Cango cango obedo Kere ma i lwoŋo ni Ranga. Oyido bedo i tindi pere gi dhako pere kodi nyare ma i lwoŋo ni Nyajuria. Nyajuria oyido obedo nyako ma ŋon ma kis nyicwo oyido mito nywomo. To Kere oyido mito lim mathoth swa kwoŋ nyare no.

Oyido nitye rwoth ma dwoŋ swa ma i lwoŋo ni Sugulu. Oyido kis dhano je winjo go. Go oyido jakeme ma nyalo kada nekin ka i cayo go. Cipa rwoth Sugulu otho aka oyido rango dhako man aywoma.

Rwoth oyido oti aka opoŋ. Okidho both kere tero rigo lim kwoŋ nyare no. Oyido kere nitye gi jatic ma i lwoŋo ni Nyaithe. Nyaithe owinjo paka kere gi rwoth jo pido kwoŋ lim ma nywomo Nyajuria. Nyaithe oyido omare gi Nyajuria swa.

Rwoth oyere miyo kere adec ma lim pere. To yeyo kir medo go gi piso ma kwoyo nanga. Can je ma miyo Nyajuria nywomirok gi rwoth otim nyaliŋ liŋ. Kere oyido oŋeyo paka nyare ki le kisangala gi yeyirok pere no.

Munyo ndelo cegin tundo Nyaithe okidho both Nyajuria. Nyaithe owaco ri go ni, "Nyar kere ma amaro, kere otyeko yiko can ni rwoth ma i lwoŋo ni Sugulu wo nywomin, aka le timere ma yot yot won."

Nyajuria obwok aka kutho ku ŋeyo kada gir atima. To waco ni, "A ku nywomere gi Sugulu de be. Jal ma opoŋ m'oti no. Be de be! Aripo redo akidhi both Owesa awac rigo wonen gir atima ma piyo piyo." Owesa oyido obedo mbego pa Nyajuria.

Nyajuria okwale wor no wok i tindi. Bamere kuŋeyo kama go okidho iye. Di obedo gi keme ma thoth bedi ŋey. Nyajuria oŋweco baro lul m'otwere, macol kalo gote gi gote. To tundo i ot pa Owesa munyo ool tektek.

"Owesa openjo Nyajuria ni, "Mbego paran, iraŋo i ŋweco wok ka mabor no je kendin aka i piny macol ama?" Owesa ku nyalo bedo kanyacel ni wo kuri Nyajuria wo luwi."

Owesa openjo go ni, "Nyar kere paran ma amaro, teko aŋo?" Nyajuria o omo ywe gi malo to waco gi gut ni, "Baba riyan nywomirok gi Sugulu. To akinyal nyomirok gi nger jalo. Owesa, amito nywomirok kod in kada i ja candi. Ayeyo candirok kodin. Amarin."

Owesa oywak to waco ni, "Nyar kere, i ŋeyo paka anyath jacandi, angoye gi gimoro ma nywomin gine." Nyajuria odwoko ni, "Aŋeyo, to in kende ama ale nywomere gine." Nyajuria oparo to waco ni, "Owe both Jakitoga, wo cew wan loka ca. Wakadhi kama baba ku nwaŋ iye wan."

Kere onyaŋ paka Nyajuria orwenyo. To waco ri jegin pere rango go kis kamoro. Jegin kodi kis dhano jo rango nyar kere, to jo ku nwaŋo. Jo gik to jo waco ri kere paka Nyajuria ongoye. Kere owaco jo ni, ''Kendo gik win wi rangi." Oyido keme omako go moasere."

Nyajuria kodi Owesa jo redo kidho dho malawa. Ponde ponde ocokere to umo polo munyo jo fodi jo ku tundo. Koth oyido bino. Aka oneno paka oyido le cwe koth mapek.

Jo nwaŋo munyo Jakitoga tweyo ye pere i thengi malawa. Owesa okwayo Jakitoga cewo jo loka. Jakitoga okwero munyo waco ni koth madwoŋ eno bino piyo piyo, aka nyalo ŋolo jo i pi.

Owesa oriyo Jakitoga aka otito ri go iraŋo jo ripo por loka koca. Gikenyo olutho cinge i migowa, owodho dambula moromo to miyo Jakitoga. Geregere omako Jakitoga munyo owinjo ywak pa jo to neno dambula ma omiy go. Oyere cewo jo kalo malawa kada nende oyido koth obino ma rac.

Munyo kere kodi rwoth jo tundo i thengi malawa jo neno ji adek i ye. Jo nyaŋ paka mbego jo kwale. Asur obino, oulo pi, oyengo ye ma ye odhyero Jakitoga cewo. Kere okoko ni, "Nyujuria, mondo dwoki! A cwakin. Aku miyin gir'acula. Kiri Owesa je aku miy gir'acula."

Oyido ye otyeko mer. Ye oluŋere to bolo mbego gin gi jacew je to jo podho i pi. Wok ndir no, kis dhano ma nitye i ker pa kere Ranga ocako nywomo anywoma ŋat ma go omaro. Obedi ni ja ŋaŋo kosa ja candi.