Kale saana, kwali abantu abaupeene babili abali abapiina. Mung'anda yabo mwalifye umwana umo uo batemenwe saana. Ishina lyakwe ni Nonkungu. Ilyo akulileko, abafyashi bakwe batontonkeye ukuti akayemukwikala nabanalume abakankala ba Mutonyama. Ilyo talaaya banyina bamubiliile ifyakufwala ifisuma ifyakwete amaliboni namabatani noobulungu. Bamupangile notwakuikobeka mumukoshi. Elyo Nonkungu aimine ubulendo bwakuya kumushi kwa banalume.

Ilyo aendele intamfu iitali, afikile pakamana ako atolweke. Ilyo atolwekefye akamana, asangile umukashana afwele ifyakufwala fyasampauka. "Uleeya kwi?" efyaipwishe umukashana. Nonkungu atiile, "Ndeya kuli bayaama ba Mutonyama. "Cawama. Ba Mutonyama naine ni bayaama. Naine apa uleemona naine ndeya mukubatandalila," efyatile umukashana. Efyo baendele pamo. Ilyo baendelefye intamfu iinono, umukashana aebele Nonkungu, "Lyee! Ifyakufwala fyobe neefya kukobekakobeka fiisuma. Leka mfwaleko.

Elyo Nonkungu afuulile ifyakufwala fyakwe nookupeela umukashana. Nonkungu alipapile pantu ilyo umukashana afwele ifyakufwala fyakwe amwene ukuti aali noomucila. Calengele Nonkungu ukumfwa umwenso. Ilyo amwenefi elyo aishibe ukuti kanshi uyu mukashana ni Mbulu. Lilya baendakofye panoono, Nonkungu atiile, "Mpeela ifyakufwala fyandi noobulungu."

Imbulu yatiile, "Leka mfwale ukufika pacimuti playa." Yasontele pacimuti caali palupili mupepi. Ilyo baafikile pacimuti, Nonkungu aebele Imbulu ati, "Filya twacumfwana, mpeela ifyakufwala fyandi no bulungu." Imbulu yamwaswike ati, "Leka mfwale tufike peebala lilya." Yasontele palupili lwakonkelepo. Nonkungu noomwenso alisumiine.

Ilyo baafikile peebala Nonkungu alombele Imbulu ati, "Mpeela ifyakufwala fyandi noobulungu." "Lekafye mfwale mpaka tufike pansaka apo abanakashi beekeele." Efyo imbulu yatiile. Yasontele kunsaka iyaali apataliko. Ilyo baafikile pakayanda, Imbulu yasunkiile Nonkungu kunuma nookubutukila kuntanshi.

Imbulu yatiile kuli baanamaayo, "Moneeni uyu mukashana afwele ifyasampauka. Ankonkele akasuba konse. Kuti natemwa aya." Baanamaayo baalipilbwike nookulolesha Nonkungu. Aali noomwenso saana icakuti abuutukile mwitanga lyang'ombe. Elyo Imbulu yaile kung'anda yabanalume Nonkungu, ba Mutonyama. Yaatile, "Nine mwipwa wenu Nonkungu. Abafyashi bandi nabantuma ukuti njise mukwikala naimwe."

Ba Mutonyama noolupwa lwabo, balimupokelele umukashanooyo kabili baalimutemenwe. Nonkungu mu bulanda aleele mwitanga kabili aliile ifyakulya fyambwa. Akasuba abeleeme mumabala elyo aleeimba ulu lwimbo: "Nacuula ine, nacuula ine. Baataata nabaamaayo bantumine mukwikala nabaayama ba Mutonyama. Munshila nakumenye Imbulu yabuula neefyakufwala fyandi noobulungu bwandi. Nacuula ine, nacuula ine."

Bushiku bumo umwana ibeli uwaba Mutonyama umwaume aleenda mwibala elyo aumfwile ulwimbo lwabulanda. Taishibe uwaleeimba ulwimbo, leelo ilyo afikile kung'anda aebele baawishi ifyo aumfwile. Ba Mutonyama baaile kumabala. Ilyo baumfwile ulwimbo, baalilolekeshe nookusanga Nonkungu.

Nonkungu aebele banalume ifyacitiike fyonse. Ba Mutonyama bamusendele bamutwala kumushi nookumufisa mung'anda. Baalishiibe bwino ifyakucita pakwikata imbulu. Ba Mutonyama baalishibe ukuti umucila wambulu walitemwa umukaka. Imbulu teekuti ipite apali umukaka ukwabula ukunwapo. Eco ba Mutonyama baatumine abantu baabo ukuti bembe icilindi icikulu nookwisushamo umukaka.

Ba Mutonyama baalitile abakashana bonse abamumushi ukuti beese bangaleko ubwangalo bwakutoloka. Imbulu yalisakamene. Taleefwaya ukutoloka icilindi. Yaalishibe ukuti umucila walaakwata icilaka camukaka.    Yaaingile mung'anda yaakakile saana umucila kumubili. Ilyo yapwishishe yaile ikala nabakashana bambi abaleeangalako ubwangalo.

Abakashana baatolweke icilindi umoumo. Inshita yaalifikile iyakuti imbulu itoloke. Yaalyeseshe ukutoloka apatali leelo umucila walikakwike. Umucila waitintile panshi mpaka yaponeene mumukaka.

Ilyo imbulu yaaleepalakata mumukaka abalumendo baayambile ukushiika icilindi noomucanga mpaka baishiikile yonse. Nonkungu aikeele nabanalume inshita iitali munsansa.