Kale saana kwali umukashana ishina lyakwe ni Kalabushe. Umukashanooyu aali cilandisha. Banyina balimukenye ukulandisha leelo Kalabushe taumfwilile.

Bushiku bumo, banyina mwaice bakwa Kalabushe abaleeikala kwishiilya lya mumushi mwaleeikala Kalabushe baalilwele.

Baana Kalabushe ubu ubushiku baalikwete imilimo iingi saana. Pamulandu wancito, icungulo bushiku elyo baapeele Kalabushe ifyakulya ukuti atwale kung'anda yabanyina mwaice.

Ilyo aleetwala ifyakulya, Kalabushe akumenye Sinson, Cimbwi uwayalwike nookumoneka kwati umuntu.

Cimbwi aipwishe ifyo Kalabushe asendele. "Inama, amani noomukaka," efyatiile Kalabushe. Banyina bamwebele ati elaasosa ifyo asendele.

Nakabili, Kalabushe aebele Cimbwi ukuti banyina mwaice baaliilwele nomba aleebatwalila ifyakulya. Pakumfweefyo, Cimbwi amate yaambile ukwisa mukanwa kakwe ilyo antontokenye panama iyo Kalabushe asendele.

Cimbwi bwangu-bwangu aabutukiile kung'anda yabanyina mwaice bakwa Kalabushe.

Cimbwi aminine banyina mwaice bakwa Kalabushe aafimbana noobulangeti bwabo.

Ilyo Kalabushe aafikile, mung'anda mwalitondolo. Kalabushe aingile mung'anda nookwita, "Maayo, muli kwi?"

Ilyo amwene ukuti tapali uuleesuka mukwita kwakwe, Kalabushe aingile kumuputule baaleelalako banyina mwaice. Caalimupapwishe, ilyo amwene umuntu naifimba ubulangeti ubukulu.

"Maayo, cinshi amatwi yeenu leelo yamonekela ayakulu?" Kalabushe aipwishe. "Pakutila ndekumfwa bwino," efyaaswike Sinson mubulangeti.

Kalabushe aipwishe nakabili, "Maayo, ninshi amenso yenu leelo yaleemonekela ayakulu?" "Pakuti ningakumona bwino," Cimbwi aaswike.

Kalabushe aipwishe cakulekelesha, "Maayo, cinshi akanwa kenu kaleemonekela ukukula ileelo?" "Pakuti ningakumina." Apopeene cimbwi efyo atolokele Kalabushe nookumumina.

Pamulandu wakuti Kalabushe aali cilandisha, atwaliliile ukulanda mukati munda yakwa cimbwi. Aipwishe ameepusho ayengi.

Mukulekelesha, cimbwi aalinakile kumeepusho yaleeipusha Kalabushe icakuti antontokenye ukufwisa Kalabushe.

Kalabushe pamo nabanyina mwaice efyo babapuswishe kubekalamushi. Ukufumeelyo Kalabushe aalileekele ukulandisha kubantu abo taishibe bwino-bwino.