Phefo ya marega e fetile. Seruthwane se be se kokota motseng wa boNkanyezi. Go se go ye kae badudi ba tla be ba kgobokana e le ge ba keteka sehla se seswa. Nkanyezi o be a letetše go keteka mokete wa Seruthwane ka tetelo ye kgolo go feta mekete ye mengwe ya mo ngwageng.

Mosong wo mongwe wa borutho, Nkanyezi o ile a kwa baetapele ba babedi ba motse ba bolela ka mokete. "Batho ba Ndlovu ba lahlegetšwe ke moya wa go keteka," yo mongwe wa bona a realo. "Na re ka keteka bjang Seruthwane mo motseng woo badudi ba wona ba lebetšego gore go ketekwa bjang?" yo mongwe a botšiša.

Nkanyezi o be a belaela. "Na ngwedi o tla apogelwa ke maru neng ge e se fela gore re itsotsorope?" a ipotšiša potšišo yeo. Nkanyezi a gopola ka seo nako ye telele. "Ke swanetše go hwetša seo se re lahlegetšego," a akanya ka go realo. "Ke swanetše go yo nyaka dilo tšeo di tla bušetšago moya wa go keteka mo motseng wa gešo."

Ba bagolo ba ile ba mo fa ditšhegofatšo tša bona leetong la gagwe. Ba ile ba mo fa mokotla wa go rwala dilo tšeo a ka di hwetšago. Nkanyezi o be a tšhogile efela o be a na le tshepo ya gore o tla tšwelela.

Nkanyezi o ile a sepela letšatši ka moka. O ile a namelela thabana, a ba a theogela moeding. A putla noka ye kgolo ka go thala, a ba a namela ka gare ga matlapa a go hlaba. O ile a matšha go putla melala go fihlela ge a fihla morithing wa dithaba tše khubedu.

Ge leswiswi le thoma go swara, Nkanyezi o ile a fihla motseng wa go ba le dipaterone le mebalabala yeo a bego a e bona la mathomo mo bophelong bja gagwe. O ile a hlalošetša baetapele ba motse ka leeto la gagwe la go bušetša moya wa go keteka go batho ba gabo. Mmago setšhaba se, o ile a fa Nkanyezi mpho. O boditše mosetsana go re, "Ka lerato, re go fa pente ye gore o tsošološe mmala motseng wa geno woo o fetogilego lerotho." Nkanyezi o ile a leboga batho ba bagolo gomme a tšhela pente ka mokotleng wa gagwe. Ge letšatši le hlaba Nkanyezi o ile a tsogelela tsela, a thabetše mpho yeo a filwego yona ya mmala.

Nkanyezi o sepetše letšatši ka moka ka gare ga sethokgwa sa mehlare ye megologolo. Ge legodimo le thoma go swiswala, tsela e se sa bonala, a kwa modumo wa meropa. O ile a kitimela fao modumo o tšwelelago gona, o be a e kwa maikutlo a moya wa go bina o tsenelela maotong a gagwe ao a lapilego.

Nkanyezi o ile a ikhwetša a le ka gare ga motse wa Bhubezi. Batho ba be ba dutše ba ora mollo, ba betha meropa le go opela. O be a thoma go kwa mmino woo wa go makatša. O ile a hlalošetša batho ba bagolo ba motse mabapi le leeto la gagwe la go bušetša moya wa go keteka bathong ba gabo. Batho ba Bhubezi ba ile ba mo laletša go ikhutša le go robala moo motseng bošegong bjoo.

Kgoši o ile a bitša Nkanyezi e sa le mesong. "Ngwana'aka," a realo, "tšea moropa wo wa go ikgetha. Moropa wo o ntšha koša ye mpsha nako ye nngwe le ye nngwe ge o o letša." Nkanyezi a leboga ba bagolo gomme a tšea moropa a o tšhela ka mokotleng wa gagwe. Morago ga moo a tšwela pele ka leeto la gagwe, a thabišitšwe ke mpho ya mmino le go bina.

Ka letšatši la boraro a le leetong, ge a feta tšhemo ya go ba le dikgomo tša go nona, nko ya gagwe ya thoma go hlohlona. Monkgo wo mongwe o be o tsikinya dihlaa tša gagwe gomme molomo wa gagwe wa thoma go rothiša mare. O ile a latelela monkgo woo gomme a fihla motseng wo mongwe fao a hweditšego batho ba emeleditše dipitša tšeo di bego di apeile dinama. Setšhaba se se be se tsebega ka mekete ya sona. Nkanyezi ga se a ka a leka ditatso tša dinama tšeo tša bona. Morago ga go ja sesola sa gagwe, o ile a hlalošetša ba bagolo ba motse mabapi le leeto la gagwe la go bušetša moya wa go keteka go batho ba gabo.

Letšatši le le latelago, lekgotla la go apea le ile la mo utollela sephiri sa senoki seo sa go tliša tatso ye monate ya nama. "Morwedi wa rena," ba realo, "ka dinoki tše, re go tshepiša gore batho ba tla ja wa mpanapalega! Re go fa mpho ya dijo tše dibose." Nkanyezi o ile a leboga ba bagolo gomme a tšhela dinoki ka mokotleng wa gagwe. O be a tseba gore o swere tšohle tšeo a di hlokago. Ka mafolofolo a maswa, a thoma leeto la gagwe le letelele la go boela motseng wa Ndlovu.

Ge a fihla gae, badudi ba be ba mo kgobokanetše ba nyaka go kwa tša leeto la gagwe. O ile a ba hlalošetša dinonwane tša dilo tšeo a di bonego, a di kwilego le tšeo a di jelego. O ile a bula mokotla wa gagwe gore a kgone go abelana ka dimpho tšeo a tšwago le tšona. Badudi ba ile ba thabela go amogela dimpho tšeo tša matsaka. Mabobo a ba bangwe le tlhohleletšo ya Nkanyezi di tlišitše mmala, koša le mmino go batho. Ka go realo, moya wa go keteka o ile wa tsošološwa motseng wa Ndlovu.