Kaindi, kwakanyina banyama bakajisi maulu. Boonse banyama bakali kukalaba buyo ansi.

Bantu balikke mbabakajisi maulu nkaambo Maguru mbambabo mbaakapede maulu.

Buzuba bumwi Maguru wakayeeya kupa maulu kubanyama boonse. Wakeenda kuzinguluka munzi kayaabwaambilizya kubelesya ntolompita. Wakalikuyanda kuti munyama woonse kaenda mbuli muntu.

Banyama bakakkomana kapati nobakamvwa kuti bayakupegwa maulu. Aumwi munyama wakayanda kuti abe amaulu kutegwa keenda akulunduka. Banyama bakaimba, bakwisula micila yabo akuvwupaula mababa abo.

Bakabungana akuba amubandi mbuli mbocakali ciyumu kukalaba. Bulongo bwali kubacubbula mwida. Maulu ayakubagwasya kuti kabaima akubona kulaale mbuli bucita bantu.

Nobwakasika buzuba, banyama bakakalaba kuya kung'anda ya Maguru kuti bakabweze maulu. Indyabulula, basyuumbwa, bazovwu basulwe, baciwena abayuni bakandandama mumundando akulindila kuti bapegwe maulu.

Munyama omwe omwe wakapegwa maulu one. Ono bayuni balo bakapegwa maulu obiloobilo.

Banyama bakaboneka bwaandeene. Bamwi bakazyana mulutangalo. Bamwi bakaba abuyumuyumu aboobo bakalikuwa nobakali kweenda.

Banyama bakeenda kabayaabuzinguluka munzi kunyomenezya bantu. Boonse banyama bakati, "Kunyina notuyakukalaba alimwi."

Munyama wakali wamamanino lyakali Jongola.    Maguru wakabuzya jongola kati, "Sena kuli bamwi bakutobela?" "Peepe. Ndiwamamanino," Jongola lyakavwiila.

Maguru wakayeeya akwaamba kuti, "Naa kunyina bambi, ndilacita buti amaulu aaya acaala?" Maguru wakapa Jongola maulu oonse akaceede.

Jongola lyakakkomana nkaambo lyakaba amualu manji. "Ndinikweendesya kwiinda boonse," mbolyakayeeya Jongola.

Mbolyakazwida buyo Jongola, Nzoka yakaboola kung'anda yaa Maguru. "Amundipe ambebo maulu Mwami," Nzoka yakalomba Maguru.

"Ndaapa kale maulu oonse. Ino walikuli yawe?" mbwaakabuzya Maguru. "Ndoonenena," Nzoka yakavwiila.

Maguru wakayandaula mung'anda yakwe kuti naa kwakalisyeede maulu. Ono kunyina angaakajana.

Maguru wakazwa anze akuti, "Cabija onzoka. Kunyina maulu asyeede." Inzoka yakacuta buyo kuya kung'anda kainyina amaulu. Kuzwa buzuba oobo, Nzoka tayoonesyi. Lyoonse yalo ilindila ciindi cabili cakupegwa maulu.