Kale saana, kwali umwaume uwakweete icilonda icikulu saana pakuulu. Taleeiminina nelyo ukweenda. Uyu umwaume aleeikala noomukashi nabaana bakwe.

Mucuupo caabo, bakwete abaana abaume batatu, noomwanakashi umo. Umwana umwanakshi ewali Nangila. Ewaleesunga bawishi. Abaume baali abalimi kabili bali nibaakacema.

Nangila aali umukashana umusuma saana. Abantu bamumushi bonse baalimutemenwe nookumupela umucinshi. Abafyashi bakwe baaleemufwaila umwaume umusuma. Pakutila basange umwaume uwacindama, baalipeele ncito iyaafya ku uli onse uwaleefwaya ukuupa Nangila.

Uwaleefwaya ukuupa Nangila aali nookuleeta ukufuma muli bemba uwaali mupeepi noomushi. Umuti uyu waali nookuposha icilonda cabawishi Nangila. Nomba muli bemba mulya mwaiswile imipashi iyabipa.

Abaume bambi baalyeseshe ukusenda umuti. Nomba baalifililwe.    Abaume bambi baalifililwe nookubwelela kumushi.

Ilyashi li lyalimusakamike Nangila. Bamunyina abaume baaleefilwa ukuya kuli bemba. Nangila, aliipeeleshe ukuyafwaya umuti uyo eka. Banyina batile, "Mwana wandi, ifi abaume abamaka bafililwe iwe niwe winga kumanisha?" Nomba Nangila aliipeleeshe kale.

Palwendo ulwa kumumana, Nangila aasangile akakote akasendele nkuni. Nangila aaliikafwileko ukusenda inkuni.    Aka akakote kaalitotela saana. Katile kuli Nangila, "Nalaakweba ifyo wiinga kumana neemipashi iya muli bemba neefyakucita nga wafika kulya."

Ilyo afikile pali bemba, Nangila amwene imipashi yalupwa lwakwe ileenwa amenshi nookucinda.    Umukashana atendeke ukuloleela nookulolekesha mpaka ilyo imipashi yaleele mutulo yonse fye.

Ilyo imipashi yali nailaala, Nangila aipoosele mumenshi. Aasangile umuti, aubika namucoola cakwe. Ilyo aleeowa ukubwelela kumulundu, amabimbi yaliimine yamushinguluka.

Ilyo Nangila afikile imipashi yalibukile. Alitinine nganshi nomba aimbile fye ulwimbo akote kalya kamusambilishe: Ine, nine mwana wakwa Wekesa, Nafuma kuli bemba. Naishile pamulandu wakuti abaume balaatina saana ukwisa. Baataata baleefwaya umuti uyu ukutila ukaposhe icilonda cabo. Eifi nasangwa kuno, Mucifulo umo abengi batiina ukufika, Pantu nimwe bacilolo.

Nangila aalikwete shiwi ilisuma icakuti imipashi ilya yaamulombele ukuti embe kabili nakabili.     Ilyo aleeimba, imipashi yabwelele mutulo. Nangila abutwike ulubilo ulwakupapusha mpaka ilyo aingile mumushi.

Icaalo conse caleeloleela ukubwela kwakwa Nangila.    Ilyo bapwishishe ukubomfya umuti uwa muli bemba, bawishi balitampile ukwenda nakabili.    Umushi onse watampile ukucinda nookutasha umukashana, Nangila.