Kaindi kwakali banabukwetene bobile ibacete. Mung'anda yabo bakajisi biyo mwana omwe ngubakali kuyandisisya ulaazyina lya Nokungu. Naakakomenakomena bazyali bakwe bakayeeya kuti bamutumizye kumunzi kuli baacisyanyina ba Mutonyama. Aaba badaala bakalimvubide kapati. Katanyamuka, banyina bakamusumina zisani zyibontu zijisi malibboni, mabbatani alimwi abulungu. Tiibakagolela biyo waawo alikke pe, bakazumana akumujanina atwakusama mumukosi.

Nakeenda kazizo kalimbuli mbakebede, wakajana kalonga alimwi akukalanduka. Mbwaakakalandukila biyo kalonga aaka, wakaswaanganya musimbi usamide mazakala. "Uyakuli?" wakabuzya musimbi ooyu. Nonkungu wakamvwiila wakati, "Ndiya kumunzi kulibaacisya ba Mutonyama." "Cabota, ambebo ba Mutonyama mbaacisya. Aano mpondibwenaawa ambebo nkwegama ndiya kukubaswaya," wakaamba musimbi ooyu. Eelyo bakatalika kweenda antoomwe.

Aboobo Nonkungu wakasamununa zisani zyakwe akumupa musimbi ooyu. Nonkungu wakagambwa kujana kuti musimbi ooyu nakasamununa wakalaamucila! Eeci cakamupa kuyoowa Nonkungu. Mpoonya-mpoonya wakaziba kuti ooyu musimbi ngu Nabulwe. Nibakeenda asyoonto biyo, Nonkungu wakati, "Ndipe zisani zyangu alimwi abulungu bwangu musa."

Nabulwe wakamvwiila wakati, "Kondileka ndisame mpaka tusike acisamu eciya cilikumbele aalya." Niibakasika acisamu aawo, mbubona biyo mbuli mbubakapanganide, Nonkungu wakati kuli Nabulwe alimwi, "Musa ndipe zisani zyangu alimwi abulungu bwangu." Nabulwe wakamvwiila alimwi wakati, "Kondileka ndisame kusikilia tusika amuunda uuya." Eelyo mukuyoowa, Nonkungu wakazumina.

Nibakasika amuunda, Nonkungu wakalomba alimwi kuti, "Musa Nabulwe ndipe zisani zyangu alimwi abulungu bwangu." "Kondileka biyo ndisame mpaka tusike kukaanda okuya nkobakkede bamaikaintu abaya," wakaamba Nabulwe katondeka. Mbulimbukasika munsi-munsi aakanda, Nabulwe wakamutonkela munsi Nonkungu mpoonya akutijila kumbele.

Nabulwe wakaambila bamaikaintu bakakkede amunzi wakati, "Amulange musimbi ooyu usamide mazakala wiide kunditobela paatalikila, ndiyanda kuti ajoke." Bamakaintu bakacenguluka akumulanga Nonkungu. Wakayoowa alimwi akutija waakuyuba muciba. Mpoonya Nabulwe wakaunka kung'nda kwa baacisyanyina ba Mutonyama akubaambila kuti, "Ndime Nonkungu. Bazyali bangu bakandaambila kuti ndiboole ndikkale andinywe."

Ba Mutonyama alimwi amukwasyi bakamutambula musimbi ooyu akumutondezya luyando. Mucangu Nonkungu wakaile koona muciba cang'ombe kalya cakulya cababwa. Masikati wakalikuyuba mumuunda kumwi kaimba alwimbo oolu, "Maawe ndapenga me, ndapenga me. Ndakatumwa abataata alimwi abaama kuti ndizi kukkale abaacisya ba Mutonyama. Munzila ndakaswaanganya Nabulwe walo wakandinyanga zisani zyangu alimwi abulungu. Maawe ndapenga me, ndapenga me."

Bumwi buzuba, mwanamutaanzi waba Mutonyama wakalikweendeenda mumuunda. Wakamvwa lwiimbo lweenzu alimwi lwabuumba. Taakazi kuti wakalikwiimba nguni pesi naakasika kung'anda wakabaambila bausyi makani aaya. Ba Mutonyama bakaunka mumuunda. Bakaakumvwa kwiimba kwa Nonkungu. Bakamuyandaula kusikila limwi bamujana.

Nonkungu wakabaambila baacisyanyina zyoonse zyakacitika. Mutonyama wakamubweza Nonkungu akumutola kumunzi akumusisa mung'nda. Bakalizyi kabotu-kabotu cakucita kuli Nabulwe. Mutonyama wakalizyi kuti mucila wa Nabulwe ulauyanda kapati mukupa alimwi wakalizyi kuti Nabulwe takozi kwiile kwiinda kakunyina kunywa mukupa. Ba Mutonyama bakabaambila bantu babo kuti basye cilindi cilamfu alimwi akucizuzya mukupa.

Mpoonya ba Mutonyama bakaita basimbi boonse bamumunzi kuti boboole batole lubanzu mumusobano wakusotoka. Eeci cakamuusisya kapati Nabulwe nkaambo taakalikuyanda kusotoka cilindi. Wakalizyi kabotu-kabotu kuti mucila wakwe inga wamvwa nyota yakuyanda kunywa mukupa. Eelyo aboobo wakaunka mung'anda akwaangilila mucila wakwe kumubili wakwe akubonesesesya masimpe kuti wajata. Nkabela wakasangana abasimbi beenzinyina mumusobano.

Basimbi bakasotoka umwi aumwi kusotoka cilindi camukupa. Cakasika ciindi cakuti awalo Nabulwe asotoke. Wakasola kuti asotokesye mujulu pele mucila wakwe wakafwebunuka. Mucila wakwe wakamukwelela ansi mpaka wakumuleta mumukupa, patya!

Mbuli Nabulwe mbwaakalikupazaya mumukupa, basankwa bakatalika kumvukkila cilindi eeci kubelesya museenga kusikila limwi bamuzikka Nabulwe. Aaya ngaakali mamanino a Nabulwe. Nonkungu wakakkala abaacisyanyina cakukkomana kwaciindi cilamfu.