Buli mundu yamanya mbu inzofu ili nende amolu amarambi.

Khale khale, amolu ke inzofu kali membikiti khandi amakhomefu.

Inzofu yebula omwana mwangu omuchesi. Yali nende amarebo khu buli isolo.

Yenya okhumanya khu itika. "Shichira oli nende likosi lirambi ni shina?"

Yenya okhumanya khu imbongo. "Shichira obe nende olwika olumemu ni shina?"

Yenya okhumanya muno khu ikwena. "Ikwena ilitsanga shina angolobe?"

Likhokho nilimubolera, "Nondakho khutsie mumwalo. Eyo, olalola shie ikwena ilitsanga angolobe."

Kho mwana wa inzofu nalonda khu Likhokho mumwalo.

Yabura mumaturu ne niyema khulukuku. Nalenjera mumwalo. "Ikwena ili yena?" Yareba.

"Orie!" Lichina liali khulukuku lwo mwalo limushesia. "Orie! Wakhambolera shie ikwena ilitsanga angolobe?" Mwana wa Inzofu nakalusia.

"Inama asi ekhubolere," lichina niliboola. Omwana we Inzofu natsirira okhwinama asi.

"Kamu!" Amolu kali mumunwa kwa ikwena.

Omwana we Inzofu yekhala khufilenje fiaye efia amani, nakhwesa, khandi nakhwesa, khandi nakhwesa. Ikwena shiyamulakhula tawe.

Amolu ko Mwana we Inzofu nikatanyukha, khandi nikatanyukha. Duuffff! Nakwira omukongo.

Mwana we Inzofu yalenjera molu kaye. Shiyanyalirwa okhulola wakaakamira tawe!

Kali amarambi, yanyalirwa okhwakula efiamo khumasaka akulu. Na okhula lero, tsinzofu tsiosi tsili na amolu amarambi muno, kobukhonyi.