Ukutalaala kwampepo kwalipita. Ulusuba lwali mupeepi mumushi wakwa Nkanyezi icakuti abeekalamushi baali nookukolongana mukusekelela ulusuba. Nkanyezi aleeloleela uku ukusefya kwa mulusuba ukucila ubushiku ubuli bonse mumwaka.

Bushiku bumo uluceelo, Nkanyezi aumfwile abakalamba baleelanshanya pali uku ukusefya. "Abantu ba mumushi mwa Nsofu baalilufya umupashi wakusefya," efyo bamo baisoseshe.    "Kuti twasefya shani mumushi umo abantu baalaba ifyakusefya?" efyo nabambi aipwishe.

Nkanyezi aliisakamene. "Kuti akasuba kabala shaani ukwabula ukwimba pakuti tushibuke mutulo twa mpepo?" Nkanyezi aalitontonkenye panshita iitali.    "Ningile ukusanga ifyo twalufya," efyatontonkenye Nkanyezi. "Ningile ukuyafwaya ifintu ifikaleeta ukufwaisha ukusefya mumushi weesu."

Abakalamba bamumushi baalimupaalile pabulendo ubo aali nookukwata. Baalimupeele icoola cakulongamo ifipe ifyo aali nookusanga. Nkanyezi aumfwiloomwenso leelo aali neecitetekelo cakuti akabomba umulimo bwino-bwino.

Nkanyezi alyendeloobushiku bonse. Aniinine impili kabili nookwikila. Aabwikoomumana uwali uukalamba nookupita mufimabwe ifyayatwa. Aendele mwilungu nookuyafika kulya kucinshingwa campili shakashika.

Ilyo paambile ukufiita, Nkanyezi afikile mumushi baleetila umushi wamapatani elyo namalangi ayo tatalile amonapo mubuumi bwakwe. Uyu mukashana aebele abakalamba bamushi ifyo aendele pakutila engabwesha umupashi wakusefya kubantu bakwe. Banakulu bantu mumushi baapeele Nkanyezi icabupe. Baatile, "Mucitemwiko tuleekupela iyi penti ukutila inga bwesha nakabili amakaala kumushi uushisanika." Nkanyezi aalitemenwe nookutootela abakalamba kabili abikile napenti mucoola cakwe. Luceelo-ceelo, ubushiku bwakonkelepo, atoolele ubulendo bwakwe kabili alikutemenwe pamulandu wacabupe ico bamupele.

Nkanyezi alyendele ubushiku bonse. Apitile mupanga iikulu iyakwateemiti iyitali. Ilyo bwailile, aumfwile ng'oma shileelila. Eico aendele bwangu-bwangu ukuyookwaleelila ing'oma. Aumfwile amaka yakucinda yaleeisa mumakasa yakwe nelyo yanakile.

Nkanyezi aisangile mumushi waBubezi. Asangile abantu nabeekala kabili nabashungulukoomulilo elyo baleelisheeng'oma nookwimba. Aebele abakalamba bamumushi umulandu aendele uwakufwayookubwesha umupashi wakusefya kubantu bakumwabo. Abantu bamumushi wa Bubezi baamulombele ukutila atushe nokulaala ubushikufye bumo.

Uluceelo, imfumu yaitile Nkanyezi. "We mwana wandi," imfumu yatile kuli Nkanyezi. "Buule ng'oma iyi iyaibela. Cila nshita wailishapo, ilila ulwimbo lupya." Nkanyezi atooteele bakalamba bamumushi, abuulile ng'oma nookubika mucoola cakwe. Lyene, atwalilile noobulendo naatemwa nganshi pali ici caabupe cang'oma.

Pabushiku bwacitatu ubwa bulendo bwakwe, apitile peebala lyalimo ingo'mbe shaina, aumfwile mumona mwatampa ukubaba. Aumfwile ifyaleenunkila icakutila calimupele icilaka cakulya mukanwa. Aakonkele ukwaleefumina iceena. Umwanakashi uyu ilyo afikile asangile abantu nabeeminina kabili nabakwata neempoto ishakweteenama iyaipikwa bwino-bwino.    Aba abantu baalishibikwe bwino saana palyashi lya ukusefya. Nkanyenzi tatalileelyapo ifyapekenishiwe ngeefi mumweo wakwe.

Ubushiku bwankolepo, abakwipika baamupeele umukashanooyu utwakubika mufyakulya utwanunkila uto baishibefye abeene. "We mwana wesu," efyo batiile, "nootu utwa kubika mufyakulya abantu kwikuta teebufi! Tuleekupela ubupe bwafyakulya ifisuma." Nkanyezi atooteele abakalamba mumushi. Aliishibe kuti aliikwete fyonsefye aleekabila. Namaka cipyacipya, atampile ubulendo bwa kubwelelemo kumushi kwa Nsofu ukushaileepeele.

Ilyo afikile, abamumushi baalilongene ukuti bomfwe ifyo aendele. Abeebele ilyashi lyafintu amwene nookumfwa. Elyo aiswile icoola cakwe nookwakanya ifyabupe ifyo bamupeele. Abantu bamumushi balisekeleele pakupokelela ifyabupe. Bukapekape bwa bantu bambi nookukosa kwakwa Nkanyenzi efyalyengele ukuti ukusefya mumushi mwa Nsofu kutendeke nakabili.