Ikare okato cen, Iyoono kede Ipusin oudo obedo owotino. Oudo gin kitimo tic karacel di kituko da karacel. Ipusin udo nyomere kede Iyoono di Iyoono da nyomere kede Ipusin di ki tiye kede ayomaic.

Do ingei kare moro, iyoono oko geno penyere. “joyewa ace orwenyo,” gin iko penyere be: “kitiye twayi?," "likama aneno nuruna pikare alac” oyoo acel oko yamo. Ace oko yamo be; “ likame aneno waana,” amina likame tye doko” oyoo me adek oko yamo, “kede ominango kara tie ayii?” oyoo me ogwon di penyere.

Oyo otii mere oko yango wiye di eyamo be, "a tie kede rwonge arac, jowota,” Ipusin tiye camo wanu. Pore di ogwokerenu, iyapi yapi gin kibino camo wanunu dedede.

Iyoono oko bedo kede lworo adwong twatwal. Jonywal oko yamo ne idwe gi, “ kur iyotunu okoo. Bedunu di igwokerenu. Ikapai bino mako wu.”

Iyoono dedede oko do geno gwokere. Kiko donyo bedo iwude gi. Likame oudo ki ooto ooko.

Nataman oudo Ipusin da tiye kede lworo. “ Iyoono dedede oot tuai?” di gi penyere “ kec omako wa. Likame otie wudo gi acama.” “Ki tiye pwopwono kibutwa” Apus adwong mere oko yamo be. “ Epone mene en kame otwerunu mako gi kede?.”

“ Atiye kede ngec moro,” Apus ocelu oko gamo,” “ootunu wenao Iyoono di okonu iiko nyom kacil. Oyarunu penyo nyar gi acel me anyoma ne wod wa acel. Ebaga omito bedo tiye dido gin dedede kiko bino ooko bedo karacel. Otwerunu maki gi dedede icel iye sawa nono. Eyaro bedo ebaga adwong newan!” "man obedo ngec aber twatwal odoco” Ipusin oko gamo.

Dido Ipusin oko cwano jo dongo gi kakame Iyoono tie iye. "miwunu wa nyar wu acel” "omito nyako acel kikom anyira wu me anyoma ne awobi wa”.

Iyoono oudo tie kede uur kadwong, "wan likame ogeno wu," gin kiko gamo. "wun imitunu camo wa." "Li li!" di Ipusin oko dwoko. "wan otiye yamo ateni doko wan omito bedo awotino wu. Etiye ateni, riki sek mogo kikom wa ocamo mogo ikom wu. Do pore wi wa do wil kede mago nataman. lika bobo oyaro camo wu."

Iyoono oko ngicho Ipusin. Ipusin dedede do oudo tie mure-mure. “lika rac” oyoo oko dwoko ne gi. “wan oyei,” wan oyaro mino acel kikom anyira wa ne acel kikom awobe wu.

Ipusin oko oot ipaco kede ayomaic. “ ceng me nyom kacil oyaro bedo itegelekina,” kiko yamo di ki nango del dogi.

Ceng me nyom kacil oko tuno, Iyoono oudo pwodi tiye kede lworo kadwong. Kiko yamo ne idwe bee “bedunu kaka me iyapi-yapi kede ude/bure wu”. Nenunu, Ipusin tiye bino. Kame kitero wa kiber, wada oyaro tero gi kiber. “Do kame kitamo camo wa, wan oyaro bedo di oyikere.”

Ipusin oko bino iyongayo, di ki wero wer me nyom kacil.

“Itwero winyo kope kame kitiye wero,” oyoo adwong oko penyo atidi mere. “ebaa” oyoo atidi oko dwoko. “ makunu gi kede camo gi. Makunu gi kede camo gi!”.

“Pore wada owerunu,” oyoo adwong oko yamo. Oko geeno wer, "Ringunu, iyoono, ringunu, iyoono, ringunu!” iyoono dedede oko sosomo ibure gi di ki ko lwii.

Ipusin oko tuno di kiko penyere ken-gi ken-gi be, “mugole a wod wa tiye tuai?.” Oyoo adwong oko ngado ngute ooko me bur. Eko yamo be; “otieko pwonyere,” kame jokworni osidiko be gin jo awotino ni, miero ibed di iiyikere pi ringo.”