Khale yaliwo omusatsa nomukhasiwe. Bali nende omwana omukhana, owelira mbu Nashimuli.

Inyanga ndala abebusi bamuruma Nashimuli amenye nende khotsanyene owali omuinda welira mbu, Makokha.

Khunjira, Nashimuli yanyoola omukhana wundi omuraka nafwalire amatasi.

"Otsiaye?" Omukhana oyo nareeba Nashimuli. "Okhucheniha khotsa, Makokha," Nashimuli nakalusia. "Makokha ni khotsa siesi. Endi khuluchendo okhumuchendera," omukhana oyo naboola.

Omukhana oyo naboola Nashimuli, "Eshibunguyi shishio neshilayi muno. Khandi eshiuma shishio shimwekha. Nochama rera ndicherekho." Nashimuli naheresia omukhana oyo eshibunguyi shishie nende eshiuma.

Omukhana oyo yafwalula amatasi ke niyefwala tsingubo tsia Nashimuli. Nashimuli nalola omushira kwo mukhana oyo. Namanya mbu oyo khane ne okunani.

Nibachendera halala khu fise. Nashimuli naboola, "Chama ungalusirie eshibunguyi shianje nende eshiuma."  Omukhana niyiboola ari, "Lekha efwalekho okhuula womusala kulia kuli."

Olwaboola womusala okwo kwali, Nashimuli namubolera, "Chama ungalusirie eshibunguyi nende eshiuma." Omukhana naboola, "Ndeshera efwalekho busa okhula khu mwalo kulondakho."

Nibola khumwalo, Nashimuli naboola, "Chama ungalusirie eshibunguyi nende eshiuma." Omukhana nakalusia, "Ndeshera efwalekho."  Kho nibatsiririra no luchendo.

Nolwaboola khukhatsu, nabolera abakhasi ari, "Lolakho omukhana wufwalire amatasi uno, yanonderekho eshitere eshilamba. Ndikomba abweho." Nashimuli yalola tsisoni tsinyinji.

Omukhana oyo neyatsia munzu wa khotsa Makokha naboola ari, "Nisie omwiwa wo, Nashimuli."   Makokha nende abeinzuye bamusangalira. Ne Nashimuli akona mushitwoli.

Mushiteere, Nashimuli niyemba:   "Aa! Eshibeera, eshibeera. Ndarumwa nende papa nende mama okhumenya nende khotsa Makokha."

Inyanga ndala, omusiani wa Makokha yali nachendanga nahulira olwimbo lwa Nashimuli. Olwayoola ingo, nabolela Makokha. Makokha natsia mundalo naulira olwimbo olwo. Namunyola Nashimuli.

Nashimuli namuboolera eshiekholekha. Shinga omukhana oyo yabukula tsingubo tsie tsindayi. Makokha namuyira ingowe, namufisa munzu.

Omushira kwe okunani shikunyala okhubura khu mabeere nikulakhomberekho tawe. Makokha aboolera abandu okhuyaba litikho lirambi. Batsukhamo amabeere. Kho nalanga abakhaana boosi khubuyingani bwo khuruma.

Omukhana wali ne ntsingubo tsia Nashimuli shiyenya okhuruuma litikho elio tawe. Kho natsia munzu, ne naboa omushira khumubirikwe obutinyu.

Buli mulala khubakhana abo yaruma litikho elio. Inyuma wabo efise fie omukhana oyo fiola. Yatema okhuruka ne omushira kwe kwamukhwesa hasi mu mabeere.

Shinga omukhana oyo yapalapala mumabeere, abasatsa abo nibabuka litikho elo nomuyeshe, nibamuyabiramo. Nashimuli yamenya nende khotsanyene nobusangali, efise efinji muno muno.