Kale saana, kwali imfumu yaleeitwa Kayanja. Yaleeikala mwisano na baana mfumu noomwana umwanakashi ishina lyakwe Apenyo. Apenyo aali umwanakashi umusuma saana icakuti umwaume uuli onse aaleefwaya ukumuupa. Leelo imfumu yaleepingula impango ishingi isha kulipila pakuupa umwana mwanakashi waiko.

Mupeepi na kwisano kwa Mfumu Kayanja, kwaleikala imfumu baleeita, Aludah Mukulu. Baaleemwita ati "Mukulu" pantu uko aaleeikala, bonse baali mucindike. (Taleepanya uushaleemucindika!) Abakashi bamfumu Aluda tapaakokwele saana apo bafwilile kuli malalia. Kanshi yaaleefwaya ukuupa nakabili.

Kanshi imfumu iyaina iikote Aludah yaile ku mfumu Kayanja mukulipila ulupiya lwa kuupila umwana wamfumu. Ilyo aba baume baaleelanshanya pamutengo wakulipila, umubomfi mwanakashi Kakembo aaleeumfwa ifyo baleelanda. Kakembo baaleeumfwana saana na Apenyo.

Imfumu Aludah yaasumiine ukupeela hafu wacuuma caiko ku Mfumu Kayanja, ukusanshako inshindano ya kubilila iyaali nookubiikwa pa mpango. Amapekanyo ya bwinga bwa mfumu Aludah na Apenyo yaacitilwe mubumfisoolo. Imfumu yaliishibe ukuti umwana wa iko umwanakashi taatemwe ifyo icitile.

Ilyo kwasheele umulungu umo ukuti ubwinga bwa mfumu bubeko, umubomfi mwanakashi Kakembo aile kuli Apenyo. "We mwana mwanakashi wamfumu, baawiso baalipekanya ubwinga boobe neemfumu Aludah. Bukabako panuma yauno mulungu," efyasosele Kakembo.

Apenyo umwana mwanakashi wamfumu aalipapile saana icakuti pakubala taishibe neefyakucita. Elyo atontonkenye, "Nshakatale ngupwa kumfumu Aludah. Balya baume abakote kabili abaina. Nshakatale! Ningile ukuya kuli Trevor mone ifyo engacita ilyo tacilaaba kuceelwa." Trevor aali ni cibusa wakwa Apenyo umwaume.

Ilyo bwailile ubushiku bulya bwine, Apenyo aafyukile afuma mu cipango. Bawishi abeeshiba uko aaleeya nga bafulilwe cibi. Abutwike ukupita mumpanga yatikama umwafiita, pamabwe neefimpusa mpakafye afikile kuli Trevor wakwe. Ilyo afikile pang'anda yakwa Trevor ninshi naanaka kabili aali neecilaka neensala.

"We mutemwikwa wandi, mulandu nshi wabutukila intamfu yaleepeefi weka iyi nshita ya bushiku?" efyaipwishe Trevor. Aamuleetele amenshi nookumuleka atuusha. Trevor aalifililwe ukwikala ilyo aaleelolela Apenyo ukulanda.

"We mwana mwanakashi wamfumu, bwafya nshi bulipo?" efyaipwishe Trevor. Apenyo aapeemesha elyo atila mubulanda, "Baataata baaleefwaya ukungufya ku Mfumu Aludah Mukulu. Tekuti ngupwe kuli balya baume baabipa. Trevor ndefwaya ukupwa kuli iwe nangu uli mupiina. Ninjipekanya ukucuula. Naali kutemwa."

"Nomba we mwana wamfumu, nshakwata ulupiya lwa kulipila impango shobe. Waalishiba ndi mulumendo umupiina," efyailishenye Trevor. Apenyo atile, "Naliishiba, leelo niwe fye ningopwako." Atontonkenye pakashita kanono, "Natuleeya kuli Kategga uwoba amaato atwabushishe kwishilya lya mumana pakuti tubutuke na baataata tabaakatusange."

Kwisano, imfumu Kayanja yaishiba ati Apenyo naaya. Yaeba abakumufwaya mumushi monse. Baakabilo bamfumu, abashilika na bonse baalifwaile leelo tabaamusangile Apenyo.    Baabwelelemo kumfumu nookuyeba ati Apenyo tabamumwene ukuli konse. "Kanshi kabiyeni kumpanga mufwaye," efyo imfumu Kayanja yabebele. Yaalifulwa saana.

Ilyo Apenyo na Trevor baaleendesha ukuya kumumana, amakumbi yaafita yakolongeene mumulu. Imfula iikulu yaali mupeepi.

Kategga uwooba amaato aaleekulika ubwato bwakwe ilyo Apenyo na Trevor baafikile. Trevor aipwishe Kategga ukubaabusha umumana. Kategga aalikeene no kulondololefyo imfula iikulu saana yaali mupeepi kabili kuti yaleeta ubusanso.

Trevor apatikisha nookulondolwela Kategga umulandu baalingile ukwabukila Elyo aabiikile ukuboko mwitumba aabuulilemo ulupiya apeela Kategga. Ilyo Kategga aumfwile ilyashi lyabo kabili amwene ulupiya, abomfwilile uluse. Aalisumiine ukubaabushisha kwishilya lya mumana temulandu neefyo imyulu yaali.

Kategga atintiile ubwato mupeepi noomumana elyo abeeba ukwingilamo. Elyo abuulile ifyakoobelako atendeke nookooba. Ilyo imfumu Kayanja neemfumu Aludah bafikile kumumana, baamwene abantu batatu mubwato. Elyo baishibe ukuti Apenyo na Trevor nababutuka.

Icipupu icikali catendeke ukusunkanya ubwato kabili Kategga aalifilwa ukubukontolola. Imfumu Kayanja yapundile, "Apenyo, napapaata bwela! Ninkwelela. Nshakakucite icili conse iwe nelyo Trevor."    Nomba caali kuceelwa. Ubwato bwalipilibwike na bantu batatu baponene mumenshi. Bonse baalinwina. Panuma yabulya bushiku, uuli onse mu bufumu bwakwa Kayanja aali nookuupa uo atemenwe umukankaala nelyo umupiina.