M nyan ni Kakuma aatingbaan la, nima chee tonn le ki kuun, ikokonn aasui wiir nima pam le iŋoo wiir jer binib. Hali kinyaŋ ni mamaŋ ŋmin le chii, ŋiboo siib kina le bi nima. Binib pam le joo chechee cha ligɔr.

Kichakpiik kiba daal le m na yin mi le ki len ke, "Etabo, din wee aa ga kan ŋibin ŋiloob. Ti kpa ipiin ibaa ti tii sin." "Ni ye ba? Ni ye ba?" M nan baa kijejek ni. "Ti ga fu yoor loor buen Eldoret aanyaŋ ni," u nan gar u, "Le ti ni sin le ga fu dii buen" Ma jan aasachonl kitisakpeŋ ni! Ni nan muar mi ti jer maa nan ŋman m geen kinyeek gbaan.

Na wonl ti fu Kakuma aaloor mam aa sii nin chee na, m nan sil n na ni n puul aasisik ni la le ki yii ma naŋaan aatadakl ni ma bɔkur mamanl. M na nan fɔk le m puul mu gbei, m nan bi siib kina bisisik ni.

Loor nan gbii pam, kina pu na, m nan ka m na aatapanl pu la. Kitotoŋ ni mmuan nan cha ni ŋun mi, le m geen ni taa ti fu le kaa nan kan niba.

Taa nan ti fuu Eldoret aanyaŋ na, nwiin nan la bi puur la. Upii uba nan ka kinyaŋ aabusamɔb kɔɔ ŋijikabim. Bijab bilee biba nan bi Kiloloŋ kiba ponn ni ki bi gobr bi di wuljo bil. Kiloloŋ kiken mu ni upii geŋgeŋ uba nan si joo lampaab naŋaan uba. "M na, m na, lik lampaab wee!" Amaa m na nan daa mi siir nima che.

Libool liba nan bi Kinyaŋ aasisik ni, bi nan kɔɔ ŋisubil aabɔŋ. Ŋibam, ma kee kan. M nan baa m na, bi yin ŋisubil ŋee kinye? U nan mɔk ŋibam: "Ŋee ye ŋinyɔk, le ŋee ye guava mam." Le m fenn le ki len ke, "Ka ŋimina?"

Ŋisubil ŋi mɔk nan bi libool gbaan ni na, m nan gee apple mam le sakpen. M nan gee na bi pu na la. M nan dakl ke, ka ni ga li bi kinye. M nan fenn lik m na le ki len ke, "Aa ga ŋmaa daa niba tii mi ii?"

N-yoonn mu u di apple gbaan tii min na, le m di u ŋal lii, le ki di iŋal ilee chuu apple gbaan le ki juu. Ma nan kee ŋman lisubil ni mmuan ke ma nan ŋman apple gbaan pu na. Tiwan ni aabɔr nan muk mi na le nan ye ma apple.

Ma ŋman apple gbaan doo na, le m yoor m yil ke m len m na chee tibɔr. Amaa waa nan ki bi nima! M nan lik ta nan nyan ni nichee na, amaa m na ni m puul aa nan bi. M nan lik m gii, le ki lik m gan. Amaa ma nan waa bi niba chee. "Aa kan m na aa?" M nan baa bipiib bi nan bi kɔɔ wuljo na. Ba nan gar mi. M nan piin ki bi wii.

Na yunn le upii uba chuu m ŋal le ki di mi buen niba chee, mbim biken nan bi nima. Uja gbingbei aan ki kpa tilangbakokor sakpen na nan baa mi, "Bi yin si kinye ubijabo?"  "E-ta-bo," M nan gar u tinyunyun ni.

M nan dakl nsui ni ke ka bi kɔɔ mbim mu kinyaŋ ni ii. M nan di cha iwiir le ki lik ke unii uba ga daa mbim bi bi kidiik gbaan ni na aa. "Min le bi ga di paan buen," M nan dakl nsui ni. "Le maan ki kunn linampal!" M nan ki piin ki bi wii.

Ma ŋun uja sakpiin u kpa lilangbanl li wiir na bi len ke, "Etabo bi la chee" le m moo wii mpuan. "Ka ma ban m dii si buen!" M nan wii. M nan san u chee.

M na ni m puul aa nan ŋunn ma yimbil na, le bi san koo ni kidiik gbaan ni. "Etabo, Etabo" nneel mu m nyi na nan yin. Ni nan ye m na la.

Ma fii m ti bob chuu m na na, le m puul len ke, "Etabo, ti ba bi ban si ti di sa mawiindaal aapiin le tii si." Le kilook sakpeŋ kiba ni, u daa nyan ni lampaab naŋaan. "Ni ye sin yaan la!" u nan len.