Kutontola kwamupeyo kwakaliindide. Kwakali kuboola cilimo mumunzi mwaakali kukkala Nkanyezi. Aboobo bantu bamumunzi bakeelede kuyakubungana kutegwa basekelele cilimo. Nkanyezi wakalangila pobwe lyacilimo kwiinda mazuba oonse mumwaka.

Bumwi buzuba acikasaalizi, Nkanyezi wakamvwa bapati bamumunzi kababandika makani aapobwe. "Bantu ba mumunzi wa Muzovwu babula luyandisyo lwakusekelela," umwi wakayoya. "Mbubuti mbotunga twaba apobwe mumunzi muli bantu bakaluba kusekelela?" wakabazya umbi.

Nkanyezi wakakatazyigwa. "Ino zuba liyakubala buti kuti naa tiitwaimba kutegwa tulibusye kuzwa kung'onzi zya mupeyo?" Nkanyezi wakalibuzya mumoyo. Mpoona wakayeeya kwaciindi cilamfwu. "Ndeelede kuyanduala ncotwakasowa," mbwaakayeeya Nkanyezi. "Deelede kuunka nkeyaabuyandaula zyintu ziyakuleta kuyandisisya kusekelela mumunzi wesu."

Bapatipati bamumunzi bakaleleka lweendo lwa Nkanyezi. Bakamupa cibbeeke cakuyakubikkila zintu nzyayakujana. Musimbi ooyu wakaliyoowede pesi wakalijisi lusyomo kuti uyakucikonzya.

Nkanyezi wakeenda buzuba boonse. Wakaatanta malundu akuselemuka. Wakakosola mulonga mupati akwiinda akati kamabwe abosya. Wakavwakauka muzibanda limwi wasika mucimvwule camilundu isalala.

Nokwakatalika kusiya, Nkanyezi wakasika kumunzi wazizeku a mibala njatanabwene. Wakaambila bapatipati bamumunzi ooyo muzeezo wa lweendo lwakwe. Muzeezo wakali wakuleta luyandisyo lwakupobola akati kabantu bamumunzi wakwe. Mumama wamunzi ooyu wakapa Nkanyezi cipo. Wakaambila musimbi ooyu kati, "Muluyando twakupa cipego eeci cazizeku. Ciyabukulusya bube bwa bantu batyompedwe." Nkanyezi wakalumba bapati bamunzi mpoona wakabikka zizeku zyamibalamibala mucibbeke cakwe.

Buzuba butobela, cifwumofwumo, wakazumanana mulweendo lwakwe alimwi. Nkanyezi wakeenda buzuba boonse. Wakainda mucisaka cipati cakajisi masamu malamfwu. Nokwakasiya, wakamvwa ngoma zilila. Wakeenda cakufwambaana kuya kwakalikulila ngoma. Luyandisisyo lwakuzyana wakalumvwa kalusika kuzituta zyakakatede.

Nkanyezi wakalijana mumunzi wa Bbubezi. Wakajana bantu balikkede, bauzinguluka mulilo kumwi bauma ngoma akwiimba. Kunyina naakamvwide kwiimba kubotu mbuli kwaboobu.    Wakaambila bapati bamunzi muzeezo walweendo lwakwe. Muzeezo wakali wakubukulusya luyandisyo lwakupobola akati kabantu bamumunzi wakwe. Bantu bamumunzi wa Bbubezi bakamulomba kuti aone, alyookezye.

Mafwumofwumo, Mwami wamunzi ooyu wakaita Nkanyezi. "Mwanaangu," mwami wakaita, "Njeeyi ngoma yaandeene. Ilaimba lwiimbo lwaandeene ciindi aciindi nooyuuma." Nkanyenzi wakalumba bapatipati bamunzi ooyo akubikka ngoma eeyo mucibbeeke. Wakabweza nzila yakwe alimwi kakkomene kubaa cipego canyimbo azizyano.

Buzuba bwatutu muleendo lwakwe, kaindide tanga lyang'ombe zineneede, wakamvwa mumpemo mwatalika kubaba. Kakamuuma kanunkilizi cakuti wakatalika kusakatila mate mukanwa. Wakatobela kwakalikuzwida kanunkilizi aaka. Musimbi ooyu wakaakusika mumunzi mwaakajana bantu baliimvwi kumbele amipika yakajisi nyama yakajikidwe kabotu. Mukowa ooyu wakali aampuwo kumakani aamapobwe. Nkanyezi taakana buzuba walya zyakulya zyakalikununkila boobu.

Buzuba bwakatobela, bajiki bakamupa maseseke ajatikizya bwakusanganya tununkilizi. "Omwana wesu," bakaamba, "Kubelesya tununkilizi ootu, inga wabona ncobeni kuti bantu bakkuta! Twakupa cipego cazyakulya zibotu." Nkanyezi wakalumba bapatipati bamunzi ooyo mpoona wakabikka tununkilizi mucibbeeke cakwe. Ono wakazyiba kuti zyoonse nzyaakali kuyanda mulweendo oolu wazijana. Kajisi nguzu zinji, wakatalika lweendo lwakujokela kumunzi wa Muzovwu.

Naakasika, bantu bamumunzi bakamuzinguluka kuti bamvwe mbwaakeenda. Wakabaambila zyaano zya zintu zyaakabona, zyaakamvwa azyaakalya. Mpoona wakajula cibeeke cakwe akupandulula zipego nzyaakapegwa. Bantu bamumunzi ooyu bakatangala kutambula zipego ziyandisi. Bwaabi bwabamwi akuliyumya nkwaakaliyumya Nkanyezi kwakaleta bube bwaandeene, nyimbo azizyano kubantu aaba. Aboobo munzi wa Muzovwu wakabukulusigwa.