Kaindi, kwakali mwami wakali kwiitwa kuti Kayanja. Mwami ooyu, wakali kukkala mung'anda yabwami. Wakalikukkala amukaintu wakwe alimwi amwana musimbi wazyina lya Apenyo. Apenyo wakali musimbi mubotu kapati. Kufwumbwa mwaalumi wakali kuyanda kumukwata. Ono mwami wakaitila lubono lunji lwakubbadela kulukwato lwa mwanaakwe.

Munsimunsi ang'anda yamwami Kayanja kwakali kukkala mwami uumbi. Ooyu, wakali kwiitwa kuti Aludah Mukando. Bakali kumwiita kuti 'Mukando' nkaambo ooko nkwaakali kukkala, boonse bakali kumulemeka. Wakali mukali kuli baabo batakali kumuteelela. Tiikwalina inda ciindi cilamfwu bamuka Aludah kabafwide. Bakafwa kubulwazi bwatuntumaanzi. Aboobo mwami wakali kuyanda kukwata mukaintu umbi.

Mwami Aludah, wakaunka ku mwami Kayanja kukubbadela lubono lwalukwato kumwanaa mwami. Ooyu Aludah wakalineneede kapati alimwi kali kale mubucembele bwakwe. Nobakali kwaambauzyanya mweelwe walubono balombwana aaba, Kakembo wakalikumvwa nzyobakali kwaamba. Ooyu Kakembo wakali mubelesi mung'anda ya mwami. Ono Kakembo, bakali kumvwana kapati a Apenyo.

Mwami Aludah wakazumina kupa cisela calubono lwakwe kumwami Kayanja. Wakasanganya a nyeleti yalo yakali kucita cibeela calubono lwalukwato. Kulibambila kwabwiinga bwa mwami Aludah a Apenyo kwakali kwakusisikizya. Mwami wakalizyi kuti mwanaakwe inga taacikkomanina pe.

Kwakasyeede mwezi omwe kuti bwiinga bucitwe. Kakembo wakaunka kuli Apenyo. "Ooyandwa omwanaa mwami, bauso bakubambila mucado a Mwami Aludah. Mucado ooyu uyakuba mvwiki iboola," mbwaakaamba oobu Kakembo.

Apenyo wakanyandwa kapati cakuti kumatalikilo, tanaakazyi acakucita. Mpoona wakayeeya boobu, "Kunyina neyakukwatwa kumwami Aludah. Oobuya mbwaneneede alimwi mudaala. Kunyina! Ndeelede kufwambaana kuya kuli Trevor ndibone ncanga wacita nokutana ba kumuka." Trevor wakali musankwa wakali mulongwe wa Apenyo.

Nokwakasiya buzuba mbubwena oobo, Apenyo wakaloboka. Wakazwa mung'anda yabwami. Nobakazyiba nkwaakali kuya bausyi, nobakanyema kapati. Apeyo wakatija, ngooyo waakwiinda muloonde amucisaka cisiya. Wakainda atala amabwe amuzivwuna limwi waakusika kuli Trevor wakwe. Naakasika ang'anda ya Trevor, wakali katede alimwi wakali aanzala a nyota.

"Omuyandwa wangu, nkaambo nzi ncoolunduka kuzwa kulaale ooko olikke ciindi camasiku?" wakabuzya Trevor. Wakamuletela meenda akunywa mpoona wamuleka wapumuna. Trevor wakaalilwa kukkala ciindi naakalikulindila Apenyo kuti abandike.

"Omwanaa mwami, ncinzi capenzya?" Trevor wakabuzya. Apenyo wakayoya mpoona kauside wakati, "Bataata bayanda kundikwasya ku Mwami Aludah Mukando. Inga tiindakwatwa kumunene uulya mubi pee. Trevor, ndiyanda kukwatwa kulinduwe nokuba kuti ulimucete. Ndililibambilide kupenga andiwe. Ndilakuyanda kapati."

"Langa, omwanaa mwami, nsejisi lubono lwakubbabela kulukwato lwako. Ulizyi kuti ndimusankwa mucete," Trevor wakalilizyaanya.    Apenyo wakati, "Ndizyi oobo, ono kuuli ndiwe buyo nkwenga ndakwatwa." Apenyo wakayeeya kwakaindi kaniini, mpoona wakati, "Katuya kuli Kategga, mukkwasuzyi wamato. Kategga ulatuzabusyizya kutalaa mulonga kutegwa tutije abalo bataata batakatujani."

Kucilawo camwami, mwami Kayanja wakazyiba kuti Apenyo watija. Wakaambila bantu bakwe kuti bamuyandaule kuzinguluka munzi woonse. Bakapaso, abamasibbuku abantu boonse bamumunzi bakamuyandaula pele taakwe nobakamujana Apenyo. Bakajokela buyo kumwami akuyakumwaambila kuti kunyina nkobakamubona Apenyo. "Ani amuunke musyokwe mukamuyandaule," mwami wakalailila. Mwami wakanyema kapati.

Apenyo a Trevor kabavwaka kuya kumulonga. Makumbi aasiya akabungana kujulu. Imvwula mpati yalimunsimunsi akuwa.

Kategga sikukwasula mato wakalikukobeka bwato bwakwe nobakasika ba Apenyo a Trevor. Trevor wakabuzya Kategga kuti abazabusye. Kategga wakakaka kumwi kapandulula kuti imvwula yakalikuboola yakalikukonzya kuleta ntenda.

Trevor wakasinikizya Kategga akumupandulwida ncobakeelede kuzabukila ciindi ncicona eeco. Mpoona wakanjizya kwaanza munkomo akugusya mali kuti ape Kategga. Naakamvwa caano cabo akubona mali, Kategga wakaba abuusu akubamvwida luse. Wakazumina kubazabusya nokuba kuti julu tiilyakali kabotu.

Kategga wakakwela bwato munsi aankomwe akubaambila kuti batante. Mpoona wakabweza nkwasu yakwe akutalika kukwasula. Ciindi Mwami Kayanja a Mwami Aludah nobakasika kumulonga, bakabona bantu botatwe mubwato. Bakazyiba kuti Apenyo a Trevor batija.

Imvwula mpati yamuwo yakatalika kuwa. Bwato bwakatalika kuzungaana. Kategga taakacili kukonzya kunyona bwato. Mwami Kayanja wakoompolola kati, "Apenyo! Joka kaka! Ndakulekelela alimwi kunyina neya kukusubula naba Trevor pe." Ono kwakaba kumuka. Bwato bwakabbindamuka a bantu botatwe bakali mubwato bakasoogwa mumeenda. Boonse bakanyikila akunywida. Kuzwa buzuba oobo, kufwumbwa muntu munyika ya Mwami Kayanja wakali kukwata ooyo ngwayanda, abe muvwubi naba mucete.