Kaindi, kwakali mulombwana wakajisi cilonda cipati kapati akuulu kwakwe. Takalikukonzya kwiimikila nakuba kweenda. Ooyu mulombwana wakali kukkala amukaintu abana bakwe.

Mulukwato lwabo, bakajisi bana basankwa botatwe amusimbi omwe. Mwana musimbi wakali Nangila. Ooyu Nangila, ngowakali kulela bausyi. Basankwa bakali balimi alimwi bakalikweembela zivwubwa.

Nangila wakali musimbi mubotu kapati. Bantu bamumunzi bakalikumuyanda akumupa bulemu. Bazyali bakwe bakali kumuyandauda mwaalumi mubotu. Kutegwa bajane mwaalumi mubotu, bakayeeya kuti musankwa utiikwate mwanaabo acite cintu cikatazya.

Kufwumbwa wakalikuyanda kukwata Nangila, wakeelede kuyakuleta musamu mulwizi lwakali kunze aamunzi. Musamu ooyu wakalikunga waponya bausyi Nangila. Ono lwizi oolu lwakazwide mizimu mibi.

Basankwa banjibanji bakasola kuyakuleta musamu pesi bakaalilwa. Bamaalumi bamwi bakaalilwa akujoka kumunzi.

Makani aaya akamunyonganya Nangila. Nebaba banyinandumi bakali kwaalilwa kuya kuzyiba. Nangila wakalisungula buyo kuti akaakuyandaule musamu ooyu alikke. Banyina bakati kulinguwe, "Mwanaangu, kuti bamaalumi basintanze baalilwa, yebo ndiwe ootikonzye?" Walo Nangila wakalilibambilide kale.

Kaya kulwizi Nangila, wakaswaangaanya kacembele kakadengenezyede nkuni. Nangila wakakagwasya kubweza muleye wankuni. Kacembele kakalumba kapati. Kakati kuli Nangila, "Ndilakwaambila mbonga wasaangana amizimo yamulwizi acakucita naa wasika ookuya."

Naakasika kulwizi Nangila, wakabona mukwasyi wa mizimo kaunywa meenda akuzyana. Musimbi ooyu wakalindila akulangisisya mizimo mbulimboyakali kuyaaboona.

Noyakoona mizimo, Nangila wakaliwaalila mulwizi. Wakaujana musamu akuubikka mucibeeke cakwe. Naakali kujoka kuya ankomwe, mayuwe mapati akalimuzingulukide.

Naakasika ankomwe Nangila, mizimo yakabuka. Wakayoowa kapati ono wakaimba buyo lwiimbo ndwaakamwiisya mucembele:

Me ndemwana wa Wekesa, Ndazwa kulwizi. Ndakaboola nkaambo bamaalumi balayoowa kuboola. Bataata bayanda musamu wakulisilisya cilonda cabo. Ncecico eeci ncondajanwa ookuno, Munyika eeyi banji mobayoowa kusika, Nkaambo ndendinywe beendelezi.

Nangila wakajisi jwi libotu cakuti mizimo iilya yakamulomba kuti aimbe alimwi cakujokelezya.    Naakali kwiimba, Nangila wakali kubutika mizimo. Nangila wakalunduka lubilo lugambya kusikila naakasika kung'anda.

Icisi coonse cakali kulindila kuboola kwa Nangila.    Nibakamana kubelesya musamu wakulwizi, bausyi Nangila bakatalika kwiimikila alimwi. Bantu bamumunzi boonse bakamaninina kuzyana akulumbaizya Nangila.