumi nakunye ngayitolo ebusuku, ngensimbi yesitfupha, besekavukile.

Ngensimbi yesikhombisa besekagezile futsi sekagcokile alungele kuhamba! Ngabe Bubu ulele sikhatsi lesingakanani itolo ebusuku?

Nasekusele ikota kushaye insimbi yesiphohlongo boBubu namake wakhe baya lapho kugitjelwa khona ibhasi. Ibhasi lenkhulu leluhlata kwesibhakabhaka bekumele ifike ngensimbi yesiphohlongo.

Make waBubu uhlola liwashi lakhe. Seyingemuva kwesikhatsi ngemaminithi lalishumi nesihlanu. "Kodvwa ibhasi ihlala isibamba sikhatsi. Ngabe yini inkinga?" Kusho make waBubu.

Masinyane bantfu labanye labane bafika lapho kugitjelwa khona emabhasi. Nabo babuka emawashini abo babuye babuta kutsi kungani ibhasi ingakafiki ngesikhatsi. "Kuyamangalisa loku!" Kusho indvodza lenemphandla legcoke isudu leluhlata kwesibhakabhaka.

"Sengiyo insimbi yemfica! Ngitawufika ngemva kwesikhatsi emsebentini!" BoBubu namake wakhe sebalindze sikhatsi lesidze kakhulu. KuBubu bekufana nema-awa lamanyenti kakhulu! Kodvwa ecinisweni akusinjalo! Ngabe sebalindze sikhatsi lesingakanani?

Bubu ukhatsatekile. "Nje ngitake ngiyitfole injinifomu yami?" Ubuta make wakhe.

Bubu uyabala kutsi luhambo lwekuya nekubuya edolobheni lutawutsatsa ema-awa lamane. Kuli-awa kuyewufika khona, kube ngema-awa lamabili ekutsenga neli-awa lekubuyela emuva. "Nginemdlalo webhola nebangani bami ngensimbi yesibili Make! Ngiyetsemba ibhasi itawusheshe ifike nobe-ke angeke site sifike ngesikhatsi ekhaya!"

Bebaloku balindzile. Nyalo Bubu sewuyakhala. Babili kulabo bebeme emgceni bahamba baphindzela ekhaya. Labanye bebaloku babuka sikhatsi emawashini abo.

"Asibeketeleni! Nginesiciniseko sekutsi ibhasi iyeta masinyane!" Make waBubu uyabatjela. "Cha make! Mine ngifuna kuya ekhaya!" Kukhonona Bubu. "Kutawuba ngulamanye nje emaminithi lalishumi," uyamtjela. "Nangabe ibhasi ayifiki lapha naseyigabence insimbi yemfica sitawuhamba siye ekhaya!"

Khona lapho beva umsindvo webhasi ibhavumula ngenhla kwemgwaco. "Uyabona ngikutjelile!" Kusho make waBubu. "Seyigabence insimbi yemfica enhloko! Sitawutsenga masinyane. Nangabe ibhasi isheshe yahamba ngesikhasi, sitawuba sekhaya ngembi kwemdlalo webhola!"

Bubu usula tinyembeti takhe. Emehlo akhe ayavuleka! Tinyawo takhe tibuhlungu. Utiva akhatsele. Akasakwati nekulindza kutsi angene ebhasini.

Kwabamangalisa kutsi akusiyo ibhasi lenkhulu leluhlata kwesibhakabhaka. Yibhasi lencane lebovu! Bubu ubala emafasitelo lamane kuphela ecaleni lebhasi. "Make! Kusho Bubu. Lena yincane kakhulu kunebhasi leluhlata kwesibhakabhaka! Angeke baze benele bonkhe bantfu labaya edolobheni!"

Ngabe uyavumalana naBubu? Asewucagele kutsi bangaki bagibeli lebangatfwalwa yibhasi lebovu?

"Kwangatsi ukhatsateka kakhulu Bubu," make wakhe uyamdlalisa. "Lokungenani sonkhe lebesilindzile sitawuyitfola indzawo yekuhlala!"

"Sheshisa! Singene sititfolele indzawo lekahle yekuhlala. Ngitsi lesilindze sikhatsi lesidze kakhulu!"

BoBubu namake wakhe bangena ebhasini. Ngemuva kwabo, kunebantfu labayimfica emgceni. "Nje titawuba khona tihlalo tetfu sonkhe?" Bubu aphindze abute.

Nyalo uyabona kutsi kunemigca lemine ebhasini, netihlalo letimbili kulinye licala natimbili tihlalo kulelinye licala. Tingaki tihlalo letikhona nasetitonkhe? Ngabe bonkhe bantfu labasemgceni batawukwati kuhlala yini?

BoBubu namake wakhe bahlala etihlalweni letiphambili edvute nemnyango. Banendzawo lenyenti ngaphambili kantsi bayakwati nekubuka kahle ngaphandle.

Bubu ubala bantfu labanye labafikile emgceni. "Nyalo sekunebagibeli labalishumi nesikhombisa nasebabonkhe." Uyatikhulumela. "Make kunendzawo yawo wonkhe umuntfu!" Utjela make wakhe. "Munye kuphela lotakuma ngetinyawo!"

Ngabe Bubu ubale kahle yini?

Nyalo ibhasi seyigcwele. Umshayeli uvala iminyango abuye ayisuse ibhasi. Kunemsindvo ngaphandle. BoBubu nalabanye bagibeli babuka ngephandle kwelifasitelo.

Bantfu bagijimela kugibela ebhasini. Bayamemeta. "Mani! Mani! Natsi sifuna kugibela!" Kodvwa sesihambile sikhatsi! BoBubu namake wakhe beva buhlungu kutsi kunebantfu lebashiywako.

Make waBubu ubuta umshayeli webhasi. "Yini ndzaba ungaketi ngebhasi lenkhulu leluhlata kwesibhakabhaka?" "Iphukile itolo,” kusho umshayeli. Kumele ngitfole lenye ibhasi. Ngitfole lena lencane!"

"Kodvwa yini letawenteka ngabo bonkhe bantfu lobashiye ngemuva?" Kubuta make waBubu. "Ungakhatsateki!" Kusho umshayeli. "Ngihlele kutsi ngiphindze kabili ngilandze labanye lamuhla!"

Bubu ulalele ngalesikhatsi bakhuluma. Ucabanga tinombolo enhloko yakhe.

Bubu uyaphindza ubala tihlalo. "Ngicabanga kutsi lebhasi lencane itfwala bantfu laba-20, laba-16 ngulabahleti phasi, kantsi laba-4 ngulabamile."

"Ngifisa kwati kutsi ibhasi ingahamba kangaki nayitfwala bagibeli laba-100 kuya edolobheni? Laba-200 nobe laba-150-ke?" Uyatibuta. Ungakwati yini kubala utfole imphendvulo?

Bubu ujabulile! Madvute nje utawutfola injinifomu yakhe lensha! Ibhasi lencane lebovu itabatsatsa ibayise ekhaya ngalesikhatsi sekudlala umdlalo webhola!