Khale ka khaleni, a ku ri na wanuna loyi a a ri na mbanga leyikulu enengeni wa yena. A nga koti ku famba kumbe ku yima. Wanuna loyi a tshama etikweni na nsati na vana va yena.

Vatekani a va ri na majaha manharhu na nhwanyana un'we. Vito ra nhwanyana a ri Nangila. Ntirho wa yena a ku ri ku hlayisa bava wa yena. Vafana a va tirha emasin'wini na ku risa swifuwo.

Nangila a a ri nhwanyana wo saseka. Vaakitiko hinkwavo a va tsakela na ku n'wi xixima. Vatswari va yena a va lava nuna wa kahle wa Nangila. Va bohile mhaka yo tika leswaku ku ta kumeka wanuna wa kahle.

Un'wana na un'wana loyi a fanele ku teka Nangila a a fanele ku kuma murhi ku suka etiveni ra le kusuhi. Murhi lowu a wu ta horisa xilondza xa bava wa yena. Kambe tiva a ri tele hi mimoya yo biha.

Van'wana vavanuna va ringetile ku kuma murhi kambe a va vuyangi na nchumu. Van'wana vavanuna a va swi kotangi ku vuya etiveni.

Nangila u ve a vilela. Hambi va ri vabuti wa yena a va zangi va ya etiveni. U tekile xiboho xo lava murhi hi yexe. Mhani wa yena u te, "Nhwanyana wa mina, u ta swi kota njhani ku humelela, loko vavanuna vo tiyela va tsandzekile?" Kambe Nangila a a tekile xiboho.

Endleleni loko a ya etiveni, Nangila u hlanganile na xikhekudyana xi rhwele tihyunyi. U pfunile xikhekudyana ku xi rhwalela tihanyi. Xikhekudyana a xi tsakile. Xikhekudyana xi te eka Nangila, "Ndzi ta ku byela hilaha u nga fikelelaka tiva ra ku kwetsima hakona na leswi u faneleke ku swi endla loko u fika le."

Loko a fika eribuweni ra tiva, Nangila u vone ndyangu wo kwetsima wu nwa na ku cina. U yimile a hlalela. Ha xinwexin'we xipuku xi khomiwile hi vurhongo.

Endzhaku ka loko xipuku xi khomiwile hi vurhongo Nangila u nyuperile a nghena etiveni. U kumile murhi kutani a wu hoxa ebegeni ya yena. Loko a karhi a hlambela a tlhelela emisaveni, magandlati a ma ri lamakulu kusuhi na yena.

Loko Nangila a fika eribuweni swipuku a swi phaphukile. A a chava, kambe u yimbelerile risimu leri a nga dyondzisa hi xikhekudyana. Mina, nhwanyana wa Wekesa, Ndzi huma etiveni. Ndzi tile hikuva vavanuna va chava ku ta la. Bava u lava murhi lowu ku tshungula xilondza xa yena. Hikokwalaho ndzi nga la, eka ndhawu leyi vanhu vo tala va chavaka ku fika, Ka n'wina mi nga tihosi.

Rito ra Nangila a ri tsokombela ku kondza swipuku swi kala swi n'wi kombela ku swi yimbelelela nakambe. Ku yimbelela ka yena ku swi endle leswaku swipuku swi tlhelela eku etleleni. Endzhaku ka sweswo Nangila u tsutsumile hi rivilo swinene ku kondza a fika etikweni ra ka vona.

Un'wana na un'wana a rindzele ku vona Nangila a vuya. Endzhaku ka loko a tshungurile xilondza xa bava wa yena u kotile ku tlhela a yima. Tiko hinkwaro ri cinile na ku themendhela Nangila.