Kgalekgale ho ne ho dula nwanana eo lebitso la hae e neng e le Moitheri. Moitheri e ne e le ngwanana ya buang haholo. Mme wa Moitheri o ne a ile a mo hlokomedisa hore a se bue haholo, empa Moitheri ha a ka a mamela.

Ka tsatsi le leng, rakgadi wa Moitheri a kula. O ne a dula phuleng e ka mose wane ho motse wa bo Moitheri.

Mme wa Moitheri o ne a tshwere ka thata tsatsing leo. E ne e le bosiu nakong eo a fang Moitheri dijo hore a di isetse rakgadi wa hae ya kulang.

Tseleng Moitheri a kopana le Kgokgo, wa lefiritshwane ya neng a ikgakantse eka ke motho.

Kgokgo a mmotsa hore na o nkileng. Moitheri a araba, "Nama, mahe le lebese."

Mme wa Moitheri o ne a ile a mo hlokomedisa hore a se ke a bua hore na o tshwereng.

Moitheri o ile a boela a bolella Kgokgo hore rakgadi wa hae o a kula ebile o mo isetsa dijo.

Kgokgo a qala a rothisa mathe ha a nahana ka nama eo Moitheri a tshwereng.

A matha ka potlako pele ho Moitheri ho ya ha rakgadi wa hae.

O ile a kwenya rakgadi wa Moitheri a be a ikwahela ka kobo ya hae.

Ha Moitheri a fihla, ke ha ho thotse ntlong. A kena ka hara ntlo a hweletsa, "Rakgadi, o hokae?"

Ha a sa utlwe lentswe la rakgadi wa hae, Moitheri a kenella phaposing e ka hare moo rakgadi wa hae a neng a robetse teng. O ile a makala ha a bona motho e mong a ikwahetse ka kobo e kgolo.

"Rakgadi, hobaneng ha ditsebe tsa hao di le kgolo hakana kajeno?" ha botsa Moitheri.

Kgokgo a arabela a le ka tlasa kobo e kgolo, "Hore ke kgone ho o utlwa hantle."

Moitheri a botsa hape, "Rakgadi, hobaneng ha mahlo a hao a le maholo hakana kajeno?"

Kgokgo a arabela, "Hore ke kgone ho o bona hantle."

Qetellong Moitheri a botsa, "Rakgadi, hobaneng ha molomo wa hao o le moholo hakana kajeno?"

Kgokgo a araba, "Hore ke kgone ho o kwenya." Kgokgo a qhoma betheng a kwenya Moitheri.

Ka hobane Moitheri o ne a bua haholo, o ile a nna tswela pele ho bua leha a se a le ka mpeng ya Kgokgo.

O ne a botsa dipotso tse ngata.

Qetellong, Kgokgo o ne a kgathetse ke dipotso tse ngata tsa Moitheri ha a tla qetella a mo tshwetse.

Moitheri le rakgadi wa hae ba ile ba pholoswa ke baahi. Ho tloha tsatsing leo, Moitheri ha a ka a hlola a bua haholo le batho bao a sa ba tsebeng.